NEHEMAÏAH 9 - KA BAIBL

U Esra u phla ïa ki pop jong ki Israel

¹ Bad ha ka ba-arphew saw sngi na une u bnai, ki khun Israel ki la ïalang da kaba shah jingit, bad kup jaiñ byrni, bad ki da ïasleh khyndew de.

² Bad u symbai Israel u la pynïakhlad ïa lade na ki nongwei baroh, bad u la ïeng bad u la phla ïa la ki pop, bad ïa ki jingleh bymhok ki kpa jong ki.

³ Bad ki la ïaïeng joit ha la ka jaka, bad ki la ïapule ha Ka Kitab Ka Hukum U Trai U Blei jong ki, shi pawa sngi; bad shi pawa pat, ki la ïaphla bad ïamane ïa U Trai U Blei jong ki.

⁴ Ynda kumta, ki la kiew halor ki kyrdon kiba na ki Lebi, u Jeshua, bad u Bani, u Kadmiel, u Shebaniah, u Bunni, u Sherebiah, u Bani bad u Khenani, bad ki la pyrta da ka ktien bajam ha U Trai U Blei jong ki.

⁵ Te ki Lebi, u Jeshua, u Kadmiel, u Bani, u Hashabneïah, bad u Sherebiah, u Hodiah, u Shebaniah, bad u Pethahiah, ki la ong, “To ïeng joit bad kyrkhu ïa U Trai U Blei jong phi na ka bymjukut sha ka bymjukut: bad long ba la kyrkhu ïa ka kyrteng ba-donburom jong me, ïa kaba la kyntiew halor ka jingkyrkhu bad ka jingïaroh baroh.

⁶ “Me long U Trai, tang ma me hi; me la thaw ïa ka bneng, ka bneng jong ki bneng, bad ki paidbah jong ki baroh, ïa ka khyndew bad kiei kiei baroh katba don ha ka, ïa ki duriaw bad baroh katba don ha ki, bad me kyrshan ïa ki baroh; bad u paidbah bneng u mane ïa me.

⁷ Me long U Trai U Blei, uba la jied ïa u Abram, bad me la wallam noh ïa u na ka Ur ki Khaldi, bad me la kyrteng ïa u, ‘u Abraham’:

⁸ bad me la shem ïa ka dohnud jong u kaba ïaineh ha khmat jong me, bad me la thaw jutang bad u, ban ai ka ri ki Kanaan, ki Hit, ki Amor, ki Peris, ki Jebus, ki Girgash, ban ai keiñ ha u symbai jong u, bad me la pyndep ïa la ki ktien; namar me long u bahok.

⁹ “Bad me la ïohi ïa ka jingshitom ki kpa jong ngi ha Ijipt, bad me la ïohsngew ïa ka jinglynñiar jong ki harud ka Duriaw Basaw;

¹⁰ bad me la pyni ïa ki dak phylla bad ki jingphylla halor u Pharaoh, bad halor ki shakri jong u baroh, bad halor ki briew ka ri jong u baroh; namar me la tip ba ki la leh khraw halor ïa ki; bad me la ïoh nam ïa lade, kumba ha kane ka sngi.

¹¹ Bad me la pynkad ïa ka duriaw ha khmat jong ki, ba kumta ki la ïaid lyngba ka duriaw ha ka 'dewrkhiang; bad ïa ki nongbeh jong ki, me la shat ha ki jingjylliew, kum ïa u maw ha ki um bah.

¹² Nalor kane me la ïalam ïa ki ha u rishot lyoh mynsngi; bad ha u rishot ding mynmiet, ban ai jingshai ha ka lynti kaba ki dei ban ïaid.

¹³ Me la hiar halor u lum Sinai ruh, bad me la kren bad ki na bneng, bad me la ai ha ki, ïa ki jingbishar bahok bad ki rukom bashisha, ki aiñ bad ki hukum babha:

¹⁴ bad me la pyntip ha ki, ïa ka Sabbaton bakhuid jong me, bad me la hukum ïa ki hukum ïa ki, bad ki aiñ, bad ka rukom, da ka kti u Moses u shakri jong me:

¹⁵ bad me la ai ïa u kpu na bneng ïa ka jingthngan jong ki, bad me la pynmih ruh ïa ka um ha ki, na u mawsiang ïa ka jingsliang jong ki, bad me la hukum ïa ki, ban leit shapoh ban ïoh ïa ka ri ïa kaba me la rah la ka kti ban ai ïa ki.

¹⁶ “Hynrei, ma ki bad ki kpa jong ngi ki la leh meng, bad ki la pyneh ïa la ka ryndang, bad kim shym la sngap ïa ki hukum jong me,

¹⁷ bad ki la kyrngah ban kohnguh, bad kim shym la kynmaw ïa ki jingphylla kiba me la leh hapdeng jong ki; hynrei, ki la pyneh ïa la ka ryndang, bad ha ka jingïaleh pyrshah jong ki, ki la thung nongïalam ban phai pat sha ka jinglongmraw: hynrei, me long U Blei uba kloi ban map, uba aiei bad uba dap ka jingisynei, uba tud ban bitar, uba kynrei ha ka jingisynei, bad mem shym la kyntait noh ïa ki.

¹⁸ Shisha keiñ, haba ki la thaw ha ki, ïa u khun masi ba la saiñ, bad ki la ong, ‘Une u long U Blei jong me uba la wallam noh ïa me na Ijipt,’ bad ki la pynlong ïa ka jingpankwah bakhraw;

¹⁹ pynban, me ha ki jingisynei babun jaid jong me, mem shym la iehnoh noh ïa ki ha ka ri khlaw: u rishot lyoh um shym la kynriah noh na shaneng jong ki mynsngi, ban ïalam ïa ki ha ka lynti; lymne u rishot ding mynmiet, ban pynshai ïa ki, bad ïa ka lynti kaba ki dei ban ïaid.

²⁰ Me la ai ruh ïa U Mynsiem babha jong me ban hikai ïa ki, bad mem shym la khang noh ïa la ka manna na ki shyntur jong ki, bad me la ai um ha ki, ïa ka jingsliang jong ki.

²¹ Jin sawphew snem keiñ, me la bsa ïa ki ha ri khlaw, bad kim shym la kyrduh ei ei; ki jaiñ jong ki kim shym la man rim, bad ki kjat jong ki kim shym la at.

²² Nalor kane me la ai ki hima bad ki kynja bynriew ha ki, ïa kiba me la sam katba kum ki bynta jong ki: kumta, ki la ïoh ïa ka ri u Sihon, ka ri u syiem ka Heshbon keiñ, bad ka ri u Og u syiem ka Bashan.

²³ Ïa ki khun jong ki ruh me la pynroi kum ki khlur bneng, bad me la ïalam ha kata ka ri, shaphang kaba me la ong ha ki kpa jong ki, ba kin ïoh poi ha ka ban ïoh ïa ka.

²⁴ Kumta, ki khun jong ki, ki la leit shapoh bad ki la ïoh ïa kata ka ri, bad me la pynjop ïa ki trai-shnong kata ka ri, ki Kanaan, ha khmat jong ki, bad me la ai ïa ki ha ka kti jong ki, bad ki syiem jong ki, bad ki kynja bynriew kata ka ri, ba kin leh bad ki katba ki mon.

²⁵ Bad ki la jop ïa ki shnong ba la ker kut, bad ïa ka ri kaba sei soh, bad ki la ïoh ïa ki ïing ba la dap da kiei kiei ki babha, ïa ki pukri ba la tih, ïa ki brisoh Waiñ, ïa ki brisoh Olib, bad ki dieng soh kyrhai: kumta, ki la bam bad ki la kdang, bad ki la man sngaid, bad ki la pynsngewbha ïa lade ha ka jingbha bakhraw jong me.

²⁶ “Pynban, ki la long ki bymkohnguh bad ki la ïaleh pyrshah ïa me, bad ki la bred noh ïa ki hukum jong me shadien ka ingdong jong ki, bad ki la pynïap ïa ki nongïathuhlypa jong me kiba la phla pyrshah ïa ki, ban pynphai pat ïa ki sha me, bad ki la pynlong ïa ka jingpankwah bakhraw.

²⁷ Namar kata, me la ai noh ïa ki ha ka kti ki nongshun jong ki, kiba la pynjynjar ïa ki: bad ha ka por ka jingshipa jong ki, haba ki la lynñiar ha me, me la ïohsngew ïa ki na bneng; bad katba kum ki jingisynei ba bun jaid jong me, me la ai ki nongpynim ïa ki kiba la pynim ïa ki na ki kti ki nongshun jong ki.

²⁸ Hynrei, ynda ki la shongthait, ki la leh sniew pat ha khmat jong me: namar kata, me la iehnoh ïa ki ha ki kti ki nongshun jong ki, kumta, ki la synshar halor jong ki: pynban, haba ki la phai pat, bad ki la lynñiar ha me, me la ïohsngew ïa ki na bneng; bad bunsien me la pyllait ïa ki katba kum ki jingisynei jong me;

²⁹ bad me la phla pyrshah ïa ki, ba me lah ban pynwan pat ïa ki ha ki hukum jong me: pynban, ki la leh meng, bad kim shym la sngap ïa ki hukum jong me, hynrei, ki la leh pop pyrshah ïa ki jingbishar jong me, (kiba lada u briew un leh, un ïoh im ha ki,) bad ki la kynran ïa la ka tyrpeng, bad ki la pyneh ïa la ka ryndang, bad kim shym la sngap.

³⁰ Pynban, bun snem me la shah ïa ki, bad me la phla pyrshah ïa ki da U Mynsiem jong me da ki nongïathuhlypa: pynban, kim shahshkor; namar kata, me la ai noh ïa ki ha ka kti ki kynja bynriew jong kita ki ri.

³¹ Pynban, ha ki jingisynei ba bun jaid jong me, mem shym la pynduh khoit ïa ki, lymne mem shym la kyntait noh ïa ki; namar me long U Blei uba sbun bad uba isynei.

³² “Mynta, namar kata, U Blei jong ngi, uba khraw, uba don bor, bad uba itieng, uba sumar ïa ka jutang bad ïa ka jingisynei, wat ai ba kane ka jingshitom baroh kan i rit ha khmat jong me, kaba la jia ïa ngi, ïa ki syiem jong ngi, ïa ki rangbah jong ngi, bad ïa ki lyngdoh jong ngi, bad ïa ki nongïathuhlypa jong ngi, bad ïa ki kpa jong ngi, bad u paidbah jong me baroh, naduh ki sngi ki syiem ka Assyria haduh kane ka sngi.

³³ La kumta ruh, me long u bahok ha kiei kiei baroh kiba la jia ïa ngi; namar me la leh ïa kaba shisha, hynrei, ngi la leh bymman.

³⁴ Ki syiem jong ngi ruh, ki rangbah jong ngi, ki lyngdoh jong ngi, bad ki kpa jong ngi, kim shym la rakhe ïa ka hukum jong me, lymne sngap ïa ki hukum bad ki jingphla jong me, da kiba me la phla pyrshah ïa ki.

³⁵ Namar kim shym la shakri ïa me ha la ka hima, bad ha ka jingbha bakhraw jong me kaba me la ai ha ki, bad ha ka ri ka bakhraw bad basei soh ïa kaba me la buh ha khmat jong ki, lymne kim shym la phai noh na ki jingleh bymman jong ki.

³⁶ Ha khmih, ngi long ki shakri mynta, bad shaphang kane ka ri ïa kaba me la ai ha ki kpa jong ngi ban bam na u soh jong ka bad na ka jingbha jong ka, ha khmih, ngi long ki shakri ha ka.

³⁷ Bad ka sei soh shibun ha ki syiem kiba me la buh halor jong ngi namar ki pop jong ngi: ki don bor ruh halor ki met jong ngi, bad halor ki jingri jong ngi, katba ki mon, bad ngi long ha ka jingshipa bakhraw.”

Ki paidbah ki pynlong ka jutang ban sumar ïa ka hukum

³⁸ La kumta ruh, pynban, ngi thaw jutang baskhem, bad ngi thoh ïa ka; bad ki rangbah jong ngi, ki Lebi jong ngi, bad ki lyngdoh jong ngi, ki ïashon shab ha ka.