NEHEMAÏAH 4 - KA BAIBL

Ki nongtrei ki kieng atiar pyrshah ïa ki nongshun

¹ Hynrei, haba u Sanballat u la ïohsngew ba ngi la ïatei ïa ka kynroh, u la sngewbitar, bad u la ing khait, bad u la krenbeiñ ïa ki Jiw.

² Bad u la kren ha khmat la ki para bad ïa ka kynhun shipai Samaria, bad u la ong, “Kine ki Jiw ba khlem bor ki leh aïu? Kin ker kut ïa lade? Kin kñia? Kin pyndep ha kawei ka sngi? Kin khyllie pat ïa ki maw na kine ki lymbher tait, haba ki la ing ruh?”

³ Bad u Tobiah u nong Ammon u la don hajan jong u, bad u la ong, “Wat ïa kata kaba ki tei, lada u ksar un kiew, un pyntwa noh ïa ka kynroh maw jong ki.”

⁴ “To sngew, A U Blei jong ngi, namar la ibeiñ ïa ngi; pynphai pat ïa ka jingkrenbeiñ jong ki halor ka khlieh jong ki hi, bad aiti noh ïa ki kum ka jinglute ha ka ri ka jingpynwir:

⁵ bad wat tap noh ïa ki jingleh bymhok jong ki, bad wat ai ba yn pyndam noh ïa ki pop jong ki na khmat jong me: namar ki la pynkhih bitar ïa me ha khmat ki nongtei.”

⁶ Kumta, ngi la tei ïa ka kynroh; bad ïa ka kynroh baroh kawei la pynïadait lang haduh marshiteng ka jingjrong jong ka: namar u paidlang u la ai la ka jingmut ban trei.

⁷ Hynrei, haba u Sanballat, bad u Tobiah, bad ki Arab, bad ki Ammon, bad ki Ashdod, ki la ïohsngew ba la nang shna nang shna ïa ki kynroh Jerusalem, bad ba la sdang ban pyndap ïa ki jingtwa, te ki la sngewshla eh:

⁸ bad baroh ki la ïasylla lang ban wan ïaleh ïa ka Jerusalem, bad ban pynkulmar ïa ka.

⁹ Hynrei, ngi la ïaduwai ha U Blei jong ngi, bad ngi la buh nongap ban ïaleh ïa ki mynsngi bad mynmiet, namar jong ki.

¹⁰ Bad ki Judah ki la ong, “Ka bor ki nongkit jingkit ka la duh, bad dang don shibun ki synrum; kumta ngi ngim lah ban tei ïa ka kynroh.”

¹¹ Bad ki nongïaleh pyrshah jong ngi ki la ong, “Kin ym ïoh tip, lymne kin ym ïohi, tad ynda ngi la poi hapdeng jong ki, bad ngi la pynïap ïa ki, bad ngi la pynpep ïa ka kam.”

¹² Te haba ki Jiw kiba shong marjan ïa ki, ki la poi, ki la ong ha ngi shiphew sien na ki jaka baroh, “Ka dei ba phin phai pat sha ngi.”

¹³ Namar kata, nga la buh ha ki bynta kiba kham tbian ka jaka kaba shadien ka kynroh, ha ki jaka kiba lait, nga la buh ïa u paidlang katba kum ki ïing jong ki bad la ki waitlam, bad la ki sum, bad la ki ryntieh.

¹⁴ Bad nga la khmih, bad nga la ïeng joit, bad nga la ong ha ki bakhraw batri, bad ha ki nongsynshar, bad ha kita kiwei pat na u paidlang, “Wat sheptieng ïa ki: kynmaw ïa U Trai, uba long u bakhraw bad ba-itieng, ban ïaleh na ka bynta la ki para, la ki khun shynrang bad la ki khun kynthei, la ki tnga bad la ki ïing.”

¹⁵ Bad haba ki nongshun jong ngi ki la ïohsngew ba ngi la tip ïa kane, bad ba U Blei u la pyndam noh ïa ka jingsylla jong ki, ngi baroh ngi la leit pat sha ka kynroh, uwei pa uwei ha la ka kam.

¹⁶ Bad naduh kata ka por, marshiteng ki shakri jong nga ki la trei ha kata ka kam, bad marshiteng ki la bat ïa ki sum, ïa ki stieh, bad ïa ki ryntieh, bad ïa ki jingphong nar; bad ki nongsynshar ki la don shadien ka ïing Judah baroh.

¹⁷ Kita kiba tei ïa ka kynroh bad kita kiba kit jingkit ki la pynkit ïa lade, uwei pa uwei da kawei ka kti u la trei ïa ka kam, bad da kawei u la bat la ka atiar;

¹⁸ bad ki nongtei ruh, uwei pa uwei u la kieng ïa la ka waitlam ha la ka krung, bad kumta ki la tei. Bad uta uba put ronsing u la don hajan jong nga.

¹⁹ Bad nga la ong ha ki bakhraw batri, bad ha ki nongsynshar, bad ha kita kiwei pat na u paidlang, “Ka kam ka long ka bakhraw bad kaba bun, bad ngi la saphred halor ka kynroh, jngai uwei na uwei pat:

²⁰ ha kano kano ka jaka phi ïohsngew ïa ka ronsing, ïalang hangta ha ngi; U Blei jong ngi un ïaleh na ka bynta jong ngi.”

²¹ Kumta, ngi la trei ïa ka kam: bad marshiteng ki la bat ïa ki sum naduh kaba shai byrngut haduh kaba mih ki khlur.

²² Nga la ïathuh ruh ha kajuh ka por ha u paidlang, “To uwei pa uwei lem bad la u shakri un thiah miet ha Jerusalem, ba kin ap phira ïa ngi mynmiet, bad ba kin trei mynsngi.”

²³ Kumta, lymne ma nga, lymne ki para jong nga, lymne ki shakri jong nga, lymne ki nongap kiba bud ïa nga, ngim shym la loit noh ïa la ki jaiñ, uwei pa uwei bad la ka atiar u leit sha um.