PROBERB 10 - KA BAIBL

Ki jinghikai shaphang ki jingleh babha bad ki jingleh basniew

¹ Ki Proberb u Solomon. U khun u bastad u pynlong u kpa uba kmen: hynrei, u khun u babieit u long ka jingkhia ïa la ka kmie.

² Ki jingkynshew ka jingbymman kim pynmyntoi ei ei: hynrei, ka hok ka pyllait na ka jingïap.

³ U Trai un ym shah ïa ka mynsiem jong u bahok ban thngan: hynrei, u shop noh ïa ka jingkwah jong u bymman.

⁴ U kylla duk uta uba trei da ka kti kaba alhia; hynrei, ka kti uba trei minot ka pynriewspah.

⁵ Uta uba lum mynlyiur u long u khun u bastad: hynrei, uta uba ïohthiah ha ka aïom ot u long u khun uba pynlehrain.

⁶ Ki jingkyrkhu ki don ha ka khlieh jong u bahok: hynrei, ka jingleh-jubor ka tap ïa ka shyntur jong u bymman.

⁷ Ka jingkynmaw ïa u bahok ka long ba la kyrkhu: hynrei, ka kyrteng jong u bymman kan pyut noh.

⁸ U bastad ha ka dohnud un pdiang ïa ki hukum: hynrei, u riewbieit blab blab un kyllon.

⁹ Uta uba ïaid beit u ïaid skhem: hynrei, uta uba pyndor ïa la ki lynti yn ithuh ïa u.

¹⁰ Uta uba khapbrip da la ka khmat u pynlong ka jingsngewsih: hynrei, u riewbieit blab blab un kyllon.

¹¹ Ka shyntur u bahok ka long ka pukri ka jingim; hynrei, ka jingleh-jubor ka tap ïa ka shyntur jong u bymman.

¹² Ka jingshun ka pynkynroi ïa ki jingïakajia: hynrei, ka jingieit ka tap ïa ki jingryngkang baroh.

¹³ Ha ki rmiang shyntur jong uba don ka jingsngewthuh ju shem ka jingstad: hynrei, u dieng sympat u don ïa ka ingdong jong uba suda ka jingshemphang.

¹⁴ Ki briew ki bastad ki kynshew ïa ka jingtip: hynrei, ka shyntur jong u ba-bieit ka long ka jingpynjot kaba hajan.

¹⁵ Ka spah jong u bariewspah ka long ka shnong kaba skhem jong u: ka jingpynjot jong ki baduk long ka jingkyrduh jong ki.

¹⁶ Ka jingtrei jong u bahok ka lam sha ka jingim; ka jingmih jong u bymman sha ka pop.

¹⁷ U long ha ka lynti ka jingim jar uba sngap ïa ka jingsneng; hynrei, uta uba lyndet ïa ka jingsneng, u bakla.

¹⁸ Uta uba buhrieh ïa ka jingshun u don ki rmiang shyntur kiba lamler; bad uta uba kren siar u long u babieit.

¹⁹ Ha ka jingbun ki ktien ym ju duh ka jingryngkang: hynrei, uta uba khang ïa la ki rmiang shyntur u leh stad.

²⁰ U thylliej jong u bahok u long kum ka rupa ba la kynsai: ka dohnud jong u bymman ka donkam tang khyndiat.

²¹ Ki rmiang shyntur jong u bahok ki bsa ïa kiba bun: hynrei u babieit u ïap namar ba kyrduh jingshemphang.

²² Ka jingkyrkhu U Trai ka pynriewspah, bad um pynlang ka jingsngewsih bad ka.

²³ Ka long kum ka jingleh sngewbha ïa u babieit ban leh bymman: bad kumta long ka jingstad ïa u briew u bashemphang.

²⁴ Ka jingsheptieng jong u bymman, kan wan ngat ha u: bad ïa ka jingkwah jong u bahok, yn ai.

²⁵ Haba ka lyer langthari ka ïaid, u bymman um don shuh: hynrei, u bahok u long ka nongrim kaba junom.

²⁶ Kum ka sirka ïa ki bniat, bad kum ka tdem ïa ki khmat, kumta long uba jaipdeh ïa kita kiba phah ïa u.

²⁷ Ka jingsheptieng ïa U Trai ka pynslem ïa ki sngi: hynrei, ïa ki snem jong u bymman yn pynlyngkot.

²⁸ Ka jingkyrmen jong u bahok kan long ka jingkmen: hynrei, ka jingkhmih lynti jong u bymman kan duh noh.

²⁹ Ka lynti U Trai ka long ka kut kaba skhem ïa uba beit; hynrei, ka long ka jingpynjot ïa ki nongkam ïa ka bymhok.

³⁰ Ïa u bahok yn ym pynkhih lano lano ruh: hynrei, u bymman un ym ïoh shong ha ka ri.

³¹ Ka shyntur u bahok ka pynmih ïa ka jingstad: hynrei, ïa u thylliej uba mutlop yn ot noh.

³² Ki rmiang shyntur jong u bahok ki tip kaei ka ban pdiang hun; hynrei, ka shyntur u bymman ka kren ïa ka jingmutlop.