PROBERB 1 - KA BAIBL

Ka jingpyndonkam ïa ki proberb

¹ Ki proberb u Solomon u khun u Dabid, u syiem ki Israel:

² ïa ka ban tip ïa ka jingstad bad ka jinghikai; ban shemphang ïa ki ktien ka jingsngewthuh;

³ ban pdiang ïa ka jinghikai ha ka jingleh sian, ha ka hok bad ka jingbishar bad ka jingbeit;

⁴ ban ai ka jingsian ha uba shida, bad ha u samla ka jingtip bad ka jingpyrkhat:

⁵ ba u riewstad un ïohsngew, bad ba un roi ha ka jinghikai; bad ba uta uba shemphang un kot sha ki jingpyrkhat ba shongnia:

⁶ ban sngewthuh ïa ka proberb, bad ïa ka pharshi; ïa ki ktien jong ki riewstad, bad ïa ki phawar jong ki.

⁷ Ka jingsheptieng ïa U Trai ka long ka jingsdang ka jingtip: hynrei, ki babieit ki ñiewbeiñ ïa ka jingstad bad ka jinghikai.

Ka jingsneng bad ka jingmaham

⁸ Ko khun, to sngap ïa ka jinghikai u kpa jong me, bad wat lyndet ïa ka hukum ka kmie jong me:

⁹ naba kin long ka pansngiat ka burom ïa ka khlieh jong me, bad ki kynjri baroh sawdong ka ryndang jong me.

¹⁰ Ko khun, lada ki bapop ki pynshoi ïa me, me wat kohnguh.

¹¹ Lada ki ong, “Ale bad ngi, to ngin ïathap ban ïoh snam, to ngin ïa-ap ïa uba lui lui khlem daw;

¹² to ngin nguid im kum ka jingtep ïa ki, bad tylli, kum kita kiba hiar sha ka thliew;

¹³ ngin ïoh ïa ka spah kaba kordor baroh, ngin pyndap ïa la ki ïing da ka jinglute;

¹⁴ men ïoh noh ïa la ka bynta hapdeng jong ngi; ngi baroh ngin ïoh tang uwei u 'saipan:”

¹⁵ ko khun, me wat ïaid ha ka lynti bad ki; to khang ïa la ka kjat na ka lynti ïaid jong ki:

¹⁶ naba ki kjat jong ki, ki phet sha ka basniew, bad ki ïapynkloi noh ban pynmih snam.

¹⁷ Namar kaba lehnohei ban siang jar, ha kaba ïohi ka sim baroh;

¹⁸ bad kine ki shu thap ïa la ka jong ka snam, ki shu ap tuh ïa la ki jong ki mynsiem.

¹⁹ Kumta, ki long ki lynti jong uwei uwei baroh uba khwan ïa ka jingmyntoi; ka pynduh noh ïa ka jingim jong ki trai jong ka.

Ka jingstad ka ud namar ba la ibeiñ ïa ka

²⁰ Ka jingstad ka pyrta jam ha ki lynti shnong; ka pynmih ïa la ka ktien ha ki jaka kylluid;

²¹ ka pyrta ha ka jaka ba kham ïalang u paidbah; ha ka jingkhang ki khyrdop, ha ka nongbah, ka kren ïa la ki ktien:

²² “Slem katno, phi ki babieit, phin ieit ïa ka jingbieit? bad ba ki nongkrenbeiñ kin ïasngewbha ha ka jingkrenbeiñ, bad ba ki babieit runar kin isih ïa ka jingtip?

²³ To phai phi ha ka jingsneng jong nga: ha khmih, ngan theh noh ïa ka mynsiem jong nga: ha phi, ngan pyntip ha phi ïa ki ktien jong nga.

²⁴ Namar nga la khot, bad phim treh; nga la kner ïa la ka kti, bad ym don ba suidñiew;

²⁵ hynrei, phi la ibeiñ ïa ka jingpyrkhat jong nga baroh, bad phim mon satia ïa ka jingsneng jong nga:

²⁶ nga ruh ngan rkhie ha ka jingjynjar jong phi; ngan rkhiebeiñ haba wan lap ka jingsheptieng jong phi;

²⁷ haba wan lap ka jingsheptieng jong phi kum ka 'erïong, bad haba nang wan ka jingjynjar jong phi kum ka lyer langthari; haba ka jingshipa bad ka jingsngewpisa ki ngat halor jong phi.

²⁸ Hangta kin khot kyrpad ha nga, hynrei, ngan ym phai ktien; kin wad biang biang ïa nga, hynrei, kin ym shem ïa nga:

²⁹ namar ba ki la isih ïa ka jingtip, bad ba kim shym la jied ïa ka jingsheptieng ïa U Trai:

³⁰ ba kim mon satia ïa ka jingpyrkhat jong nga; ba ki la ñiewbeiñ ïa ka jingsneng jong nga baroh;

³¹ namar kata, kin ïoh bam ïa u soh la ka jong ka lynti, bad yn pynkdang ïa ki da la ki jong ki buit.

³² Naba ka jingkylla dien jong kiba bieit kan pynïap ïa ki, bad ka jingmanbha jong kiba bieit runar kan pynjot noh ïa ki.

³³ Hynrei, jar uba shahshkor ïa nga un ïoh shong ha kaba suk, bad un ïoh long jai jai khlem sheptieng ïa ka basniew.”