NEHEMAÏAH 6 - KA BAIBL

Ki buit sianti jong ki nongshun

¹ Bad haba la pynbna ha u Sanballat bad u Tobiah, bad ha u Geshem u nong Arab, bad ha kita kiwei pat na ki nongshun jong ngi, ba nga la lah tei ïa ka kynroh, bad ba ym shym la iehnoh ïa kaba lait ha ka; (la haduh kata ka por ngam pat shym la pynïeng ïa ki jingkhang ha ki khyrdop;)

² u Sanballat bad u Geshem ki la phah ha nga, ki ïa-ong, “Ale, to ngin ïashem ha kawei na ki nongrit ha ka pyntha Ono.” Hynrei, ki la thmu ban pynmynsaw ïa nga.

³ Bad nga la phah ïa ki nonglam-ktien ha ki, nga da ong, “Nga dang trei ïa ka kam kaba khraw, namar kata ngam lah ban wan hiar: balei kan pep ka kam, katba nga iehnoh ïa ka, bad ngan wan sha phi?”

⁴ Bad ki la phah kumne sha nga saw sien; bad nga la phai ktien ïa ki kumjuh hi.

⁵ Ynda kumta, u Sanballat u la phah ïa la u shakri sha nga kumjuh hi ka basan sien bad ka shithi khlem bon ha ka kti jong u;

⁶ ha kaba la thoh, “La bna hapdeng ki jaid bynriew, bad u Gashmu u ong ïa kata, ba ma me bad ki Jiw phi thmu ban ïaleh pyrshah; ba namar kata me tei ïa ka kynroh: bad ba me kwah ban long u syiem jong ki, katba kum kine ki ktien.

⁷ Bad ba me thung ïa ki nongïathuhlypa ban ïathuhkhana shaphang jong me ha Jerusalem, ki ïa-ong, ‘Don u syiem ha Judah’: bad mynta yn pynbna ha u syiem katba kum kine ki ktien. Ale te namar kata, ngin ïapyrkhat lang.”

⁸ Ynda kumta, nga la phah ha u, nga da ong, “Ym shym la leh ei ei ruh kum kita kiba me ong, hynrei, me shu thaw ïa ki na ka dohnud jong me hi.”

⁹ Namar, ki baroh, ki la kwah ban pynsheptieng ïa ngi, ki ïa-ong, “Yn pyntlot bor ïa ki kti jong ki na kata ka kam, ba yn ym pyndep ïa ka.” “Hynrei, mynta, A U Blei, pynshaitbor ma me ïa ki kti jong nga.”

¹⁰ Bad nga la leit ha ka ïing u Shemaïah u khun u Delaïah u khun u Mehetabel, uba la khang khop ïa lade; bad u la ong, “To ngin ïashem ha ka ïing U Blei, hapoh ka templ, bad ngin khang ïa ka jingkhang ka templ: namar kin wan ban pynïap ïa me; shisha keiñ, ha kaba mynmiet kin wan ban pynïap ïa me.”

¹¹ Bad nga la ong, “Hato dei u briew uba kat nga u ban phet ïap noh? bad don mano uba kat nga, u ban leit ha ka templ ïa ka ban ri pynim ïa lade? Ngan ym leit bsut.”

¹² Bad nga la sngewthuh, bad, ha khmih, U Blei um shym la phah ïa u: hynrei, u la kren ïa kane ka jingïathuhlypa pyrshah ïa nga: bad u Tobiah bad u Sanballat ki la wer nong ïa u.

¹³ Na ka bynta kane keiñ, ki la wer ïa u, ba ngan dup sheptieng, bad ba ngan leh kumta, bad ba ngan leh pop, ba kin ïoh daw ban pynbna nam basniew, ba ki lah ban rkhiebeiñ ïa nga.

¹⁴ “Kynmaw, A U Blei jong nga, ïa u Tobiah bad ïa u Sanballat katba kum kine ki kam jong ki, bad ïa ka Noadiah ka nongïathuhlypa, bad ïa kita kiwei pat ki nongïathuhlypa kiba la kwah ban pynsheptieng ïa nga.”

¹⁵ Kumta, la pyndep ïa ka kynroh ha ka ba-arphew san sngi u 'nai Elul, ha ki sanphew ar sngi.

¹⁶ Bad haba ki nongshun jong ngi baroh, ki la ïohsngew ïa kata, ki Jentil baroh kiba sawdong ïa ngi, ki la tieng, bad ki la sngewjew liaw eh ha lade: namar ki la sngewthuh ba la leh ïa kane ka kam da U Blei jong ngi.

¹⁷ Nalor kane ruh, ha kita ki sngi, ki bakhraw batri ki Judah ki la phah bun ki shithi ha u Tobiah, bad ki shithi u Tobiah ki la poi sha ki.

¹⁸ Namar don bun ha Judah kiba ha ka jingïasylla bad u, namar u la long u pyrsa kurim u Shekaniah u khun u Arah; bad u khun jong u, u Jehohanan u la shongkurim ïa ka khun u Meshullam u khun u Berekhaïah.

¹⁹ Ki la kren ruh de shaphang ki jingleh babha jong u ha khmat jong nga, bad ki la ïathuh ïa ki ktien jong nga ha u. Bad u Tobiah u la phah shithi ban pynsheptieng ïa nga.