PROBERB 2 - KA BAIBL

Ka bainong ha kaba wad ïa ka jingstad

¹ Ko khun, lada men pdiang ïa ki ktien jong nga, bad kynshew ïa ki hukum jong nga bad me;

² kat ban pyndem ïa la ka shkor sha ka jingstad, bad pyndei ïa la ka dohnud ha ka jingshemphang;

³ bad lada me ïam ïawad ïa ka jingsngewthuh bad pynjam ïa la ka ktien ban ïoh ka jingshemphang;

⁴ lada me wad ïa ka kum ïa ka rupa, bad wad bniah ïa ka kum ïa ki spah ba la buhrieh;

⁵ kumta te men shemphang ïa ka jingsheptieng ïa U Trai, bad men shem ïa ka jingtip ïa U Blei.

⁶ Naba U Trai u ai ka jingstad; na ka shyntur jong u ki mih ka jingtip bad ka jingshemphang:

⁷ U tyngkai ïa ka jingstad kaba shisha ïa kiba beit, u long ka stieh ïa kita kiba ïaid ha ka jingsngur;

⁸ ba un ïoh sumar ïa ki lynti ïaid ka jingbishar, bad ba un ri ïa ka lynti ki riewkhuid jong u.

⁹ Ynda kumta, men sngewthuh ïa ka hok bad ïa ka jingbishar, ïa ka jingbeit, bad ïa ka lynti babha baroh.

¹⁰ Namar ka jingstad kan rung shapoh ka dohnud jong me, bad ka jingtip kan long kaba sngewbha ïa ka mynsiem jong me;

¹¹ ka jingsian kan ap sharai ïa me, ka jingshemphang kan sumar ïa me:

¹² ïa ka ban pyllait ïa me na ka lynti ka jingsniew, na ki briew kiba kren ïa kiei kiei kiba mutlop;

¹³ kiba iehnoh noh ïa ki lynti ïaid ka jingbeit, ba kin ïaid ha ki lynti ka jingdum;

¹⁴ kiba kmen ban leh ïa ka basniew, bad kiba sngewbha ha ka jingmutlop ka jingsniew;

¹⁵ kiba kynriang ha la ki lynti, bad kiba mutlop ha la ki lynti ïaid:

¹⁶ ïa ka ban pyllait ïa me na ka kynthei nongwei, na ka nongwei kaba pynsbuh da la ki ktien;

¹⁷ kaba iehnoh noh ïa u lok ka jinglong samla jong ka, bad kaba klet noh ïa ka jutang U Blei jong ka;

¹⁸ naba ka ïing jong ka, ka dem sha ka jingïap, bad ki lynti jong ka sha kiba la ïap;

¹⁹ na kita kiba leit sha ka ym don kiba wan phai pat, lymne kim poi shuh sha ki lynti ka jingim:

²⁰ khnang ba men ïaid ha ka lynti ki briew ki babha, bad ba men sumar ïa ki lynti ïaid jong ka hok.

²¹ Namar uba beit un ïoh shong ha ka ri, bad uba janai un ïoh shong sah ha ka.

²² Hynrei, ïa ki bymman yn ot noh na ka ri, bad ïa kita kiba leh shukor yn rat noh na ka.