PROBERB 22 - KA BAIBL

¹ Ka nam ka babha ka kham dei ban jied ban ïa ka spah kaba khraw, bad ka jingsngewbha ba-ieit ban ïa ka rupa bad ka ksiar.

² Ki bariewspah bad ki baduk ki ïashem lang: U Trai u long u nongthaw jong ki baroh.

³ U briew u basian u ïohi ïa ka basniew, bad u buhrieh ïa lade: hynrei, u bymsian u shu nang ïaid, bad u shah shitom namar kata.

⁴ Ka nong ka jingsngewrit bad ka jingsheptieng ïa U Trai long ka spah, bad ka burom, bad ka jingim.

⁵ Ki dieng shiah bad ki jingriam ki don ha ka lynti jong uba mutlop: uta uba sumar ïa la ka mynsiem un long jngai na ki.

⁶ To hikai ïa u khynnah ha ka lynti ba u dei ban leit, te un ym kynriah na ka wat haba u la tymmen.

⁷ U riewspah u synshar halor u baduk, bad uba shim ram u long u shakri uba ai ram.

⁸ Uba bet ïa ka jingbymhok un ïoh ot ïa ka jingjynjar: bad u dieng ka jingbitar jong u un duh noh.

⁹ Uba don ka khmat kaba kylluid yn kyrkhu ïa u; naba u ïa-ai na la u kpu ha u baduk.

¹⁰ To shop noh shabar ïa u nongrkhiebeiñ, te ka jingïapyneh kan mih shabar; ka jingïamai bad kaba jahburom kin duh noh ruh.

¹¹ Uta uba ieit ïa ka jingkhuid ka dohnud, namar ka jingaiei ki rmiang shyntur jong u, u syiem un long u lok jong u.

¹² Ki khmat U Trai ki ri kyndong ïa uba don ka jingtip, hynrei, u pynkyllon noh ïa ki ktien u nongshetkylla.

¹³ Uba alhia u ong, “Don u sing ha khyndew: yn pynïap ïa nga ha ki lynti shnong.”

¹⁴ Ka shyntur ka kynthei nongwei ka long ka 'liewlep kaba jylliew: uta uba U Trai u isih un hap ha ka.

¹⁵ Ïa ka jingbieit la tehsong ha ka dohnud u khynnah; hynrei, u dieng ka jingsneng sympat un beh ïa ka sha jngai na u.

¹⁶ Uta uba banbeiñ ïa u baduk ban pynroi ïa la ka nong, bad uba ai ha u bariewspah, u ïoh tang ka jingkyrduh.

Ki jinghikai bad ki jingmaham

¹⁷ To pyndem ïa la ka shkor, bad to sngap ïa ki ktien jong ki bastad, bad to thew ïa la ka dohnud sha ka jingtip jong nga.

¹⁸ Naba ka long kaba sngewbha lada me sumar ïa ki hapoh jong me, lada pynskhem lang ïa ki ha ki rmiang shyntur jong me.

¹⁹ Khnang ba ka jingshaniah jong me kan ïoh long ha U Trai, nga la pyntip ïa ki ha kane ka sngi ha me, ha me keiñ.

²⁰ Hato ngam shym la thoh ha me ïa kiei kiei ki babha eh ki jong ki jingpyrkhat bad ka jingtip:

²¹ ïa ka ban pyntip ïa me ïa ka jingskhem ki ktien ka jingshisha, ba me lah ban leit lam lem ïa ki ktien ka jingshisha sha kita kiba la phah ïa me?

-1-

²² Wat lute ïa u baduk, namar ba u long u baduk, lymne wat banbeiñ ïa u bajynjar ha ka khyrdop:

²³ naba U Trai un ïasaid ïa ka kam jong ki, bad un lute ïa ka jingim jong kiba lute ïa ki.

-2-

²⁴ Wat pynlong ka jingïalok bad u briew uba shait bitar; bad wat ju leit bad u briew uba khong khong:

²⁵ ïoh ba men nang ïa ki lynti jong u, bad ba men ïoh ka jingriam ïa la ka mynsiem.

-3-

²⁶ Wat long uwei na kita kiba ïathab kti, lane na kita kiba long nongbahjamin ïa ka ram:

²⁷ lada mem don ei ei ban siew, balei un shu leit shim noh ïa ka jingthiah jong me napoh jong me?

-4-

²⁸ Wat pynkynriah noh ïa u mawpud uba rim, uba ki kpa jong me ki la buh.

-5-

²⁹ Me ïohi ïa u briew uba minot ha la ka kam? un ïeng ha khmat ki syiem keiñ; un ym ïeng ha khmat ki briew ki bapoh.