PROBERB 19 - KA BAIBL

¹ Lah u baduk uba ïaid ha la ka jingbeit ban ïa uba mutlop la ki rmiang shyntur bad u babieit artad.

² Ruh, ba ka mynsiem ka long khlem jingtip kam long ka babha; bad uba pynkloi da la ki kjat u leh pop.

³ Ka jingbieit u briew ka pynbakla ïa ka lynti jong u; bad ka dohnud jong u ka bitar ïa U Trai.

⁴ Ka spah ka pynlang shibun ki lok: hynrei, ïa u baduk la pynkhlad noh na la u lok.

⁵ U nongsakhi lamler un ym lait na ka jingpynshitom; bad uba kren ïa ki jinglamler un ym lait.

⁶ Shibun ki ban kyrpad ïa ka jingisynei jong uba ai kylluid: bad u briew baroh u long u lok jong uba ju ai sngewbha.

⁷ Baroh ki para jong u baduk ki isih ïa u: sa katno lei lei ki lok jong u kin jngai noh na u! u bud ïa ki da ki ktien, hynrei, ki la jah noh.

⁸ Uba ïoh ïa ka jingstad u ieit ïa la ka jong ka mynsiem: uta uba bat ïa ka jingshemphang un shem ïa ka babha.

⁹ U nongsakhi lamler un ym lait na ka jingpynshitom; bad uba kren ïa ki jinglamler un ïap noh.

¹⁰ Kaba im suk kam i ïadei ïa u babieit; sa katno lei lei ïa u shakri ban synshar halor ki bakhraw batri.

¹¹ Ka jingsian u briew ka pynlong ïa u, uba tud ban bitar; bad ka long ka burom jong u ban jam palat ïa ka jingryngkang.

¹² Ka jingbitar u syiem ka long kum ka jingkyrhuh u sing; hynrei, ka jingsngewbha jong u kum ka umjer halor u phlang.

¹³ U khun u babieit u long ka jingjynjar ïa la u kpa; bad ki jingïapyneh ka tnga ki long ka jingjaw kaba khlem pud.

¹⁴ Ka ïing bad ka spah ki long ka jinghiar pateng na ki kpa: hynrei, ka tnga kaba sian ka long na U Trai.

¹⁵ Ka jingalhia ka pynïohthiah lyngngai; bad ka mynsiem kaba jaipdeh kan shah thngan.

¹⁶ Uta uba sumar ïa ka hukum u sumar ïa la ka mynsiem: hynrei, u bymsuidñiew ïa la ki lynti, un ïap.

¹⁷ Uta uba isynei ïa u baduk u ai kylliang ha U Trai, bad ïa ka kam babha jong u un sa siew pat ïa u.

¹⁸ To sneng ïa la u khun, haba don ka jingkyrmen; bad wat thew la ka dohnud ban pynïap ïa u.

¹⁹ U briew u bakhraw ka jingbitar un shah ïa ka jingshitom: naba lada men pyllait ïa u, me dei ban dang leh kumta shuh shuh.

²⁰ To sngap ïa ka jingpyni, bad to pdiang ïa ka jinghikai, ba men dup long u bastad ha ka bakut jong me.

²¹ Don bun ki buit ha ka dohnud u briew; hynrei, ka jingpyrkhat U Trai, kata ka ban neh.

²² Ka jingkwah u briew ka long ka jingthew ka jinglehsbun jong u: bad u briew u baduk u kham bha ban ïa uba lamler.

²³ Ka jingsheptieng ïa U Trai ka lam sha ka jingim: bad uta ha uba ka don un neh ha ka jinghun; yn ym pynwan ïa ka jingsniew ha u.

²⁴ Uba jaipdeh u thep ïa la ka kti ha ka pliang, bad un ym rah ïa ka pat wat kat ha la ka shyntur.

²⁵ To shoh ïa u nongrkhiebeiñ, te uta u bymsian un nang ïa ka jingsian: bad to sneng ïa uba don ka jingshemphang, te un shemphang ïa ka jingtip.

²⁶ Uta uba lute ïa la u kpa, bad uba beh noh ïa la ka kmie, u long u khun uba pynlehrain bad uba wallam ka jingkrenbeiñ.

²⁷ To wai noh, ko khun, na kaba sngap ïa ka jinghikai ïa ka ban tang shu pynbakla na ki ktien ka jingtip.

²⁸ U sakhi uba thala u rkhiebeiñ ïa ka jingbishar: bad ka shyntur jong u bymman ka nguid ïa ka jingbymhok.

²⁹ Ïa ki jingbishar la khreh ïa ki nongrkhiebeiñ, bad ïa ki jingjngem ïa ka ingdong ki babieit.