NEHEMAÏAH 8 - KA BAIBLU Esra u pule ïa Ka Kitab Ka Hukum ha u paidbah 1 Bad u paidbah baroh, u la ïalum lang ryntih ha ka madan kaba la don ha khmat ka khyrdop um; bad ki la ong ha u Esra u nongthoh ban wallam ïa Ka Kitab Ka Hukum u Moses, ïa kaba U Trai u la lah hukum ha ki Israel. 2 Bad u Esra lyngdoh u la wallam ïa Ka Hukum ha khmat u paidlang, shynrang bad kynthei, bad baroh kat kiba lah ban sngap da kaba shemphang, ha ka sngi nyngkong u 'nai bahynñiew. 3 Bad u la pule na kata, ha khmat ka madan kaba la don ha khmat Ka Khyrdop Um naduh dang shai haduh shiteng sngi, ha khmat ki shynrang bad ki kynthei, bad kita kiba lah ban shemphang; bad ki shkor u paidbah baroh ki la shah ha Ka Kitab Ka Hukum. 4 Bad u Esra u nongthoh u la ïeng ha ka pulpit dieng, ïa kaba ki la shna khnang ïa kane; bad hajan jong u, u la ïeng u Mattithiah, bad u Shemah, bad u Anaïah, bad u Uriah, bad u Hilkiah, bad u Maaseïah, sha kamon jong u; bad sha kadiang, u Pediah bad u Mishael, bad u Malkhijah, bad u Hashum, bad u Hashbaddanah, bad u Sekharaïah, bad u Meshullam. 5 Bad u Esra u la plie ïa Ka Kitab ha khmat u paidbah baroh; (namar u la long kham hajrong ïa u paidbah baroh;) bad haba u la plie, u paidbah baroh u la ïeng joit; 6 bad u Esra u la kyrkhu ïa U Trai U Blei bakhraw. Bad u paidbah baroh u la ong, “Amen, Amen,” da kaba rah ïa la ki kti: bad ki la dem ïa la ki khlieh, bad ki la mane ïa U Trai la ki khmat sha ka khyndew. 7 U Jeshua ruh, bad u Bani, bad u Sherebiah, u Jamin, u Akkub, u Shabbethai, u Hodiah, u Maaseïah, u Kelita, u Asariah, u Josabad, u Hanan, u Pelaïah, bad ki Lebi, ki la pynsngewthuh ïa Ka Hukum ha u paidbah: bad u paidbah u la ïeng ha la ka jaka. 8 Bad ki la pule shai ha ka kitab ha Ka Hukum U Blei: bad ki la ai ïa ka jingmut, kumta ba ki la sngewthuh ïa ka jingpule. 9 Bad u Nehemaïah, uba la long u Tirshatha, bad u Esra lyngdoh u nongthoh, bad ki Lebi kiba hikai ïa u paidbah, ki la ong ha u paidbah baroh, “Kane ka sngi ka long ka bakyntang ïa U Trai U Blei jong phi; wat sngewsih, lymne ïam.” Namar u paidbah baroh u la ïam, haba ki la ïohsngew ïa ki ktien Ka Hukum. 10 Ynda kumta, u la ong ha ki, “Khie leit, to bam ïa kaba khleiñ, bad dih ïa kaba thiang, bad phah ïa ki bynta ha uta ha uba ym shym la khreh ei ei: namar kane ka sngi, ka long ka bakyntang ha U Trai jong ngi: lymne wat sngewsih; namar ka jingkmen U Trai ka long ka bor jong phi.” 11 Kumta ki Lebi ki la pynjar jar ïa u paidbah baroh, ki ïa-ong, “Sngap jar, namar kane ka sngi, ka long ka bakyntang; bad wat sngewsih.” 12 Bad u paidbah baroh u la leit noh ban bam, bad ban dih, bad ban phah ki bynta, bad ban leh kmen eh, namar ba ki la lah sngewthuh ïa kita ki ktien kiba la pynbna ha ki. 13 Bad ha ka sngi ka ba-ar, ki la ïalum lang ki rangbah ki ïing ki kpa u paidbah baroh, ki lyngdoh, bad ki Lebi, ha u Esra u nongthoh, ban ïoh hikai keiñ ha ki ktien Ka Hukum. 14 Bad ki la shem ba la thoh ha Ka Hukum, kumno ba U Trai u la lah hukum da u Moses, ba ka dei ïa ki khun Israel ban shong ha ki ïingtrep, ha Ka Jingkhawai u bnai u bahynñiew: 15 bad ba ka dei ïa ki, ban pynbna bad ban pyntip ha ki shnong jong ki baroh, bad ha Jerusalem, da kaba ong, “Khie leit sha u lum bad wallam ki tnat dieng Olib, bad ki tnat dieng Olib khlaw, bad ki tnat dieng Myrtl, bad ki tnat dieng Tlai, bad ki tnat dieng khah sla, ban shna ki ïingtrep kumba la thoh.” 16 Kumta, u paidbah u la mih noh, bad u la wallam ïa ki, bad ki la shna ki ïingtrep ïa lade, uwei pa uwei halor ka paki ka ïing jong u, bad ha ki phyllaw jong ki, bad ha ki phyllaw ka ïing U Blei, bad ha ka madan ka khyrdop um, bad ha ka madan ka khyrdop Ephraim. 17 Bad u paidlang jong kita baroh kiba la wan phai pat na ka jingpynwir ki la shna ïa ki ïingtrep, bad ki la shong ha ki ïingtrep: namar naduh ki sngi u Jeshua u khun u Nun haduh kata ka sngi, ki khun Israel kim shym la leh kumta. Bad la don ka jingkmen bakhraw eh. 18 Man la ka sngi ruh, naduh ka sngi nyngkong haduh ka sngi khatduh, u la pule ha Ka Kitab Ka Hukum U Blei. Bad ki la rakhe ïa Ka Jingkhawai, hynñiew sngi; bad ha ka baphra sngi, ka la long ka jingïaseng bakhuid, katba kum ka rukom. |
The Bible Society of India
Bible Society of India