PROBERB 12 - KA BAIBL

¹ Jar uba ieit ïa ka jingsneng u ieit ïa ka jingtip: hynrei, uba isih ïa ka jingsneng sympat u long u kynja mrad.

² U briew u babha un ïoh isynei na U Trai: hynrei, ïa u briew uba don ki buit bymman un pynrem.

³ Ïa u briew yn ym pynskhem da ka jingbymman: hynrei, ïa u thied jong u bahok yn ym pynkhih lano lano ruh.

⁴ Ka briew kaba shida ka long ka pansngiat ïa la u tnga: hynrei, kaba pynlehrain ka long ka jingpyut ha ki shyieng jong u.

⁵ Ki jingmut jong u bahok ki long hok: hynrei, ki jingpyrkhat jong u bymman ki long ka jingshukor.

⁶ Ki ktien jong u bymman ki long shaphang kaba thap ban ïoh snam: hynrei, ka shyntur jong uba beit kan pyllait ïa ki.

⁷ Ïa ki bymman la pynkyllon, te kim don shuh: hynrei, ka ïing jong u bahok kan ïeng.

⁸ Ïa u briew yn ïaroh katba kum ka jingstad jong u: hynrei, ïa uba mutlop ka dohnud, yn ñiewbeiñ.

⁹ Lah uta ïa uba la ñiew sting bad uba don u shakri, ban ïa uba pyndonburom ïa lade, bad u kyrduh kpu.

¹⁰ U bahok u sumar ïa ka jingim u mrad jong u: hynrei, ki jingisynei ki bajem jong u bymman ki long kiba dom.

¹¹ Uta uba lur ïa la ka khyndew un ïoh pahuh u kpu: hynrei, uba bud ïa ki 'riewthala u suda ka jingshemphang.

¹² U bymman u ikwah ïa ka jar jong ki briew ki basniew: hynrei, u thied jong u bahok u pynmih soh.

¹³ Ha ka jingpalat ki rmiang shyntur ka don ka jingriam ïa u basniew: hynrei, u bahok un mih noh na ka jingshitom.

¹⁴ Ïa u briew yn pynhun da ka jingbha da u soh ka shyntur jong u: bad ïa ki jingleh ki kti u briew yn ai ha u.

¹⁵ Ka lynti jong u babieit ka long kaba beit ha ki khmat jong u hi: hynrei, uta u bastad un sngap ïa ka jingpyni.

¹⁶ Ïa ka jingsngewsih jong u babieit la ithuh kumne kumne ruh: hynrei, u briew u basian u buhrieh ïa ka jinglehrain.

¹⁷ Uta uba kren ïa ka jingshisha u pynpaw ïa ka hok, hynrei, u sakhi lamler ïa ka jingshukor.

¹⁸ Don kiba kren thurmur kum ki jingdung ka wait: hynrei, u thylliej jong u bastad u long ka jingkhiah.

¹⁹ Ïa ka rmiang shyntur ka jingshisha yn pynskhem junom: hynrei, u thylliej uba lamler u long tang shi khyllipmat.

²⁰ Ka jingshukor ka don ha ka dohnud jong kiba pun ïa ka jingsniew: hynrei, ïa ki nongpyrkhat ïa ka jingsuk ka don ka jingkmen.

²¹ Yn ym don ka jingpynsniew ei ei ka ban jia ïa u bahok: hynrei, ïa u bymman yn pyndap da ka jingsniew.

²² Ki rmiang shyntur kiba lamler ki long ka jingijli ha U Trai: hynrei, kita kiba leh hok ki long ka jingsngewbha jong u.

²³ U briew u basian u buhrieh ïa ka jingtip: hynrei, ka dohnud ki babieit ka pynbna ïa ka jingbieit.

²⁴ Ka kti jong uba minot kan synshar: hynrei, ïa uba jaipdeh yn buh ha ka kam kaba shitom.

²⁵ Ka jingkhia ha ka dohnud u briew ka pyn'dor ryngkhung ïa ka; hynrei, ka ktien ka babha ka pynkmen ïa ka.

²⁶ U bahok u long u nongïalam ïa la u paramarjan: hynrei, ka lynti u bymman ka pynbakla ïa ki.

²⁷ U briew uba alhia um ju syang ïa kata kaba u ïoh na kaba beh mrad: hynrei, ka spah kaba kordor ki briew ka long ïa uba minot.

²⁸ Ha ka lynti ka hok ka jingim ka long; bad ha ka lynti ïaid jong ka, ka jingïap kam don.