NEHEMAÏAH 12 - KA BAIBL

Ki lyngdoh bad ki Lebi

¹ Te kine ki long ki lyngdoh bad ki Lebi kiba la leit kiew bad u Serubbabel u khun u Shealtiel, bad u Jeshua: u Seraïah, u Jeremaïah, u Esra;

² u Amariah, u Mallukh, u Hattush;

³ u Shekhanaïah, u Rehum, u Meremoth;

⁴ u Iddo, u Ginnethoi, u Abijah;

⁵ u Mijamin, u Maadiah, u Bilgah;

⁶ u Shemiah, bad u Joïarib, u Jedaïah;

⁷ u Sallu, u Amok, u Hilkiah, u Jedaïah. Kine ki la long ki rangbah jong ki lyngdoh bad ki para jong ki ha ki sngi u Jeshua.

⁸ Ba ki Lebi ruh: u Jeshua, u Binnui, u Kadmiel, u Sherebiah, u Judah, bad u Mattaniah, uba la long halor ka jingïaroh, ma u bad ki para jong u.

⁹ U Bakbukiah bad u Unni ruh, ki para jong ki, ki la long marpyrshah ïa ki ha ki jingap.

¹⁰ Bad u Jeshua u la pynkha ïa u Joïakim, bad u Joïakim u la pynkha ïa u Eliashib, bad u Eliashib u la pynkha ïa u Joïada,

¹¹ bad u Joïada u la pynkha ïa u Jonathan, bad u Jonathan u la pynkha ïa u Jaddua.

¹² Te ha ki sngi u Joïakim, kine ki la long ki lyngdoh, ki rangbah ki ïing ki kpa; na u Seraïah, u Meraïah; na u Jeremaïah, u Hananiah;

¹³ na u Esra, u Meshullam; na u Amariah, u Jehohanan;

¹⁴ na u Mallukhi, u Jonathan; na u Shebaniah, u Joseph;

¹⁵ na u Harim, u Adna; na u Meraïoth, u Helkai;

¹⁶ na u Iddo, u Sekharaïah; na u Ginnethon, u Meshullam;

¹⁷ na u Abijah, u Sikhri; na u Miniamin, na u Moadiah, u Piltai;

¹⁸ na u Bilgah, u Shammua; na u Shemaïah, u Jehonathan;

¹⁹ bad na u Joïarib, u Mattenai; na u Jedaïah, u Ussi;

²⁰ na u Sallai, u Kallai; na u Amok, u Eber;

²¹ na u Hilkiah, u Hashabiah; na u Jedaïah, u Nethanel.

²² Ki Lebi ha ki sngi u Eliashib, u Joïada, bad u Johanan, bad u Jaddua, la thoh ïa ki kum ki rangbah ki ïing ki kpa; ki lyngdoh ruh, haduh ka jingsynshar u Daraïos u nong Persha.

²³ Ïa ki khun u Lebi, ki rangbah ki ïing ki kpa, la thoh ha Ka Kitab Ki Khronikl, wat haduh ki sngi u Johanan u khun u Eliashib.

²⁴ Bad ki rangbah ki Lebi: u Hashabiah, u Sherebiah, bad u Jeshua u khun u Kadmiel, lem bad ki para jong ki, marpyrshah ïa ki, ban ïaroh bad ban ainguh, katba kum ka hukum u Dabid u briew jong U Blei, mar marpyrshah.

²⁵ U Mattaniah, bad u Bakbukiah, u Obadaïah, u Meshullam, u Talmon, u Akkub, ki la long ki nongap kiba ap ha ki ïing kynshew jong ki khyrdop.

²⁶ Kine ki la long ha ki sngi u Joïakim u khun u Jeshua, u khun u Josadak, bad ha ki sngi u Nehemaïah u nongsynshar, bad u Esra lyngdoh uba u nongthoh.

Ka jingpynkyntang ïa ka kynroh Jerusalem

²⁷ Bad ha ka jingpynkyntang ïa ka kynroh Jerusalem, ki la wad ïa ki Lebi na ki jaka jong ki baroh, ban wallam ïa ki sha Jerusalem, ban rakhe ïa ka jingpynkyntang da kaba leh kmen, da ki jingainguh, bad ka jingrwai, bad ki ksing, bad ki nebel, bad ki duitara.

²⁸ Bad ki khun ki nongrwai ki la ïalum lang ïa lade, na ka madan baroh sawdong ka Jerusalem, bad na ki nongrit ki Netophath;

²⁹ na Beth-gilgal ruh, bad na ki lyngkha Geba bad Asmabeth: namar ki nongrwai ki la lah thaw shnong ïa lade baroh sawdong ka Jerusalem.

³⁰ Bad ki lyngdoh bad ki Lebi ki la pynkhuid ïa lade; ki la pynkhuid ïa u paidbah ruh, bad ïa ki khyrdop, bad ïa ka kynroh.

³¹ Te nga la wallam noh ïa ki rangbah Judah halor ka kynroh, bad nga la buh ar kynhun bakhraw kiba la ïaroh bad ïaid ryntih, na kita kawei ka la ïaid na shaphang kamon ha ka kynroh shaphang Ka Khyrdop Synrum:

³² bad hadien jong ki, u la leit u Hoshaïah, bad marshiteng na ki rangbah Judah,

³³ bad u Asariah, u Esra, bad u Meshullam,

³⁴ u Judah, bad u Benjamin, bad u Shemaïah, bad u Jeremaïah,

³⁵ bad kiba na ki khun ki lyngdoh kiba bad ki ronsing: u Sekharaïah, u khun u Jonathan, u khun u Shemaïah, u khun u Mattaniah, u khun u Mikhaïah, u khun u Sakkur, u khun u Asaph;

³⁶ bad ki para jong u, u Shemaïah, bad u Asarel, u Milalai, u Gilalai, u Maai, u Nethanel, bad u Judah, u Hanani, bad ki jingtem jong u Dabid u briew jong U Blei: bad u Esra u nongthoh ha shuwa jong ki:

³⁷ bad hajan Ka Khyrdop Umpohliew, bad beit sha shuwa jong ki, ki la kiew noh na ki kyrdon ka shnong u Dabid, ha kaba kiew ka kynroh, shaneng ka ïing u Dabid, wat haduh Ka Khyrdop Um shaphang mihngi.

³⁸ Bad kata kawei pat ka kynhun na kita kiba la ïaroh ka la leit ban ïashem bad ki, bad ma nga hadien jong ki, lem bad marshiteng na u paidbah, halor ka kynroh, shaneng ka ïingphira ki pajwa, wat haduh ka kynroh baïar;

³⁹ bad shaneng Ka Khyrdop Ephraim, bad hajan Ka Khyrdop barim, bad na Ka Khyrdop Dohkha, bad ka ïing phira Hananil, bad ka ïing phira Hammeah, wat haduh Ka Khyrdop Langbrot; bad ki la ïeng prem ha Ka Khyrdop Nongap.

⁴⁰ Kumta, ki la ïeng kine ki ar ki kynhun kiba la ïaroh ha ka ïing U Blei, bad ma nga, bad shiteng na ki nongsynshar lem bad nga:

⁴¹ bad ki lyngdoh, u Eliakim, u Maaseïah, u Miniamin, u Mikaïah, u Elioenai, u Sekharaïah, bad u Hananiah, kiba bad ki ronsing;

⁴² bad u Maaseïah, bad u Shemaïah bad u Eleasar, bad u Ussi, bad u Jehohanan, bad u Malkhijah, bad u Elam, bad u Eser. Bad ki nongrwai ki la rwai jam, bad u Jesrahiah halor jong ki.

⁴³ Bad ki la kñia ïa ki jingkñia shibun ha ka kata ka sngi, bad ki la leh kmen; namar U Blei u la pynkmen ïa ki da ka jingkmen bakhraw; bad ki kynthei de bad ki khynnah ki la leh kmen: bad kumta ka jingkmen ka Jerusalem la ïohsngew na sha jngai.

Ka jingbuh kam ïa ki lyngdoh bad ïa ki Lebi

⁴⁴ Bad ha kata ka sngi, la buh ïa ki briew halor ki pulit ki jingkynshew, ki jingainguh kyntiew ki soh nyngkong, bad ki khajna, ban ïalum ha ki, na ki lyngkha ki shnong, ïa ki bynta ba la buh da Ka Hukum ïa ki lyngdoh bad ki Lebi: naba ki Judah ki la kmen namar ki lyngdoh bad ki Lebi kiba la ap.

⁴⁵ Bad ki la ap ïa ka jingap U Blei jong ki, bad ïa ka jingap ka jingpynkhuid, bad ki nongrwai bad ki nongap jingkhang ki la leh kumjuh, katba kum ka hukum u Dabid, bad u Solomon u khun jong u.

⁴⁶ Namar ha ki sngi u Dabid bad u Asaph, na mynbarim don u rangbah ki nongrwai, bad ki jingrwai ïaroh bad jingainguh ha U Blei.

⁴⁷ Te ki Israel baroh ha ki sngi u Serubbabel, bad ha ki sngi u Nehemaïah, ki la ai ïa ki bynta jong ki nongrwai bad ki nongap jingkhang, katba donkam man la ka sngi; bad ki la buh kyrpang ïa ki Lebi; bad ki Lebi ki la buh kyrpang ïa ki khun u Aaron.