PROBERB 21 - KA BAIBL

¹ Ka dohnud u syiem ka long ha ka kti U Trai kum ki jingpun um: u pynphai ïa ka kat shaba u mon.

² Ka lynti baroh u briew ka long kaba dei ha khmat jong u hi: hynrei, U Trai uba thew ïa ki dohnud.

³ Kaba leh ïa ka hok bad ïa ka jingbishar ka long kaba kham pdiang hun ha U Trai ban ïa ka jingkñia.

⁴ Ka jingkhmih meng, bad ka dohnud kaba sarong, wat ka sharak jong u bymman, ka long pop.

⁵ Ki jingmut jong uba minot ki lam tang sha ka jingkyrhai: hynrei, uwei uwei baroh uba kyrkieh u kyrkieh tang sha ka jingkyrduh.

⁶ Kaba ïoh ïa ki jingkynshew da u thylliej uba lamler ka long ka jynhaw ba la beh shane bad shawei; kiba wad ïa ki, ki wad ïa ka jingïap.

⁷ Ka jingleh-jubor ki bymman kan rong noh ïa ki; namar ba kim treh ban leh ïa ka jingbishar.

⁸ Ka lynti jong uta uba kit pop ka long kaba 'dor eh: hynrei, u bakhuid te, ka kam jong u ka long kaba beit.

⁹ Lah kaba shong ha kyndong halor ïing, ban ïa ha ka ïing kaba kylluid lem bad ka kynthei kaba ïakajia.

¹⁰ Ka mynsiem jong u bymman ka kwah ïa ka basniew: u paramarjan jong u um shem kaba sngewbha ha khmat jong u.

¹¹ Haba ïa u nongrkhiebeiñ la pynshitom, ïa u bymsian la pynlong stad: bad haba la hikai ïa u bastad, u pdiang ïa ka jingtip.

¹² U bahok u pyrkhat ïa ka ïing jong u bymman: ba ïa u bymman la pynkyllon sha la ka jingpynjot.

¹³ Jar uba set ïa la ki shkor na ka jinglynñiar jong u baduk, u ruh un lynñiar, hynrei, yn ym sngap ïa u.

¹⁴ Ka jingai ha kaba rieh ka pynjem ïa ka jingbitar, bad ka jingai sngewbha ha ka shadem ïa ka jingbitar kaba jur.

¹⁵ Ka long ka jingkmen ïa u bahok ban leh ïa ka jingbishar; hynrei, ka long ka jingpynjot ïa ki nongleh ïa ka bymhok.

¹⁶ U briew uba sakma na ka lynti ka jingshemphang un shongthait ha u paidlang jong ki baïap.

¹⁷ Uta uba ieit ïa ka jingsngewbha un long u briew u baduk: uta uba ieit ïa ka Waiñ bad ka umphniang un ym long u bariewspah.

¹⁸ U bymman u long ka kuna namar u bahok; bad uba shetkylla u wan ha ka jaka uba beit.

¹⁹ Lah kaba shong ha ka ri shyiap, ban ïa bad ka kynthei kaba ïakajia bad kaba ingkhong.

²⁰ Don ka jingkynshew kaba kordor bad ka umphniang ha ka ïingshong jong u bastad; hynrei, u briew u babieit u shu nguid ïa ka.

²¹ Uta uba beh ïa ka hok bad ka jingisynei u shem ïa ka jingim, ïa ka hok, bad ka burom.

²² U briew u bastad u kiew sha ka nongbah jong kiba khraw bor, bad u pynkyllon ïa ka jingkhlaiñ ha kaba ka shaniah.

²³ Jar uba sumar ïa la ka shyntur bad ïa la u thylliej u sumar ïa la ka mynsiem na ki jingjynjar.

²⁴ Uba sarong bad uba sngewmeng, “U nongrkhiebeiñ” long ka kyrteng jong u, u trei ha ka jingsngewkhraw ka jingsarong.

²⁵ Ka jingkwah jong uba jaipdeh ka pynïap ïa u; naba ki kti jong u kim treh ban trei.

²⁶ Don uba shu khwan lalot baroh shi sngi: hynrei, u bahok u ïa-ai bad um bynnud.

²⁷ Ka jingkñia jong u bymman ka long ka jingijli: sa katno lei lei haba u wallam ïa ka bad ka jingmut bymman!

²⁸ U nongsakhi lamler un duh noh: hynrei, u briew uba ïohsngew un kren bymdon ba kem daw.

²⁹ U riewbymman u pyneh ïa la ka khmat: hynrei, uba beit te, u pynbeit ïa la ka lynti.

³⁰ Ym don lymne ka jingstad lymne ka jingshemphang lymne ka jingpyrkhat ba-ïaleh ïa U Trai.

³¹ Ïa u kulai la khreh hamar ka sngi ba-ïaleh thma: hynrei, ka jingjop ka long na U Trai.