PROBERB 13 - KA BAIBL

¹ U khun u bastad u sngap ïa ka jinghikai u kpa jong u: hynrei, u nongrkhiebeiñ um sngap ïa ka jingsneng.

² U briew un bam ïa ka babha na u soh ka shyntur jong u: hynrei, ka mynsiem u nongshetkylla kan bam ïa ka jingleh-jubor.

³ Uta uba sumar ïa la ka shyntur u ri ïa la ka jingim: hynrei, uba plie wang ïa la ki rmiang shyntur un ïoh ka jingjot.

⁴ Ka mynsiem jong uba alhia ka ikwah, te kam ïoh ei ei: hynrei, ïa ka mynsiem jong uba minot yn pynsngaid.

⁵ U briew u bahok u isih ïa kaba lamler: hynrei, u briew bymman u long uba isih, bad un poi sha kaba lehrain.

⁶ Ka hok ka sumar ïa uta uba beit ha la ka lynti: hynrei, ka jingbymman ka pynkyllon ïa u nongpop.

⁷ Don kiba leh riewspah ïa lade, hynrei, kim don ei ei: don kiba leh duk ïa lade, hynrei, ki don ka spah kaba khraw.

⁸ Ka jingsiewspah ka jingim u briew long ka spah jong u: hynrei, u baduk um ju ïohsngew ïa ka jingbyrngem.

⁹ Ka jingshai u bahok ka shadkmen: hynrei, ïa ka sharak jong u bymman yn pynlip noh.

¹⁰ Da ka jingsarong ka wan tang ka jingïaleh: hynrei, bad uba pyrkhat bha ka jingstad ka don.

¹¹ Ïa ka spah ba la ïoh da ka jingthala, yn pynduna: hynrei, uta uba lum da ka jingtrei minot, un ïoh ka jingroi.

¹² Ka jingkyrmen ba la pyntud ka pynpang ïa ka dohnud: hynrei, haba ka jingkwah ka la poi ka long u dieng ka jingim.

¹³ Jar uba ñiewbeiñ ïa kata ka ktien, u wallam ka jingjot halor lade: hynrei, uba sheptieng ïa ka hukum un ïoh ka bainong.

¹⁴ Ka aiñ jong u bahok ka long ka pukri ka jingim, ïa ka ban kynriah na ki jingriam ka jingïap.

¹⁵ Ka jingshemphang ka babha ka pynïoh ka jingisynei: hynrei, ka lynti u nongshetkylla ka long kaba sohkhroh.

¹⁶ U briew u basian baroh u trei da ka jingtip: hynrei, u babieit u thad ïa ka jingbieit.

¹⁷ U nonglam-ktien uba bymman u hap ha ka jingsniew: hynrei, u nonglam-ktien uba ngeit u long ka jingkhiah.

¹⁸ Ka jingkyrduh bad ka jinglehrain kan long ïa uba kyntait ïa ka jingsneng: hynrei, uba ñiewkor ïa ka jingsneng yn pyndonburom ïa u.

¹⁹ Ka jingkwah ba la pyndep, ka long thiang ïa ka mynsiem: hynrei, ka long ka jingijli ïa ki babieit ban kynriah na ka basniew.

²⁰ To ïaid bad ki briew ki bastad, to men long u bastad: hynrei, u lok jong ki babieit, un jynjar.

²¹ Ka jingsniew ka beh nadien ki bapop: hynrei, ïa u bahok, yn ai nong da ka babha.

²² U briew u babha un iehnoh sah ïa ka bynta pateng ha ki khun ki khun jong u; bad ïa ka spah jong u nongpop la tyngkai ïa u bahok.

²³ Don shibun ka jingbam ha ka lyngkha ba la puh jong u baduk: hynrei, don ruh kaba la pynjot namar ka jingbymhok.

²⁴ Uta u bympyndonkam ïa la u dieng sympat, u shun ïa la u khun: hynrei, uta uba ieit ïa u, u sneng sympat ïa u haba u dang khynnah.

²⁵ U bahok u bam haduh ba la kdang ka mynsiem jong u: hynrei, ka kpoh jong u bymman kan kyrduh.