NAHUM 2 - KA BAIBL

¹ Uta uba pynlwet u la wan kiew ha shuwa ka khmat jong pha: to sumar ïa ka kut, to ap ïa ka lynti, to pynkhlaiñ ïa la ki syngkai, to pynskhem eh ïa la ka bor.

² Naba U Trai u wallam pat ïa ka burom u Jakob, kum ka burom ki Israel: naba ki nongpynsuda ki la pynsuda noh ïa ki, bad ki la pynsniew ïa ki tnat dieng Waiñ jong ki.

³ Ïa ka stieh ki rangbah bakhlaiñ jong u la pynsaw, ki rangbah bakhlaiñ ki phong jaiñ saw: ki kali ïapom ki thaba na ki tiar syrti ha ka sngi ka jingkhreh jong u, bad la pynkhih itieng ïa ki sum.

⁴ Ki kali ïapom ki her lamwir ha ki lynti shnong, ki ïatyngkhuh para ki hi ha ki lynti bah: ka jing-i ïa ki ka long kum ki jingtbeh ding, ki her kum ki leilieh.

⁵ U kynmaw ïa la kiba donburom: ki ïajynthut ha la ka jingïaid; ki pynkloi sha ka kynroh jong ka, bad ïa ka jingïada la pynkhreh.

⁶ Ïa ki khyrdop ki wah la plie, bad ka ïingsyiem ka la um noh.

⁷ Bad ïa ka Hussab la pynpaw, la ring noh ïa ka, bad ki shakri kynthei jong ka ki ïam sngewsih ïa ka kumba da ka jingsawa ki paro, ki da thab ïa la ki shadem.

⁸ Hynrei, ka Ninebeh naduh mynno mynno ka la ju long kum ka pung um: pynban, ki ïaphet ïap noh. “Ïeng to ïeng,” ki pyrta; hynrei, ym don ba kyrtiang dien.

⁹ “To shim ïa ka jinglute ka rupa, shim ïa ka jinglute ka ksiar: naba ym don ka bakut shuh ïa kata ka jingkynshew, ka burom ka jingbuh jingsat ba-itynnad baroh.”

¹⁰ Ka long kaba suda, bad kaba la pynsuda, bad kaba la pynjot noh: bad ka dohnud ka um noh, ki khohsiew ki ïashoh lang, bad ka jingshitom ka ha ki syngkai baroh, bad ki khmat jong ki baroh ki thangïong.

¹¹ Hangno ka jaka dem ki sing, bad ka jaka bam ki sing samla, ha kaba u sing bad ka sing ki ïa-ïaid, bad u khun sing, te ym don uba pynsheptieng ïa ki?

¹² U sing u la tar kaba biang ïa la ki khun, bad u la khñiot, ïa la ki sing kynthei, bad u la pyndap ïa la ki krem da ki jinglute, bad ïa la ki jaka dem da ka doh tar.

Ka jingjot thiaw ka Ninebeh

¹³ “Ha khmih, nga long pyrshah ïa pha,” ong U Trai ki paid, “bad ngan thang ïa ki kali ïapom jong ka ha ka tdem, bad ka waitlam kan bam duh ïa ki sing samla jong pha: bad ngan pynduh ïa ka jinglute jong pha na ka khyndew, bad ïa ka ktien ki nonglam-ktien jong pha un ym ïohsngew shuh.”