PROBERB 25 - KA BAIBL

Ki jinghikai shaphang ka jinglong jingim babha

¹ Kine ruh ki long ki proberb u Solomon, kiba ki briew jong u Hesekaïah u syiem ka Judah ki la kopi.

² Ka long ka burom U Blei ban buhrieh ïa kaei kaei: hynrei, ka burom ki syiem ban ïit bha ïa ka kam.

³ Ka bneng kaba don ka jingjrong, bad ka khyndew kaba don ka jingjylliew, bad ka dohnud ki syiem ka bym lah ïit shuh.

⁴ To shim noh ïa ka eit rupa na ka rupa, te kan wan mih ka pliang ïa u nongpynphrang:

⁵ to shim noh ïa u bymman na khmat u syiem, te ïa ka khet jong u yn pynskhem ha ka hok.

⁶ Wat pynpaw khmat eh ïa lade ha khmat u syiem, bad wat ïeng ha ka jaka ki bakhraw batri:

⁷ naba ka kham bha ba yn ong ha me, “To kiew shane;” ban ïa ka ban pynpoh ïa me ha khmat u rangbah, uba ki khmat jong me ki la ïohi.

⁸ Wat leit mih kyrkieh ban ïaleh, ïoh ba mem tip kumno ban leh ha ka bakut jong ka, haba u paramarjan jong me u la pynlehrain ïa me.

⁹ To ïasaid ïa la ka kam bad la u paramarjan hi, bad wat pynpaw ïa ka jingbuhrieh jong uwei pat:

¹⁰ ïoh ba uta uba ïohsngew ïa ka un krenbeiñ ïa me, bad ba kan ym phai noh ka jingjahburom jong me.

¹¹ Ka ktien ba la kren haba bit ka long kum ki sohphoh ksiar ha ki shang rupa.

¹² Kum ka sohshkor ksiar, bad ka jingdeng ksiar banylla, kumta, long u nongsneng u bastad ha ka shkor kaba kohnguh.

¹³ Kum ka jingkhriat ka ïor ha ka aïom ot, kumta long u nonglam-ktien uba lah ban shaniah ha kiba phah ïa u; naba u pyntngen ïa ka mynsiem ki kynrad jong u.

¹⁴ Kum ki lyoh bad ki lyer khlem slap, kumta long uba kren sarong lamler ïa la ki jingai.

¹⁵ Da kaba ïaishah ba pynkohnguh ïa u nongsynshar, bad u thylliej u bajem u pynkheiñ ïa ka shyieng.

¹⁶ Me la shem ka ngap ne em? to bam kat ban biang ïa me; ïoh ban pynshlei ïa me da ka, bad ba men prie ïa ka.

¹⁷ To ai ba ka kjat jong me kan leit ñiar sha ka ïing u paramarjan jong me; ïoh ba un sngewsatia ïa me, bad ba un isih ïa me.

¹⁸ U briew uba sakhi lamler pyrshah ïa la u paramarjan u long u tyrnem, bad ka waitlam, bad u khnam banep.

¹⁹ Kaba shaniah ha u briew uba shukor ha ka por bajynjar ka long kum ka bniat ba la kheiñ, bad ka kjat ba la kheiñ khylliah.

²⁰ Kum uba shim noh ïa ka jaiñkup ha ka por khriat, bad kum ka sirka ba la khleh bad ka nether, kumta long uba rwai ka jingrwai ha ka dohnud kaba khia.

²¹ Lada u nongshun jong me u thngan, ai jingbam ïa u ba un bam; bad lada u sliang, ai um ïa u ba un dih:

²² naba men kynton ïa ki rnga ding barhem halor ka khlieh jong u, bad U Trai un ai nong ïa me.

²³ Ka lyer shatei ka pynmih ïa u slap: kumta ruh u thylliej uba kren siar pasiaw ïa ka khmat babitar.

²⁴ Lah kaba shong ha kyndong halor ïing, ban ïa ha ka ïing kaba kylluid lem bad ka kynthei kaba ïakajia.

²⁵ Kum ki um khriat ïa ka mynsiem basliang, kumta long ki khubor babha na ka ri kaba jngai.

²⁶ Kum ka pukri ba la ïuh, bad ka umpohliew ba la pynjakhlia, kumta long u briew bahok uba dem ha khmat u bymman.

²⁷ Kam long ka babha ban bam shibun ka ngap: kumta ba ki briew kin wad bniah ïa la ka jong ka burom kam long burom.

²⁸ Uta u bymdon ka jingkhang ïa la ka mynsiem u long kum ka nongbah kaba la twa bad ka bymdon kynroh.