MIKAH 4 - KA BAIBL

Ka jingsynshar U Trai da ka jingsuk

¹ Hynrei, ha ki sngi ki bakhatduh kan long, ba ïa u lum ka ïing U Trai yn pynskhem halor ka khlieh ki lum, bad yn pynkyntiew ïa ka ha khlieh ki lum rit; bad ki paidbah kin ïatuid noh ha u.

² Bad bun ki jaid bynriew kin ïaleit bad kin ïa-ong, “Ale, te ngin ïaleit kiew sha u lum U Trai, bad ha ka ïing jong U Blei u Jakob; te un hikai ïa ngi ïa ki lad jong u, bad ngin ïaïaid ha ki lynti jong u:” naba na ka Seïon kan mih noh ka hukum, bad ka ktien U Trai na Jerusalem.

³ Bad un bishar hapdeng bun ki kynja bynriew, bad un sneng ïa ki jaid bynriew kiba khlaiñ kiba ha jngai; te kin shoh ïa ki waitlam jong ki ban long kti-phar, bad ïa ki sum jong ki ban long ki wait khmut: ka jaid bynriew kan ym rah ïa ka waitlam pyrshah ïa ka jaid bynriew, lymne kin ym hikai ïaleh thma shuh.

⁴ Hynrei, kin ïashong uwei uwei baroh hapoh la u dieng Waiñ bad hapoh la u dieng Dumbur; te ym don u ban pynsheptieng ïa ki: naba ka shyntur U Trai ki paid ka la kren ïa kata.

⁵ Naba ki jaid bynriew baroh kin ïaïaid ha ka kyrteng la u jong u jong u blei, ngi te ngin ïaid ha ka kyrteng U Trai U Blei jong ngi junom junom.

Ka jingsiewspah ïa ki Israel na ka jinglongmraw

⁶ “Ha kata ka sngi,” ong U Trai, “ngan lum lang ïa kata ka ba-dkoh, bad ngan lum ïa kata kaba la beh noh, bad ïa kata kaba nga la pynjynjar;

⁷ te ngan pynlong ka bynta ba sah ïa kata kaba la dkoh, bad ka jaid bynriew bakhlaiñ ïa kata kaba la bred noh sha jngai: bad U Trai un synshar halor jong ki ha u lum Seïon naduh mynta junom.”

⁸ Bad ma pha, ko ka kut jong ka kynhun, u lum ka khun ka Seïon, sha pha kan wan; shisha, kata ka jingsynshar kaba mynshuwa kan wan, ka hima ka khun ka Jerusalem.

⁹ Balei te pha lynñiar kyang? Ym don u syiem ha pha, u myntri jong pha u la ïap duh noh, ba kaba suhkhun ka la ngat ha pha kum ka kynthei kaba kha khun?

¹⁰ To nang suh, bad to kyan ban kha, ko khun ka Seïon, kum ka kynthei kaba kha khun: naba mynta phan mih noh na kane ka nongbah, bad phan shong ha madan, bad phan poi jin haduh Babilon; hangta keiñ, yn pynim ïa pha; hangta keiñ U Trai un siewspah ïa pha na ka kti ki nongshun jong pha.

¹¹ Te mynta ruh, bun ki jaid bynriew ki la ïalang pyrshah ïa pha, kiba ong, “Ai ba yn pyntngit ïa ka, bad ai ba ki khmat jong ngi kin khmih beiñ ïa ka Seïon.”

¹² Hynrei, kim tip ïa ki jingmut U Trai, lymne kim sngewthuh ïa ka jingpyrkhat jong u: naba u la lum ïa ki kum ki song sha ka kyntem.

¹³ To ïeng bad shoh kba, ko khun ka Seïon: naba ngan pynlong nar ïa ka reng jong pha, bad ngan pynlong rnong ïa ki khnap jong pha: te phan shoh lwet ïa bun ki jaid bynriew: bad phan pynkyntang ha U Trai ïa ka jingïoh jong ki, bad ïa ka spah jong ki ha U Trai ka khyndew baroh.