PROBERB 16 - KA BAIBL

Ka jingsneng shaphang ka jingim bad ka rukom im

¹ Ki jingpynkhreh ka dohnud ki dei ki jong u briew: hynrei, ka jubab jong u thylliej ka long na U Trai.

² Ki lynti baroh ki jong u briew, ki long ki bakhuid ha khmat jong u hi: hynrei, U Trai u thew ïa ki mynsiem.

³ To pyntyllun ïa la ki kam ha U Trai, te ïa ki jingmut jong me yn pynskhem.

⁴ U Trai u la thaw khnang ïa kiei kiei baroh na ka bynta ïa lade: shisha, wat ïa u bymman khnang ïa ka sngi ka jingsniew.

⁵ U briew baroh uba sarong ka dohnud, u long ka jingijli ha U Trai: la ki ïaksoh para kti, un ym lait na ka jingpynshitom.

⁶ Da ka jingisynei bad ka jingshisha, ïa ka jingleh bymhok la ju sait noh: bad da ka jingsheptieng ïa U Trai, ki briew ki kynriah na ka basniew.

⁷ Haba ki lynti u briew ki pynsngewbha ïa U Trai, u pynlong wat ïa ki nongshun jong u ba kin ïasuk bad u.

⁸ Lah kaba khyndiat lem bad ka hok ban ïa shibun ka khajna lem bad ka jingbymhok.

⁹ Ka dohnud u briew ka pyrkhat ïa ka lynti jong u: hynrei, U Trai uba ïalam ïa ki jingjam jong u.

¹⁰ Ka jingrai blei ka long ha ki rmiang shyntur u syiem: ka shyntur jong u kan ym palat ha ka jingbishar.

¹¹ Ka tarajur bad ka khulpi ki bahok, ki long ki jong U Trai: ki mawser baroh ha ka pla, ki long ka kam jong u.

¹² Ka long kaba ijli ïa ki syiem ban leh ïa ka jingsniew: naba ïa ka khet la pynskhem da ka hok.

¹³ Ki rmiang shyntur ki bahok ki long ka jingsngewbha ki syiem; bad ki ieit ïa uba kren ïa kaba dei.

¹⁴ Ka jingbitar u syiem ka long kum ki nonglam-ktien ka jingïap: hynrei, u briew u bastad un pynjem ïa ka.

¹⁵ Ha ka jingshai ka khmat u syiem ka don ka jingim; bad ka jingsngewbha jong u ka long kum u lyoh u slap bakhatduh.

¹⁶ Katno ka kham bha ban ïoh ïa ka jingstad ban ïa ka ksiar! bad kaba ïoh ïa ka jingshemphang ka kham dei ban jied ban ïa ka rupa.

¹⁷ Ka lynti bah jong uba beit ka long ban kynriah na ka basniew: uta uba sumar ïa la ka lynti, u ri kyndong ïa la ka mynsiem.

¹⁸ Ka jingsarong ka leit ha shuwa ka jingpynjot, bad ka mynsiem basngewmeng ha shuwa ka jingkyllon.

¹⁹ Lah kaba long kiba sngewrit ka mynsiem bad ki baduk, ban ïa kaba ïabynta ïa ka jinglute bad kiba sarong.

²⁰ Uta uba pynshahshkor ïa ka ktien un shem ïa ka babha: bad jar uba shaniah ha U Trai, suk uta keiñ.

²¹ Ïa u bastad dohnud yn khot, “U basian:” bad ka jingthiang ki rmiang shyntur ka pynroi ïa ka jinghikai.

²² Ka jingshemphang ka long ka pukri umpohliew ka jingim ha uta uba don ïa ka: hynrei, ka jingsneng jong ki babieit ka long ka jingbieit jong ki.

²³ Ka dohnud u bastad ka hikai ïa ka shyntur jong u, bad ka pynlang ïa ka jinghikai ha ki rmiang shyntur jong u.

²⁴ Ki ktien kiba bang ki long kum ka rewngap, kiba thiang ïa ka mynsiem, bad ka jingkhiah ïa ki shyieng.

²⁵ Don ka lynti kaba imat beit ïa u briew, hynrei, ka bakut jong ka, long ki lynti ka jingïap.

²⁶ Ka jingthngan u nongtrei ka trei na ka bynta jong u: naba ka shyntur jong u ka pan ïa kata na u.

²⁷ U briew uba thala u pun ïa ka jingsniew: bad ha ki rmiang shyntur jong u ka don kum ka ding kaba khluit.

²⁸ U briew uba mutlop u pynphriang kylleng ïa ka jingïaleh: bad u nongkrensiar u pynïakhlad ïa ki lok kiba jan eh.

²⁹ U briew uba leh jubor u riam pah ïa la u paramarjan bad u ïalam ïa u ha ka lynti ka bymbha.

³⁰ Uta uba khapbrip ïa la ki khmat, ka long ïa ka ban pun ïa kiei kiei kiba runar: uta uba kyrbam ïa la ki rmiang shyntur u pynlong ïa ka jingsniew.

³¹ Ka khlieh ba la phuh 'ñiuhlieh ka long ka pansngiat ka burom, yn shem ïa ka ha ka lynti ka hok.

³² Uba tud ban bitar u kham lah ban ïa uba khlaiñ; bad uba synshar ïa la ka mynsiem ban ïa uba jop ïa ka shnong.

³³ Ïa ka jingkhalai la pynnoh sha ka pneh; hynrei, ka jingpynbeit jong ka baroh ka long na U Trai.