PROBERB 24 - KA BAIBL

-19-

¹ Me wat bishni ïa ki briew ki basniew, lymne wat kwah ban long lem bad ki.

² Naba ka dohnud jong ki ka puson ïa ka jingbanbeiñ, bad ki rmiang shyntur jong ki, ki kren ïa ka jingpynsniew.

-20-

³ Da ka jingstad ba tei ïa ka ïing; bad da ka jingshemphang ba pynskhem ïa ka:

⁴ bad da ka jingtip ba pyndap ïa ki kamra da ka spah bakordor bad basngewbha baroh.

-21-

⁵ U briew u bastad u long uba khlaiñ; bad u briew uba tip u pynroi ïa ka bor.

⁶ Naba da ka jingïalam bastad men pynlong ïa la ka thma: bad ha ka jingbun ki nongpyrkhat ka don ka jingskhem.

-22-

⁷ Ka jingstad ka jrong eh ïa u babieit: um ju ang ïa la ka shyntur ha ka khyrdop.

-23-

⁸ Uba pyrkhat khnang ban leh sniew, ki briew kin khot ïa uta “u barunar.”

⁹ Ka jingmut u babieit ka long pop: bad u nongrkhiebeiñ u long ka jingijli ïa ki briew.

-24-

¹⁰ Lada men thait ïan ha ka sngi ka jingjynjar, ka bor jong me ka long kaba rit.

-25-

¹¹ To pyllait ïa kita ïa kiba la dang rong noh sha ka jingïap, bad ïa kita kiba la jan ban shah pynïap to sumar ba men khang noh.

¹² Lada me ong, “Ha khmih, ngim shym tip ïa kane:” hato uta uba thew ïa ki dohnud um pyrkhat ïa ka? bad uta uba ri ïa ka mynsiem jong me, um tip ïa ka? Bad un ai ne em ha uwei uwei baroh katba kum ka kam jong u?

-26-

¹³ Ko khun, to bam ngap, naba ka long ka babha; bad ïa ka rewngap, kaba long kaba thiang ïa ka neng shyntur jong me:

¹⁴ kumta, men ïoh tip ïa ka jingstad ba ka long ïa ka mynsiem jong me: lada me la shem ïa ka, hangta te kan sa long ka nong, bad ïa ka jingkyrmen jong me yn ym ot noh.

-27-

¹⁵ Wat ap thap, ko me u bymman, ïa ka jaka shong jong u bahok; wat lute ïa ka jaka shongthait jong u:

¹⁶ naba hynñiew sien u hap u bahok, te u ïeng pat: hynrei, ïa u bymman la pynkyllon da ka jingjynjar.

-28-

¹⁷ Wat kyrkoh haba u hap u nongshun jong me, bad wat ai ba kan kmen ka dohnud jong me haba la pynkyllon ïa u:

¹⁸ ïoh ba U Trai u ïohi ïa kata, bad ba ka pynsngewsih ïa u, bad ba u pynphai noh ïa la ka jingbitar na u.

-29-

¹⁹ Wat sngewbitar ïa ki nongleh sniew; lymne wat bishni ïa ki bymman:

²⁰ naba kan ym don ka nong ïa u bymman; ïa ka sharak jong u bymman yn pynlip noh.

-30-

²¹ Ko khun, to sheptieng me ïa U Trai bad ïa u syiem: bad wat ïashang bad kita kiba shait kylla:

²² naba ka jynjar jong ki ka ïeng kyndit; bad uei uba tip ïa ka jingpynjot jong ki baroh ar?

²³ Kine ruh ki long ki jingong jong ki bastad. Kaba shah shiliang ha ka jingbishar kam long ka babha.

²⁴ Uta uba ong ha u bymman, “Me u bahok;” ki briew kin tim ïa u, bad ki jaid bynriew kin isih ïa u;

²⁵ hynrei, ha kita kiba sneng ïa u kan long ka jingsngewbha, bad ka jingkyrkhu ka babha kan wan jia ha ki.

²⁶ U doh ïa ki rmiang shyntur jar u ba ai jubab kaba dei.

²⁷ To khreh ïa la ka kam shabar, bad khreh pynbeit ïa ka ha me ha lyngkha; te hadien kata, to tei ïa la ka ïing.

²⁸ Wat long u sakhi pyrshah ïa la u paramarjan khlem daw; bad wat shukor da la ki rmiang shyntur.

²⁹ Wat ju ong, “Ngan leh ha u kumba u la leh ha nga; ngan ai ha uta u briew katba kum ka kam jong u.”

³⁰ Nga la leit hajan ka lyngkha jong uba alhia, bad hajan ka brisoh Waiñ jong uba suda ka jingshemphang;

³¹ te ha khmih, ki la mih ki dieng shiah halor jong ka baroh, ïa ka khmat jong ka la tap da u synrem, bad ka kynroh maw jong ka, ka la twa.

³² Hangta nga la khmih, bad nga la pyrkhat bha: nga la ïohi, bad nga la ïoh ka jinghikai.

³³ Sa khyndiat pat ka jingïohthiah, sa khyndiat kaba shoh samthiah, sa khyndiat kaba thain ki kti ban ïohthiah:

³⁴ kumta ka jingduk jong me kan wan kum u nongtuh; bad ka jingkyrduh jong me kum u briew ba la kieng atiar.