PROBERB 15 - KA BAIBL

¹ Ka jingphai ktien kaba jem ka pynphai noh ïa ka jingbitar: hynrei, ka ktien kaba eh ka pynkhih ïa ka jingbitar.

² U thylliej jong u bastad u kren beit ïa ka jingtip: hynrei, ka shyntur jong ki babieit ka theh noh ïa ka jingbieit.

³ Ki khmat U Trai ki long ha ki jaka baroh, ba u da ap khmih ïa ka basniew bad ïa ka babha.

⁴ U thylliej uba khiah u long u dieng ka jingim: hynrei, ka jingmutlop ha u ka long kaba pynjot mynsiem.

⁵ U babieit u ñiewbeiñ ïa ka jinghikai u kpa jong u: hynrei, uba ñiewkor ïa ka jingsneng u ïoh ka jingsian.

⁶ Ha ka ïing jong u bahok ka don shibun ka jingkynshew: hynrei, ka khajna jong u bymman long ka jingjynjar.

⁷ Ki rmiang shyntur jong u bastad ki pynphriang ïa ka jingtip: hynrei, ka dohnud u babieit kam leh kumta.

⁸ Ka jingkñia u bymman ka long ka jingijli ha U Trai: hynrei, ka jingduwai jong uba beit ka long ka jingsngewbha jong u.

⁹ Ka lynti u bymman ka long ka jingijli ha U Trai: hynrei, u ieit ïa uta uba beh ïa ka hok.

¹⁰ Ka jingsneng kaba shitom ka ap ïa uta uba iehnoh noh ïa ka lynti: bad uta uba isih ïa ka jingsneng un ïap.

¹¹ Ka jingtep bad ka jingjot ki don ha khmat U Trai: te katno tam lei lei ki dohnud u khun bynriew!

¹² U nongrkhiebeiñ um ieit ban ïoh jingsneng: un ym leit sha u bastad.

¹³ Ka dohnud kaba kmen ka pynlong ka khmat kaba phuh: hynrei, da ka jingsngewsih ka dohnud la pynjot ïa ka mynsiem.

¹⁴ Ka dohnud jong uta uba don ka jingshemphang ka wad ïa ka jingtip: hynrei, ka shyntur jong ki babieit ka bam ïa ka jingbieit.

¹⁵ Ki sngi baroh ki jong u bajynjar ki long ka jingsniew: hynrei, uta uba kmen la ka dohnud u don ka jingkhawai ha la ka sngi.

¹⁶ Lah kaba khyndiat lem bad ka jingsheptieng ïa U Trai, ban ïa ka jingkynshew shibun haba don ka jingshitom bad ka.

¹⁷ Lah kaba shi sien bam da u jhur haba don ka jingieit, ban ïa u masi ba la pynsngaid haba don ka jingshun bad u.

¹⁸ U briew uba bitar u pynkhih ïa ka jingïakajia: hynrei, uta uba tud ïa ka ban bitar u pynïasuk ïa ka jingïaleh.

¹⁹ Ka lynti jong uba alhia ka long kum ka jingker kaba da ki dieng shiah: hynrei, ïa ka lynti ïaid jong uba beit la pynlong ka lynti bah.

²⁰ U khun u bastad u pynlong uba kmen ïa u kpa: hynrei, u briew u babieit u ñiewbeiñ ïa la ka kmie.

²¹ Ka jingbieit ka long ka jingkmen ïa uba suda ka jingstad: hynrei, u briew u bashemphang u pynlong kaba beit ïa la ka lynti.

²² Ha kaba ym don ka jingpyrkhat, ïa ki jingthmu la pynbuhkhoh: hynrei, ha ka jingbun ki nongpyrkhat la pynskhem ïa ki.

²³ U briew u ïoh ka jingkmen ha ka jubab ka shyntur jong u: bad ka ktien ha ka por kaba bit, katno ka babha ka long!

²⁴ Ha u bastad ka lynti ka jingim ka kiew artet, ba un ïoh kiar na ka jingtep kaba shapoh.

²⁵ U Trai un jynrat noh ïa ka ïing jong uba sarong: hynrei, un pynskhem ïa ka pud jong ka riewkynthei.

²⁶ Ki jingpyrkhat ki basniew ki long ka jingijli ha U Trai: hynrei, ki ktien kiba bang ki long ki bakhuid.

²⁷ Uba khwan myntoi u pynshitom ïa la ka jong ka ïing: hynrei, uta uba isih ïa ki jingai, un im.

²⁸ Ka dohnud u bahok ka pyrkhat ïa ka ban phai ktien: hynrei, ka shyntur jong u bymman ka shu theh noh ïa kiei kiei ki basniew.

²⁹ U Trai u long jngai na u bymman: hynrei, u sngew ïa ka jingduwai u bahok.

³⁰ Ka jingshai jong ki khmat ka pynkmen ïa ka dohnud: bad ki jingbna ki babha ki pynsngaid ïa ki shyieng.

³¹ Ka shkor kaba sngap ïa ka jingsneng jong ka jingim kan ïaineh hapdeng ki bastad.

³² Uba kyntait ïa ka jinghikai u ñiewbeiñ ïa la ka jong ka mynsiem: hynrei, uba sngap ïa ka jingsneng u ïoh ïa ka jingshemphang.

³³ Ka jingsheptieng ïa U Trai ka long ka jinghikai ka jingstad; bad ha shuwa ka burom ka leit ka jingsngewrit.