MIKAH 6 - KA BAIBL

Ka jingïasaid nia U Blei bad ki Israel

¹ To sngap te mynta ïa kaba U Trai u ong: “To ïeng, to ïasaid ha khmat ki lum bah, bad ai ïa ki lum rit ban ïohsngew ïa ka jingsawa jong me.

² To sngew, ko phi ki lum, ïa ka jingïasaid nia U Trai, bad phi ki nongrim ki baskhem ka khyndew: naba U Trai u don ka jingïasaid nia bad la ki briew, bad un ïasaid bad ki Israel.

³ “A phi ki briew jong nga, nga la leh aïu ïa me? Bad ha kaei nga la pynsngew btai ïa me? To sakhi pyrshah ïa nga.

⁴ Naba nga la wallam ïa me na ka ri Ijipt, bad nga la pyllait ïa me na ka ïing ka jinglongmraw; bad nga la phah ïa u Moses, u Aaron, bad ka Miriam ha shuwa jong me.

⁵ A phi ki briew jong nga, to kynmaw te ïa kaba u Balak u syiem ka Moab u la thmu, bad kumno u Balaam u khun u Beor u la phai ktien ha u; to kynmaw naduh Shittim haduh Gilgal, ba phin tip ïa ki jinglehhok jong U Trai.”

Kaei kaba U Blei u wad na u briew

⁶ Da ei ngan wan ha khmat U Trai, bad ba ngan dem ha khmat U Blei U Bahakhlieh? ngan wan ha khmat jong u da ki jingainguh thang, da ki khun masi kiba shi snem?

⁷ U Trai un sngewbha ha ki hajar ki langbrot shynrang, lane ha shiphew hajar ki wah umphniang? ngan ai ïa uba la kha nyngkong jong nga namar ka jingpalat jong nga, ïa u soh ka met jong nga namar ka pop ka mynsiem jong nga?

⁸ U la pyni ha me, ko briew, kaei ka babha; te U Trai u wad aïu na me, hynrei, tang ban leh hok, bad ban ieit ïa ka jingisynei, bad ban ïaid leh rit bad U Blei jong me?

⁹ Ka ktien U Trai ka pyrta ïa ka nongbah, “U bastad te un ïohi ïa ka kyrteng jong me: to sngew ïa u dieng sympat, bad ïa uta uba la hukum ïa u.

¹⁰ Ki dang don ki spah ka jingleh bymman ha ka ïing jong u bymman, bad kata ka jingthew kaba duna kaba ijli?

¹¹ Hato ngan long khuid bad ki tarajur ki bymhok, bad lem bad ka pla ki mawser kiba lamler?

¹² Naba kita ki bariewspah jong ka ki dap da ka jingleh-jubor, bad kita kiba shong ha ka ki la kren ïa ka lamler, bad u thylliej jong ki u long uba shukor ha ka shyntur jong ki.

¹³ Namar kata, nga ruh, nga la shoh ïa pha da ka jingmong kaba shitom; nga la pynjot ïa pha namar ki pop jong pha.

¹⁴ Phan bam keiñ, hynrei, phan ym kdang: bad kata ka jingpynrit ïa pha kan long hapdeng jong pha: bad phan pynkynriah, hynrei, phan ym ïoh rah noh skhem; bad ïa kata kaba pha rah noh ngan ai noh ha ka waitlam.

¹⁵ Phan ïoh bet, hynrei, phan ym ïoh ot noh keiñ: phan ïuh ïa ki soh Olib, hynrei, phan ym ïoh pynsleh ïa lade da ka umphniang; bad ïa ki soh Waiñ, hynrei, phan ym ïoh dih ïa ka Waiñ.

¹⁶ Naba ïa ki hukum u Omri la sumar, bad ïa ki jingleh ka ïing u Ahab baroh, bad phi ïaid ha ki jingpyrkhat jong ki: ba ngan pynlong ka jingjot ïa pha, bad ïa kita kiba shong ha pha ka jingkynshi; namar kata, phin bah ïa ka jinglehrain ki briew jong nga.”