NEHEMAÏAH 3 - KA BAIBL

Ki kyrteng bad ki bynta jong kita kiba tei ïa ka kynroh

¹ Ynda kumta, u Eliashib u rangbah lyngdoh u la ïeng joit ryngkat bad ki para jong u ki lyngdoh, bad ki la ïatei ïa Ka Khyrdop Langbrot; ki la pynkyntang ïa ka, bad ki la pynïeng ïa ki jingkhang jong ka; jin haduh ka ïing phira Hammeah ki la pynkyntang ïa ka, haduh ka ïing phira Hananel.

² Bad hajan jong u, ki rangbah Jerikho ki la tei. Bad hajan jong ki, u Sakkur u khun u Imri u la tei.

³ Bad ki khun u Hassenaah ki la tei ïa Ka Khyrdop Dohkha; ki la pynshong ïa ki khung jong ka, bad ki la pynïeng ïa ki jingkhang jong ka, ïa ki nar jingkhang jong ka, bad ïa ki dieng-khang jong ka.

⁴ Bad hajan jong ki, u Meremoth u khun u Uriah, u khun u Hakkos, u la shna. Bad hajan jong ki, u Meshullam u khun u Berekhaïah, u khun u Meshesabel, u la shna. Bad hajan jong ki, u Sadok u khun u Baana, u la shna.

⁵ Bad hajan jong ki, ki Tekoi ki la shna: hynrei, ki bakhraw batri jong ki kim shym la buh ïa la ki ryndang ha ka kam u kynrad jong ki.

⁶ Bad u Joïada u khun u Paseah bad u Meshullam u khun u Besodeïah ki la shna ïa ka khyrdop rim; ki la pynshong ïa ki khung jong ka, bad ki la pynïeng ïa ki jingkhang jong ka, bad ïa ki nar jingkhang jong ka, bad ïa ki dieng-khang jong ka.

⁷ Bad hajan jong ki, u Melatiah u nong Gibeon, bad u Jadon u nong Meronoth, ki rangbah Gibeon, bad Mispah, kiba dei ïa ka khet u nongsynshar sha shiliang ka wah, ki la shna.

⁸ Hajan jong u, u la shna u Ussiel u khun u Harhaïah, ki bania. Bad hajan jong u, u Hananiah uwei na ki apothekari, bad ki la shna pynskhem ïa ka Jerusalem haduh ka kynroh rben.

⁹ Bad hajan jong ki, u la shna u Rephaïah u khun u Hur, u nongsynshar jong ka shiteng ka ilaka Jerusalem.

¹⁰ Bad hajan jong ki, u Jedaïah u khun u Harumaph u la shna, marpyrshah ïa la ka ïing. Bad hajan jong u, u la shna u Hattush u khun u Hashabniah.

¹¹ U Malkhijah u khun u Harim, bad u Hasshub u khun u Pahath-moab, ki la shna ïa kawei pat ka bynta, bad ïa ka ïing phira ki pajwa.

¹² Bad hajan jong u, u la shna u Shallum u khun u Hallohesh, u nongsynshar jong ka shiteng ka ilaka Jerusalem, ma u bad ki khun kynthei jong u.

¹³ Ïa Ka Khyrdop Ka Them, u la shna u Hanun, bad ki nong Sanoah, ki la tei ïa ka, bad ki la pynïeng ïa ki jingkhang jong ka, ïa ki nar jingkhang jong ka, bad ïa ki dieng-khang jong ka, bad shi hajar pruh na ka kynroh haduh Ka Khyrdop Synrum.

¹⁴ Bad ïa Ka Khyrdop Synrum, u la shna u Malkhijah u khun u Rekhab, u nongsynshar ka ilaka Beth-hakkerem; u la tei ïa ka, bad u la pynïeng ïa ki jingkhang jong ka, ïa ki nar jingkhang jong ka, bad ïa ki dieng-khang jong ka.

¹⁵ Bad ïa Ka Khyrdop Umpohliew, u la shna u Shallum u khun u Kol-hoseh, u nongsynshar ka ilaka Mispah, u la tei ïa ka, bad u la sop ïa ka, bad u la pynïeng ïa ki jingkhang jong ka, ïa ki nar jingkhang jong ka, bad ïa ki dieng-khang jong ka, bad ïa ka kynroh ka pung Shiloah hajan ka kper syiem, bad haduh ki kyrdon kiba hiar arsut na ka nongbah u Dabid.

¹⁶ Nadien jong u, u la shna u Nehemaïah u khun u Asbuk, u nongsynshar jong ka shiteng ka ilaka ka Beth-sur, haduh kata ka jaka kaba marpyrshah ïa ki jingtep u Dabid, bad haduh kata ka pung ba la shna, bad haduh ka ïing ki rangbah badonbor.

¹⁷ Nadien jong u, ki la shna ki Lebi, u Rehum u khun u Bani. Hajan jong u, u la shna u Hashabiah, u nongsynshar jong ka shiteng ka ilaka Keilah, ïa la ka ilaka.

¹⁸ Nadien jong u, ki para jong ki, ki la shna, u Babbai u khun u Henadad, u nongsynshar jong ka shiteng ka ilaka Keilah.

¹⁹ Bad hajan jong u, u la shna u Eser u khun u Jeshua, u nongsynshar ka Mispah, ïa kawei pat ka bynta, kaba marpyrshah ïa kaba kiew sha ka ïing buh atiar ïapom ha ka pyrkhung ka kynroh.

²⁰ Nadien jong u, u Barukh u khun u Sabbai da kaba sngew-shitrhem u la shna ïa kawei pat ka bynta na ka pyrkhung ka kynroh haduh ka jingkhang ka ïing u Eliashib u rangbah lyngdoh.

²¹ Nadien jong u, u Meremoth u khun u Uriah u khun u Hakkos u la shna ïa kawei pat ka bynta, naduh ka jingkhang u Eliashib haduh ka bakut ka ïing u Eliashib.

²² Bad nadien jong u, ki la shna ki lyngdoh; ki rangbah na Ka Pyntha.

²³ Nadien jong ki, u Benjamin bad u Hasshub ki la shna ïa kaba marpyrshah ïa la ka ïing. Nadien jong ki, u Asaraïah u khun u Maaseïah u khun u Ananiah u la shna hajan la ka ïing.

²⁴ Nadien jong u, u Binnui u khun u Henadad u la shna ïa kawei pat ka bynta, na ka ïing u Asaraïah haduh ka pyrkhung ka kynroh, bad haduh ka dong.

²⁵ U Palal u khun u Usai u la shna marpyrshah ïa ka pyrkhung ka kynroh, bad ïa ka ïing phira kaba pynkha na ka ïingsyiem kaba haneng kaba hajan ka phyllaw ka karod. Nadien jong u, u Pedaïah u khun u Parosh.

²⁶ (Bad ki Nethin ki la shong sah ha Ophel, haduh kata ka jaka kaba marpyrshah Ka Khyrdop Um shaphang mihngi, bad ïa ka ïing phira kaba pynkha.)

²⁷ Nadien jong u, ki Tekoi ki la shna ïa kawei pat ka bynta, kaba marpyrshah ka ïing phira bakhraw kaba pynkha, bad haduh ka kynroh Ophel.

²⁸ Haneng Ka Khyrdop Kulai, ki lyngdoh ki la shna, uwei pa uwei marpyrshah ïa la ka ïing.

²⁹ Nadien jong ki, u Sadok u khun u Immer u la shna marpyrshah ïa la ka ïing. Bad nadien jong u, u la shna u Shemaïah u khun u Shekhaniah, u nongap Ka Khyrdop Mihngi.

³⁰ Bad nadien jong u, ki la shna u Hananiah u khun u Shelemiah, bad u Hanun u khun bahynriew u jong u Salaph, ïa kawei pat ka bynta. Nadien jong u, u Meshullam u khun u Berekhaïah u la shna marpyrshah ïa la ka kamra.

³¹ Nadien jong u, u la shna u Malkhijah uwei na ki bania haduh ka ïing ki Nethin, bad ki jong ki nongkhaïi, marpyrshah ïa Ka Khyrdop Hammiphkad bad haduh kaba kiew ka dong.

³² Bad hapdeng kaba kiew ka dong bad Ka Khyrdop Langbrot, ki bania bad ki nongkhaïi ki la shna.