MIKAH 5 - KA BAIBL

¹ Mynta to ïalum paid ïa lade, ko ka khun ki paid: u la ap thap pyrshah ïa ngi: kin shoh ïa u nongbishar ki Israel da u diengduh ha ka ngab.

Ka jingsynshar jong u nongpyllait im uba na Bethlehem

² Hynrei, ma pha, ka Bethlehem Ephrathah, la pha long kaba rit hapdeng ki hajar Judah, na pha keiñ un mih ha nga uwei u ban sa long u nongsynshar ha Israel; uba ka jingmih jong u ka long na mynhyndai, naduh bymjukut.

³ Namar kata, un iehnoh ïa ki, haduh kata ka por ba kata kaba suhkhun kan kha khun: ynda kumta, kita kiba sah na ki para jong u kin phai pat sha ki khun Israel.

⁴ Bad un ïeng, bad un bsa ïa la ka kynhun ha ka bor U Trai, ha ka burom ka kyrteng U Trai U Blei jong u: bad kin ïashong; naba hangta un long uba khraw haduh ki bakut ka pyrthei.

⁵ Te une un long ka jingsuk jong ngi: haba u nong Assyria un wan ha ka ri jong ngi, bad haba un ïuh hapoh ki ïingpaki jong ngi, ynda kumta, ngin pynïeng pyrshah ïa u hynñiew ngut ki nongaplangbrot, bad phra ngut kiba rangbah rangbah ki briew.

⁶ Te kin pynjot ïa ka ri Assyria da ka waitlam, bad ïa ka ri Nimrod ha ki khyrdop jong ka: bad un pyllait ïa ngi na ki nong Assyria, haba u wan ha ka ri jong ngi, bad haba u ïuh ha ki phang jong ngi.

⁷ Bad kiba sah jong u Jakob kin long hapdeng bun ki kynja bynriew kum ka umjer kaba na U Trai, kum ki 'lap praw halor u phlang; ki bym ap khmih ïa u briew, lymne ap ïa ki khun shynrang ki briew.

⁸ Bad kiba sah jong u Jakob kin long hapdeng ki jaid bynriew, hapdeng bun ki kynja bynriew, kum u sing hapdeng ki mrad khlaw, kum u sing samla hapdeng ki kynhun langbrot: uba, lada u ïaid lyngba, u ïuh roit bad u tar lyngkhot, bad ym don u ban pyllait.

⁹ Ai ba yn kyntiew ïa ka kti jong me halor kiba ïaleh pyrshah ïa me, bad ai ba yn pynduh noh ïa ki nongshun jong me baroh.

¹⁰ “Te ha kata ka sngi,” ong U Trai, “ngan pynduh noh ïa ki kulai jong me napdeng jong me, bad ngan pynjot noh ïa ki kali ïapom jong me:

¹¹ bad ngan pynduh noh ïa ki nongbah ka ri jong me, bad ngan pynkyllon ïa ki kut baskhem jong me:

¹² bad ngan pynduh noh ïa ki jingaiksuid na ka kti jong me; bad men ym ïoh shuh ïa ki nongkren byrtong:

¹³ bad ngan pynduh noh ïa ki durblei jong me, bad ïa ki rishot blei jong me napdeng jong me; bad men ym mane blei shuh ïa ka jingtrei ki kti jong me.

¹⁴ Bad ngan rat noh ïa ki Asherah jong me napdeng jong me: bad ngan pynjot noh ïa ki nongbah jong me.

¹⁵ Bad ngan pynhiar kput ha ka jingbitar bad ka jingotshla halor kita ki jaid bynriew ki bym shym la shahshkor.”