PROBERB 14 - KA BAIBL

¹ Ka briew ka bastad baroh ka tei ïa la ka ïing: hynrei, ka babieit ka lied noh ïa ka da la ki jong ki kti.

² Uta uba ïaid ha la ka jingbeit u sheptieng ïa U Trai: hynrei, uta uba mutlop ha la ki lynti u ñiewbeiñ ïa u.

³ Ha ka shyntur jong u babieit don u dieng ka jingsarong: hynrei, ki rmiang shyntur jong ki bastad kin ri kyndong ïa ki.

⁴ Ha ka bymdon ki masi dab, ka shyngoid ka khuid: hynrei, ka jingmih shibun ka don da ka bor u masi dab.

⁵ U sakhi uba shisha un ym lamler: hynrei, u sakhi uba lamler u kren ïa ki jinglamler.

⁶ U nongrkhiebeiñ u wad ïa ka jingstad, te um shem: hynrei, ka jingtip ka long kaba jem ïa uba don ka jingshemphang.

⁷ Khie leit ha khmat u briew u babieit, te men ym ïohi ha u ïa ki rmiang shyntur ka jingtip.

⁸ Ka jingstad jong u basian ka long ban sngewthuh ïa la ka lynti: hynrei, ka jingbieit jong ki babieit ka long ka jingshukor.

⁹ Ki babieit ki rkhiebeiñ ïa ka jingrem: hynrei, hapdeng kiba beit don ka jingmonbha.

¹⁰ Ka dohnud ka tip ïa la ka jong ka jingkthang; bad u nongwei um khleh ha ka jingkmen jong ka.

¹¹ Ïa ka ïing jong u bymman yn pynkyllon: hynrei, ka ïingjaiñ jong uba beit, kan phuh.

¹² Don ka lynti kaba i kumba ka beit ïa u briew, hynrei, ka bakut jong ka, long ki lynti ka jingïap.

¹³ Wat ha kaba rkhie ka dohnud ka sngewsih; bad ka bakut ka jingkmen ka long ka jingsngewkhia.

¹⁴ Uba kylla dien ha ka dohnud yn pyndap ïa u da la ki jong ki lynti: bad ïa u briew u babha yn pynkdang na u hi.

¹⁵ U babieit u shu ngeit ïa ka ktien baroh: hynrei, u briew u basian u khmih bha ïa la ka jingleit.

¹⁶ U briew u bastad u sheptieng, bad u kynriah na ka basniew: hynrei, u babieit u leh meng, bad u shngain.

¹⁷ Uta uba bitar shen, un leh bieit: bad ïa u briew u basniew ki jingpyrkhat, la isih.

¹⁸ Ki babieit ki ïoh kynti ïa ka jingbieit: hynrei, ïa u basian yn pynphong pansngiat da ka jingtip.

¹⁹ U basniew u nguh ha khmat u babha; bad u bymman ha ki khyrdop jong u bahok.

²⁰ Ïa u baduk la isih wat da la u jong u paramarjan: hynrei, u bariewspah u don bun ki lok.

²¹ Uta uba ñiewbeiñ ïa la u paramarjan u leh pop: hynrei, uba isynei ïa u baduk, suk uta keiñ.

²² Hato kita kim bakla kiba pyrkhat ïa ka basniew? hynrei, ka jingisynei bad ka jingshisha kin long ïa kita kiba pyrkhat ïa ka babha.

²³ Ha ka jingtrei minot baroh don ka jingmyntoi: hynrei, ka jingkren ki rmiang shyntur ka lam tang ha ka jingkyrduh.

²⁴ Ka pansngiat jong ki bastad long ka spah jong ki: hynrei, ka jingbieit jong ki babieit ka long tang ka jingbieit.

²⁵ U sakhi uba shisha u pyllait ïa ki mynsiem: hynrei, uta uba kren ïa ki jinglamler u pynlong ka jingshukor.

²⁶ Ha ka jingsheptieng ïa U Trai don ka jingshaniah kaba khraw; bad ki khun jong u kin ïoh ïa ka jaka rieh.

²⁷ Ka jingsheptieng ïa U Trai ka long ka pukri ka jingim, ïa ka ban kynriah na ki jingriam ka jingïap.

²⁸ Ha kaba bun paid ka long ka burom u syiem: hynrei, ha kaba kyrduh briew ka long ka jingjot u nongïalam.

²⁹ Uta uba tud ban bitar u don ka jingshemphang kaba khraw: hynrei, uta uba jyndong la ka mynsiem u kyntiew ïa ka jingbieit.

³⁰ Ka dohnud kaba khiah ka long jingim ïa ka doh: hynrei, ka jingbishni ka pynpyut ïa ki shyieng.

³¹ Uta uba banbeiñ ïa u baduk u pynlehrain ïa la U Nongthaw: hynrei, uba isynei ïa u bakyrduh u pyndonburom ïa U.

³² Ïa u bymman la khynñiat pynkyllon ha la ka jinglehsniew: hynrei, u bahok u don ka jingkyrmen ha la ka jingïap.

³³ Ka jingstad ka shong ha ka dohnud uta uba don ka jingshemphang: hynrei, ïa kata kaba ha ka kpoh ki babieit, la ju pynpaw.

³⁴ Ka hok ka pynkyntiew ïa ka jaid bynriew: hynrei, ka pop ka long ka jinglehrain ïa kano kano ka kynja bynriew.

³⁵ Ka jingsngewbha u syiem ka don sha uta u shakri uba leh stad: hynrei, ka jingbitar jong u kan long ïa uba pynlehrain.