PROBERB 23 - KA BAIBL

-6-

¹ Haba me shong bam bad u nongsynshar, to pyrkhat bha ïa uta uba don ha khmat jong me;

² bad buh ka tari ha la ka ryndang, lada me long u briew uba shait lalot.

³ Wat sngewkwah ïa ki jingbam bang jong u; haba ki long ki jingbam bashukor.

-7-

⁴ Wat pynshitom ïa lade ban long riewspah; to wai noh na la ka jong ka jingstad.

⁵ Hato men buh ïa la ki khmat ha kata ka bymlong? Naba shisha ka spah ka pynlong thapniang ïa lade, kum ka pukni kaba her sha bneng.

-8-

⁶ Wat bam ïa u kpu jong u basniew ki khmat jong u; lymne wat kwah ïa ki jingbam bang jong u:

⁷ naba kumba u pyrkhat hapoh lade, kumta u long: “To bam to dih,” u ong ha me; hynrei, ka dohnud jong u kam long bad me.

⁸ Ïa ita i shi lyngkhot iba me la bam men sa prie noh, bad men duh ei noh ïa la ki ktien bathiang.

-9-

⁹ Wat kren ha kaba ïohsngew u babieit; naba un ñiewbeiñ ïa ka jingstad ki ktien jong me.

-10-

¹⁰ Wat pynkynriah ïa u mawpud uba rim; bad wat leit sha ki lyngkha jong ki khunswet:

¹¹ naba u nongsiewspah jong ki u long uba khlaiñ; un ïasaid ïa ka kam jong ki pyrshah ïa me.

-11-

¹² To thew ïa la ka dohnud sha ka jinghikai, bad ïa la ki shkor sha ki ktien ka jingtip.

-12-

¹³ Wat khang ïa ka jingsneng na u khynnah: naba lada men sympat ïa u da u thri, un ym ïap.

¹⁴ To men sympat ïa u da u thri, te men pynim ïa ka mynsiem jong u na ka jingtep.

-13-

¹⁵ Ko khun, lada ka dohnud jong me kan long ka bastad, ka dohnud jong nga kan long kaba kmen, ka jong nga keiñ:

¹⁶ shisha, ki khyllai jong nga kin shadkmen, haba ki rmiang shyntur jong me kin kren ïa kiei kiei kiba dei.

-14-

¹⁷ Wat ai ba ka dohnud jong me kan bishni ïa ki nongpop: hynrei, me to long ha ka jingsheptieng ïa U Trai baroh shi sngi:

¹⁸ naba da shisha ka don ka nong; bad ïa ka jingkyrmen jong me yn ym ot noh.

-15-

¹⁹ To sngew, ko khun, bad to long stad, bad to ïalam ïa la ka dohnud ha ka lynti.

²⁰ Wat long hapdeng kiba kyrni dih Waiñ; hapdeng kiba bam lalot ïa ka doh.

²¹ Naba uba buaid bad uba bam lalot kin poi sha ka jingduk: bad kaba samthiah kan pynkup ïa u briew da ki jaiñ jot.

-16-

²² To sngap ïa la u kpa uba la pynkha ïa me, bad wat ñiewbeiñ ïa la ka kmie haba ka la tymmen.

²³ To thied ïa ka jingshisha, bad wat die ïa ka; ïa ka jingstad ruh, bad ïa ka jinghikai, bad ïa ka jingshemphang.

²⁴ U kpa jong u bahok un shadkmen shibun: bad uta uba la pynkha ïa u khun u bastad un ïoh ka jingkmen namar jong u.

²⁵ Ai ba kin kmen u kpa bad ka kmie jong me, bad ai ba kata kaba la kha ïa me, kan shadkmen.

-17-

²⁶ Ko khun, to ai ha nga ïa ka dohnud jong me, bad to ai ba ki khmat jong me kin sngewbha ha ki lynti jong nga.

²⁷ Naba ka nuti ka long ka kharai kaba jylliew; bad ka kynthei nongwei ka long ka 'liewlep kaba khim.

²⁸ Shisha, ka ap thap kum u nongtuh, bad ka pynroi ïa ki nongshetkylla hapdeng ki briew.

-18-

²⁹ Uei uba don ka jingkordit? Uei uba don ka jingsngewsih? Uei uba don ki jingïapyneh? Uei uba don ka jingud? Uei uba don ki jingmong khlem daw? Uei uba don ka jingsaw ki khmat?

³⁰ Kita keiñ kiba shong slem ha ka Waiñ; bad kiba leit wad ïa ka Waiñ ba la khleh.

³¹ Wat khmih ïa ka Waiñ haba ka saw, haba ka pynmih ïa la ka rong ha ka khuri, haba ka leit hiar jem:

³² ha ka bakut ka dait kum u bseiñ, bad ka puh kum u 'seiñïong.

³³ Ki khmat jong me kin ïohi ïa kiei kiei kiba phylla, bad ka dohnud jong me kan kren ïa kiei kiei kiba mutlop.

³⁴ Bad men long kum uba thiah hapdeng ka duriaw, lane kum uba thiah ha kliar mustul.

³⁵ “Ki la shoh ïa nga,” men ong, “te ngam shym pang; ki la sympat ïa nga, te ngam shym sngew ei ei: lano ngan peit? ngan dang wad ïa ka pat.”