NAHUM 3 - KA BAIBL

¹ Kordit ïa kata ka nongbah ba bit snam! ka long kaba dap da ki jinglamler bad ka jingleh-jubor baroh; ka jinglute kam ju jah noh.

² Ka jingriew ka jingsympat, bad ka jingsawa ki shalyntem bariew kdar; bad ka kynjih ki kulai, bad ka jingryngkoh ryngkang ki kali ïapom;

³ u nongshong kulai u kiew ha u kulai, bad ka waitlam ba thaba, bad u sum baphyrnai; bad u paidbah ba la pynïap, bad shikynton ba khraw ki metïap; bym lah ñiew shuh ïa ki; ki ïajynthut halor ki metïap jong ki:

⁴ namar ki jingklim ba bun jong kata ka nuti ba bhabriew, kaba nang eh ha ki jingaiksuid, kaba die noh ïa ki jaid bynriew da la ki jingklim, bad ïa ki ïing da la ki jingaiksuid.

⁵ “Ha khmih, nga long pyrshah ïa pha,” ong U Trai ki paid, “bad ngan khyndied ïa ki rmiang jaiñ jong pha halor ka khmat jong pha; bad ngan pyni ha ki jaid bynriew ïa ka jinglyngkhuit jong pha, bad ïa ki jinglehrain jong pha ha ki hima.

⁶ Bad ngan shat ktieh kaba isih halor jong pha, bad ngan pynlong ka bymdonkam ïa pha, bad ngan buh ïa pha kaba i-rkhiebeiñ.

⁷ Te kan long, ba baroh kat kiba khmih ïa pha kin phet noh na pha, bad kin ong, ‘Ïa ka Ninebeh la pynjot noh: uei u ban ïam sngewsih ïa ka? Nangno ngan wad ki nongpyntngen ïa pha?’ ”

⁸ Hato pha kham bha ma pha ban ïa ka No-amon, kaba la ju don hapdeng ki wah, kaba ki um ki la don baroh sawdong ïa ka; kaba ka jingïada jong ka, ka la long ka duriaw, bad ka kynroh jong ka naduh ka duriaw?

⁹ Ka Ethiopia bad ka Ijipt ki la long ka bor jong ka, te ka la long ka bym lah ong shuh; ka Put bad ka Lubim ki la long ki nongïarap jong pha.

¹⁰ Pynban, la kit noh ïa ka, ka la leit long mraw: ïa ki khun rit jong ka ruh la lympat lwet ha ka bakut ki lynti shnong baroh: bad ki la ïakhalai ïa ki briew ba-donburom jong ka, bad ïa ki bakhraw batri jong ka baroh la khum ha ki kynjri.

¹¹ Pha ruh phan buaid, yn buhrieh ïa pha; pha ruh phan wad ka kut baskhem namar u nongshun.

¹² Ki kut jong pha baroh kin long kum ki dieng Dumbur bad la ki soh nyngkong: lada yn pynkhih ïa ki, kin hap ha ka shyntur u nongbam.

¹³ Ha khmih, ki briew jong pha hapdeng jong pha ki long kynthei; ïa ki khyrdop ka ri jong pha la plie wang ïa ki nongshun jong pha: ka ding ka la bam duh ïa ki dieng khang khyrdop jong pha.

¹⁴ To tong um ha pha ïa kata ka jingker kut, to pynskhem ïa ki kut jong pha: khie leit ha ka 'dewbyrtha, to ïuh ïa ka ktieh, to pynskhem ïa ka pajwa maw-it.

¹⁵ Hangta ka ding kan bam duh ïa pha; ka waitlam kan pom noh ïa pha, kan bam duh ïa pha kum u 'ñiangdkoh: To pynbun ïa lade kat u 'ñiangdkoh, to pynbun ïa lade kat u puit kluiñ.

¹⁶ Pha la pynroi ïa la ki nongkhaïi tam ïa ki khlur bneng: u 'ñiangdkoh u bam duh, bad u her noh.

¹⁷ Kiba phong pansngiat jong pha ki long kat ki puit kluiñ, bad ki nongïalam jong pha kum ki shi lynrum ki puit suwa kiba dem ha ki jingker ha ka sngi bakhriat, hynrei, haba mih ka sngi ki her noh, bad ka jaka jong ki kaba ki don ym ithuh.

¹⁸ Ki nongsumar langbrot jong me, ko syiem ka Assyria, ki shoh samthiah: kiba donburom jong me ki shongthait: ki briew jong me ki la saphred halor ki lum, te ym don u ban lum lang ïa ki.

¹⁹ Ym don ka jingpynjem ïa ka jingmynsaw jong me; ka jingmong jong me ka jur: baroh kat kiba ïohsngew shaphang jong me kin thab kti halor jong me; naba halor jongno ba ka jingleh bymman jong me kam ju ïaid ha la ka sngi?