NEHEMAÏAH 2 - KA BAIBL

La shah ïa u Nehemaïah ban leit sha Jerusalem

¹ Te ha u 'nai Nisan, ha ka snem ka ba-arphew u syiem Artakserksis, haba ka Waiñ ka la don ha khmat jong u, nga la rah ïa ka Waiñ, bad nga la ai ha u syiem. Hynrei, ngam shym la 'matsngewsih ha khmat jong u mynno mynno.

² Bad u syiem u la ong ha nga, “Balei ka khmat jong me ka i 'matsngewsih, haba mem da pang?” Kane kam long ei ei, hynrei, tang ka jingsngewsih ka dohnud. Hangta nga la sheptieng shikatdei eh.

³ Bad nga la ong ha u syiem, “To u syiem un im junom: ka khmat jong nga kan ym i 'matsngewsih balei, haba ka nongbah, ka jaka ki jingtep ki kpa jong nga, ka sah khlaw, bad ba la thang duh ïa ki khyrdop jong ka, da ka ding?”

⁴ Ynda kumta, u syiem u la ong ha nga, “Kaei me kyrpad?” Hangta nga la duwai ha U Blei ka bneng.

⁵ Bad nga la ong ha u syiem, “Lada u syiem u sngewbha, bad lada u shakri jong me u la shem ïa ka jingsngewbha ha khmat jong me, ba men da phah ïa nga sha Judah, ha ka nongbah ki jingtep ki kpa jong nga, ba ngan tei ïa ka.”

⁶ Bad u syiem u la ong ha nga, (ka syiem ruh ka da shong hajan jong u,) “Ka jingleit jong me kan slem katno? Bad lano men phai pat?” Kumta, u syiem u la sngewbha ban phah ïa nga; bad nga la buh ïa u.

⁷ Nalor kane nga la ong ha u syiem, “Lada u syiem u sngewbha, to pynai ki shithi ïa nga ha ki nongsynshar sha shiliang ka wah, ba kin shah ïa nga ban ïaid lait tad ynda nga poi ha Judah;

⁸ bad ïa ka shithi ha u Asaph u nongap ka khlaw syiem, ba un ai ha nga ïa ki dieng ban shna khung ïa ki khyrdop ka ïingsyiem kiba dei ïa kata ka ïing bad ïa ka kynroh ka nongbah, bad ïa ka ïing sha kaba ngan rung.” Bad u syiem u la ai ha nga, katba kum ka kti babha U Blei jong nga kaba halor jong nga.

⁹ Ynda kumta, nga la poi ha ki nongsynshar sha shiliang ka wah, bad nga la ai ha ki, ïa ki shithi u syiem. Bad u syiem u la phah ïa ki rangbah shipai bad ïa ki nongshong kulai ryngkat bad nga.

¹⁰ Bad haba u Sanballat u nong Horon, bad u Tobiah u shakri, u nong Ammon, ki la ïohsngew ïa kata, ka la pynsngewsih ïa ki shikatdei eh, namar ba la wan u briew ban wad ïa ka jingmanbha ki khun Israel.

U Nehemaïah u kyntu ïa ki Jiw ban tei pat ïa ka kynroh

¹¹ Kumta, nga la poi ha Jerusalem, bad nga la don hangta, lai sngi.

¹² Bad nga la khie mynmiet, ma nga bad khyndiat ki briew lem bad nga; bad ngam shym la pyntip ïano ïano ïa kaei ba U Blei jong nga u la buh ha ka dohnud jong nga ban leh ïa ka Jerusalem: bad ym don u kynja mrad lem bad nga, hynrei, tang uta u mrad uba nga la shong halor jong u.

¹³ Bad nga la mih noh mynmiet na Ka Khyrdop Ka Them, shaphang Ka Pukri Ïakjakor, bad sha Ka Khyrdop Synrum, bad nga la khmih bha ïa ki kynroh Jerusalem, kiba la twa, bad ïa ki khyrdop jong ka, ïa kiba la thang da ka ding.

¹⁴ Hadien kata, nga la nang leit sha Ka Khyrdop Umpohliew bad sha ka pung syiem: hynrei, ym lait jaka ïa u mrad ha uba nga shong ban ïaid.

¹⁵ Hadien kata, nga la leit kiew mynmiet narud ka wah duid, bad nga la khmih bha ïa ka kynroh; bad nga la leit phai noh, bad nga la bsut da Ka Khyrdop Ka Them, bad kumta nga la wan phai pat.

¹⁶ Te ki nongsynshar kim shym tip shaei nga la leit, lane kaei nga la leh; lymne ngam pat shym la ïathuh ïa kane ha ki Jiw, lymne ha ki lyngdoh, lymne ha ki bakhraw batri, lymne ha ki nongsynshar, lymne ha kita kiwei kiba trei ïa ka kam.

¹⁷ Ynda kumta, nga la ong ha ki, “Phi ïohi ïa ka jingshitom ha kaba ngi long, kumno ba ka Jerusalem ka sah khlaw, bad ba la thang ïa ki khyrdop jong ka da ka ding: ïa, ngin ïatei noh ïa ka kynroh Jerusalem, ba ngin ym long ka jinglehrain shuh.”

¹⁸ Bad nga la ïathuh ha ki shaphang ka kti U Blei jong nga kaba la long ka babha halor jong nga; bad ïa ki ktien u syiem ruh kiba u la kren ha nga. Bad ki la ong, “Ïa, ngin ïaïeng bad ngin tei.” Kumta, ki la pynshaitbor la ki kti ïa kane ka kam ka babha.

¹⁹ Hynrei, haba u Sanballat u nong Horon, bad u Tobiah u shakri, u nong Ammon, bad u Geshem u nong Arab, ki la ïohsngew ïa kata, ki la rkhiebeiñ ïa ngi, bad ki la ibeiñ ïa ngi, ki la ong ruh, “Kaei kane ba phi leh? Phin ïaleh pyrshah ïa u syiem?”

²⁰ Nga la ïathuh te ha ki, bad nga la ong ha ki, “U Blei ka bneng, ma u, un pynman bha ïa ngi; namar kata, ma ngi ki shakri jong u, ngin ïaïeng bad ngin tei: hynrei, phi, phim don ka bynta, lymne ka hok, lymne ka dak jingkynmaw, ha Jerusalem.”