NEHEMAÏAH 1 - KA BAIBL

Ka jingduwai u Nehemaïah na ka bynta ka Jerusalem

¹ Ki ktien u Nehemaïah u khun u Hakaliah. Ka la jia te ha u 'nai Khisleb, ha ka snem ka ba-arphew, haba nga la don ha ka ïingsyiem Shushan,

² ba u Hanani, uwei na ki para jong nga, u la wan, ma u bad kiwei pat na Judah; bad nga la kylli ïa ki shaphang ki Jiw kiba la ïohlait, kiba la dang sah na ka jingpynwir, bad shaphang ka Jerusalem.

³ Bad ki la ong ha nga, “Kita kiba dang sah na ka jingpynwir hangta ha ka shnat ki don ha ka jingjynjar bad ha ka jinglehrain bakhraw: ïa ka kynroh Jerusalem ruh la pyntwa, bad ïa ki khyrdop jong ka la thang da ka ding.”

⁴ Te haba nga la ïohsngew ïa kine ki ktien, nga la shong khop bad nga la ïam, bad nga la sngewsih bun sngi, bad nga la shah jingit, bad nga la duwai ha khmat U Blei ka bneng,

⁵ bad nga la ong, “Nga kyrpad ïa me, A Trai, U Blei ka bneng, U Blei u bakhraw bad ba-itieng, uba sumar ïa ka jutang bad ïa ka jingisynei bad kita kiba ieit ïa u bad kiba sumar ïa ki hukum jong u:

⁶ ai ba ka shkor jong me kan shah mynta, bad ba ki khmat jong me kin peit, ba men sngap ïa ka jingduwai u shakri jong me, ïa kaba nga duwai ha khmat jong me ha kane ka por, mynsngi bad mynmiet, na ka bynta ki khun Israel ki shakri jong me, katba nga phla ïa ki pop ki khun Israel, ïa kiba ngi la leh pop ïa me: shisha, ma nga bad ka ïing u kpa jong nga ngi la leh pop.

⁷ Ngi la leh sniew eh pyrshah ïa me, bad ngim shym la sumar ïa ki hukum, lymne ïa ki aiñ, lymne ïa ki jingbishar, ïa kiba me la hukum ha u Moses u shakri jong me.

⁸ To kynmaw, nga kyrpad ïa me, ïa kata ka ktien ïa kaba me la hukum ha u Moses u shakri jong me, kaba ong, ‘Lada phi ryngkang, ngan pynsakma ïa phi hapdeng ki kynja bynriew:

⁹ hynrei, lada phin phai sha nga, bad phin sumar ïa ki hukum jong nga bad leh ïa ki, la kiba la beh noh na phi ki don ha ka bakut ka bneng, pynban, ngan ïalum ïa ki nangta, bad ngan wallam ïa ki ha kata ka jaka kaba nga la jied ban sah ka kyrteng jong nga ha ka.’

¹⁰ Mynta, kine ki long ki shakri jong me bad u paidlang jong me, ïa kiba me la pynim da ka bor bakhraw jong me, bad da ka kti badonbor jong me.

¹¹ A Trai, nga kyrpad ïa me, to pynshah mynta ïa ka shkor jong me ha ka jingduwai u shakri jong me, bad ha ki jingduwai ki shakri jong me, kiba sngewbha ban sheptieng ïa ka kyrteng jong me; bad pynman bha, nga kyrpad ïa me, ïa la u shakri ha kane ka sngi, bad ai ka jingisynei ha u ha khmat une u briew.” Namar nga la long u nongrah khuri ïa u syiem.