PROBERB 20 - KA BAIBL

¹ Ka Waiñ ka long ka nongrkhiebeiñ, bad ka kyiad ka long ka nongïamai; bad uba bakla da ki, um long u bastad.

² Ka jingpynsheptieng u syiem ka long kum ka jingkyrhuh u sing: uta uba pankwah ïa u ban bitar u leh pop ïa la ka jong ka mynsiem.

³ Ka long burom ïa u briew ba un kiar na ka jingïakajia: hynrei, u babieit baroh un shu ïamai.

⁴ Uba jaipdeh un ym lur namar ba tlang; namar kata, un shu makia mynlyiur, bad um ïoh ei ei.

⁵ Ka jingpyrkhat ha ka dohnud u briew ka long kum ka um kaba jylliew; hynrei, u briew uba shemphang un tong ïa ka.

⁶ Bun ki briew ki ban pynbna ïa la ka jong ka jong ka jinglehsbun: hynrei, uei u ban shem ïa uba lah ban shaniah?

⁷ U briew u bahok uba ïaid ha la ka jingbeit, suk ki khun jong u hadien jong u.

⁸ U syiem uba shong ha ka khet bishar u pynher noh ïa ka jingsniew baroh da la ki khmat.

⁹ Uei uba lah ban ong, “Nga la pynlong khuid ïa la ka dohnud, nga long khuid na la ka pop?”

¹⁰ Ki mawser kiba ïapher, bad ki jingthew kiba ïapher, baroh ar kumjuh ki long ka jingijli ha U Trai.

¹¹ Wat u khynnah u pynithuh ïa lade da la ki jingleh, la ka long ka bakhuid ne em ka kam jong u, la ka long kaba dei ne em.

¹² Ka shkor kaba ïohsngew, bad ka khmat kaba ïohi, U Trai uba la thaw ïa ki baroh ar.

¹³ Wat ieit ïa kaba ïohthiah, ïoh ba men kylla duk; to peit la ki khmat, te yn pynkdang ïa me da u kpu.

¹⁴ “Ka basniew, ka basniew,” ong u nongthied: hynrei, haba u la leit noh, hangta u kyrkoh.

¹⁵ Don ka ksiar, bad kyrhai ki maw Rubi: hynrei, ki rmiang shyntur ka jingtip, ki long u mawlynnai bakordor.

¹⁶ Shim ïa ka jaiñkup jong uba bahjamin ïa u nongwei; bad to bat bynda ïa uta uba bahjamin ïa ki nongwei.

¹⁷ U kpu ka jingshukor u bang ïa u briew; hynrei, hadien, ïa ka shyntur jong u yn pyndap da u shyiap.

¹⁸ Ïa ka jingthmu baroh la pynskhem da ka jingpyrkhat: bad da ka jingïalam ka bastad men pynlong ka thma.

¹⁹ Uba ïaid kylleng kum uba lorni u pynpaw ïa ki jingbuhrieh: namar kata, wat ïashang bad uba ang ryngheng ïa la ki rmiang shyntur.

²⁰ Jar uba tim ïa la u kpa lane ïa la ka kmie, ïa ka sharak jong u yn pynlip ha ka jingdum baïong ngaiñ.

²¹ Ïa ka jingïoh kynti lah ban ïoh kyrkieh ha kaba sdang; hynrei, ïa ka bakut jong ka yn ym kyrkhu.

²² Wat ong ma me, “Ngan siew kylliang ïa ka basniew:” to ap khmih ïa U Trai, te un pynim ïa me.

²³ Ki mawser kiba ïapher ki long ka jingijli ïa U Trai; bad ka tarajur kaba shukor ka bymbha.

²⁴ Ki jingleit u briew ki long na U Trai; kumno te ba u briew u lah ban sngewthuh ïa la ka lynti?

²⁵ Ka long ka jingriam ïa u briew ban shu ong khlem pyrkhat, “Ka long ka bakhuid,” bad hadien ba u la teh jingsmai, u tohkit.

²⁶ U syiem u bastad u peh ïa ki bymman, bad u pynshad ïa ka shalyntem khlur kba halor jong ki.

²⁷ Ka mynsiem u briew ka long ka sharak U Trai, kaba ïit ïa ki bynta ba kham shapoh ka kpoh.

²⁸ Ka jingisynei bad ka jingshisha, ki ri kyndong ïa u syiem; bad ïa ka khet jong u la kyrshan da ka jingisynei.

²⁹ Ka burom ki samla long ka jingkhlaiñ jong ki: bad ka jingitynnad ki tymmen long u 'ñiuhlieh.

³⁰ Ki jingjngem kiba mong ki pynkhuid ïa ka jingsniew: bad ki jingshoh ki kot haduh ki bynta ba kham shapoh jong ka kpoh.