PROBERB 11 - KA BAIBL

¹ Ka tarajur kaba shukor ka long ka jingijli ïa U Trai: hynrei, ka jingthew ka bahok ka long ka jingsngewbha jong u.

² Haba wan ka jingsarong, ka wan ruh ka jinglehrain: hynrei, bad uba sngewrit ka don ka jingstad.

³ Ka jinghok jong kiba beit kan ïalam ïa ki: hynrei, ka jingmutlop jong kiba shetkylla kan pynjot ïa ki.

⁴ Ki spah kim pynmyntoi ha ka sngi ka jingbitar: hynrei, ka hok ka pyllait na ka jingïap.

⁵ Ka hok jong u bajanai kan ïalam ïa ka lynti jong u: hynrei, u bymman un kyllon da la ka jong ka jingbymman.

⁶ Ka hok jong kiba beit kan pyllait ïa ki: hynrei, ïa kita kiba shetkylla yn pynngat ha la ka jong ka jingpynsniew.

⁷ Haba u briew bymman u ïap, ka jingkhmih lynti jong u kan duh noh: bad ka jingkyrmen ka jingleh bymhok ka duh noh.

⁸ Ïa u bahok la pyllait na ka jingshitom, bad u bymman u wan ha ka jaka jong u.

⁹ Da la ka shyntur, uba khlem blei u pynjot ïa la u paramarjan: hynrei, da ka jingtip, ïa u bahok yn pyllait noh.

¹⁰ Haba u bahok u man bha, ka shnong ka leh kmen: bad haba u bymman u duh noh, ka jingrisa ka don.

¹¹ Da ka jingkyrkhu jong uba beit ïa ka shnong la pynkyntiew: hynrei, la pynkyllon ïa ka da ka shyntur u bymman.

¹² Uta uba ñiewbeiñ ïa la u paramarjan u long uba suda ka jingstad: hynrei, u briew uba shemphang u sngap jar.

¹³ Uta uba par kylleng kum u nongkrensiar u pynpaw ïa ki ktien rieh: hynrei, uta uba don ka mynsiem kaba shaniah u buhrieh ïa ka kam.

¹⁴ Ha ka bymdon ka jingïalam ka bastad u paidbah u kyllon: hynrei, ha ka jingbun ki nongpyrkhat ka jingskhem ka don.

¹⁵ Uta uba bahjamin ïa u nongwei un jynjar namar kata: hynrei, uba isih ïa kaba bahjamin, u skhem.

¹⁶ Ka kynthei kaba shida ka bat ïa ka burom: bad u briew uba leh bor u bat ïa ka spah.

¹⁷ U briew uba isynei u leh bha ïa la ka jong ka mynsiem: hynrei, uta uba dom u pynshitom ïa la ka jong ka doh.

¹⁸ U bymman u ïoh ïa ka bainong kaba shukor: hynrei, uta uba bet ïa ka hok u ïoh ka nong kaba skhem.

¹⁹ Uta uba neh ha ka hok un kot sha ka jingim: bad uta uba beh ïa ka basniew u leh ïa kata sha la ka jong ka jingïap.

²⁰ Kita kiba mutlop ha la ka dohnud ki long ka jingijli ïa U Trai: hynrei, jar kiba janai ha la ka lynti ki long ka jingsngewbha jong u.

²¹ La ki ïabat para kti, u bymman un ym lait na ka jingpynshitom: hynrei, ïa u symbai jong u bahok, yn pyllait.

²² Kum ka jingdeng ksiar ha ka khmut ka sniang, kumta long ka kynthei babhabriew kaba khlem jingpyrkhat.

²³ Ka jingkwah jong u bahok ka long ka babha suda: hynrei, ka jingkhmih lynti jong u bymman ka long ka jingbitar.

²⁴ Don uba pynsaphred, bad u nang kham roi kham roi: don ruh uba bat kham bun ban ïa kaba dei, hynrei, ka lam tang sha kaba kyrduh.

²⁵ Ïa ka mynsiem kaba kylluid yn pynsngaid: bad uta uba ai um, ïa u hi ruh yn ai um.

²⁶ Uta uba bat ïa u Kew, ki briew kin tim ïa u: hynrei, ka jingkyrkhu kan long halor ka khlieh jong uba die ïa u.

²⁷ Uta uba wad biang biang ïa ka jingbha u wad ïa ka jingmonbha: hynrei, uba wad ïa ka jingpynsniew, kan wan ha u.

²⁸ Uta uba shaniah ha la ka spah, un kyllon: hynrei, u bahok un roi kum ka sla ka bajyrngam.

²⁹ Uta uba pynshitom ïa la ka jong ka ïing un ïoh kynti ïa ka lyer: bad u babieit un long shakri ïa u bastad dohnud.

³⁰ U soh jong u bahok u long u dieng ka jingim; bad uta u bastad u pynngat ïa ki mynsiem.

³¹ Ha khmih, ïa u bahok yn ai nong ha ka khyndew: sa katno tam lei lei ïa u bymman bad ïa u nongpop.