MIKAH 7 - KA BAIBL

Ka jingsniew ha ka longbriew manbriew ki Israel

¹ Kordit ïa nga! naba nga long kum haba ki la lum ïa ki soh lyiur, kum ki soh khyrdong jong ka brisoh Waiñ: ym don ki rynjup ban bam; ka mynsiem jong nga ka thrang ïa u soh Dumbur ba la ih nyngkong.

² Ki babha ki la duh noh na ka khyndew, te ym don u bahok hapdeng ki briew: baroh ki ïa-ap thap ïa ka snam; ki ïabeh mrad uwei uwei baroh ïa la u para da ka jar.

³ Ki kti jong ki, ki ha ka basniew ïa ka ban leh biang biang ïa ka; u syiem u pan, bad u nongbishar u kloi ban bamsap; bad u bakhraw batri u kren ïa ka bymman ha la ka mynsiem; kumne ki thain lang ïa ka.

⁴ U babha eh na ki u kum u dieng shiah: u bahok eh u kham sniew ban ïa ka jingker speh; ka sngi ki nongap phira jong me, ka jingwan khmih jong me keiñ, ka la wan; mynta te kan long ka jinglyngngoh ha ki.

⁵ Wat shaniah phi ha u lok, wat buh ïa la ka jingshaniah ha u nongïalam: khang ïa ka jingkhang ka shyntur jong me na kata kaba thiah ha ka shadem jong me.

⁶ Naba u khun u pynjahburom ïa la u kpa, ka khun ka ïeng pyrshah ïa la ka kmie, ka pyrsa kurim pyrshah ïa la ka kiaw kurim; bad ki nongshun u briew kin long ki briew kiba dei ha ïing jong u hi.

U Trai un long ka jingshai bad ka jingpynim

⁷ Nga te, ngan khmih ïa U Trai; ngan ap khmih ïa U Blei ka jingpynim jong nga: U Blei jong nga un sngap ïa nga.

⁸ Wat leh risa pyrshah ïa nga, ko nongshun jong nga: haba nga kyllon, ngan ïeng; haba nga shong ha ka jingdum, U Trai un long ka jingshai ïa nga.

⁹ Ngan shah ïa ka jingbitar U Trai, namar nga la leh pop ïa u; tad ynda un ïasaid ïa ka kam jong nga, bad un leh ïa ka jingbishar na ka bynta jong nga: un pynmih noh ïa nga sha bashai, te ngan ïohi ïa ka hok jong u.

¹⁰ Ynda kumta, ka nongshun jong nga kan ïohi ïa ka, bad ka jinglehrain kan tap ïa ka; kaba la ong ha nga, “Hangno U Trai U Blei jong me?” Ki khmat jong nga kin ïohi ïa ka: mynta yn ïuh roit ïa ka kum ka ktieh ki lynti shnong.

¹¹ Kan wan ka sngi ïa ka ban tei ïa ki kynroh jong pha! ha kata ka sngi, ka pud jong pha kan ïar.

¹² Ha kata ka sngi, kin wan ha pha na Assyria bad ha ki nongbah ka Ijipt, bad na Ijipt jin haduh kata ka Wah, bad naduh ka duriaw haduh ka duriaw, bad naduh u lum haduh u lum.

¹³ La kumta, ka ri kan long kaba kynjah namar kita kiba shong ha ka, namar u soh ki jingleh jong ki.

Ka jingisynei U Blei ïa la ki briew

¹⁴ To sharai ïa la ki briew da la u dieng, ka kynhun ka jingïoh kynti jong me, kiba shong weibriew, ha khlaw hapdeng u Karmel: ai kin ïabam ha Bashan bad Gilead, kum ha ki sngi mynbarim.

¹⁵ Kum ha kita ki sngi ka jingwan mih jong me na ka ri Ijipt, ngan pyni ha u ïa kiei kiei kiba phylla.

¹⁶ Ki jaid bynriew kin ïohi bad kin lehrain ïa ka bor jong ki baroh: kin buh ïa la ka kti ha ka shyntur jong ki, ki shkor jong ki kin kyllut.

¹⁷ Kin jliah ïa ka 'dewmet kum u bseiñ; kum kiei kiei ki bapar ha ka khyndew kin wan da kaba khynñiuh na la ki jaka rieh: kin wan da kaba sheptieng ha U Trai U Blei jong ngi, bad kin kyiuh namar jong pha.

¹⁸ Uei uba long U Blei kat ma me, uba map ïa ka jingbymhok, bad uba ïaid lait ïa ka jingryngkang jong kita kiba sah ka jingïoh kynti jong u? um bat ïa la ka jingbitar junom, namar u sngewbha ha ka jingisynei.

¹⁹ Un phai pat bad un isynei ïa ngi; un ïuh ïa ki jingbymhok jong ngi hapoh ki sla'jat jong u: bad men bred ïa ki pop jong ki ha kiba jylliew ka duriaw.

²⁰ Men pyndep ïa ka jingshisha ha u Jakob, bad ïa ka jingisynei ha u Abraham, kumba me la smai ha ki kpa jong ngi naduh ki sngi mynbarim.