MIKAH 3 - KA BAIBL

Kaba pynrem ïa ka jingleh runar ki nongsynshar ka ïing Israel

¹ Bad nga la ong, “To sngew, nga kyrpad ïa phi, phi ki rangbah u Jakob, bad ki nongsynshar ka ïing Israel: hato kam dei ïa phi ban tip ïa ka jingbishar?

² Kiba shun ïa ka babha, bad kiba ieit ïa ka basniew; kiba khoh ïa ka snep jong ki na ki, bad ïa ka doh jong ki na ki shyieng jong ki;

³ kiba bam ruh ïa ka doh ki briew jong nga; bad ki khoh ïa ka snep jong ki na ki, bad ki pynkheiñ ïa ki shyieng jong ki; shisha, ki daiñ lyngkhot lyngkhai ïa ki, kumba ïa u khiew, bad kum ka doh ha u dek.

⁴ “Ynda kumta, kin ïam ha U Trai, hynrei, un ym phai ktien ïa ki: un buhrieh ïa la ka khmat na ki, pynban, ha kata ka por, kat kumba ki la leh sniew ha ki jingleh jong ki.

⁵ “Kumne u ong U Trai shaphang kita ki nongïathuhlypa kiba pynbakla ïa ki briew jong nga: kiba dait da la ki bniat bad kiba pyrta, ‘Ka jingsuk’; bad kat u bym ai bam ha ki, ki khreh ïa ka thma ïa u.

⁶ ‘Namar kata, kan long miet ïa phi, ba phin ym ïoh ka jingithuhpaw; bad kan long dum ïa phi, ba phin ym lah khan; bad ka sngi kan sep ha ki nongïathuhlypa, bad ka sngi kan dum halor jong ki.’

⁷ Te ki nongïohi kin lehrain, bad ki nongkhan kin dum buit; shisha, baroh kin tap ïa la ki rmiang shyntur: namar ym don ka jingphai ktien na U Blei.

⁸ Hynrei, ma nga shisha da U Mynsiem U Trai nga dap ka bor, bad ka jingbishar, bad ka jingkhlaiñ, ïa ka ban ïathuh ha u Jakob ïa ka jingpalat jong u, bad ha u Israel ïa ka pop jong u.

⁹ “To sngew ïa kane, nga kyrpad ïa phi, phi ki rangbah ka ïing u Jakob, bad ki rangbah ka ïing Israel, kiba isih ïa ka jingbishar, bad kiba pynbakla ïa ka hok baroh.

¹⁰ Ki tei ïa ka Seïon da ka snam, bad ïa ka Jerusalem da ka pop.

¹¹ Ki rangbah jong ka ki bishar ba kin ïohnong, bad ki lyngdoh jong ka ki hikai namar ka bainong, bad ki nongïathuhlypa jong ka ki khan ba kin ïoh tyngka: pynban, ki shan ha U Trai, bad ki ong, ‘Hato U Trai um don hapdeng jong ngi? kan ym jia ka basniew ïa ngi.’

¹² Namar kata, ïa ka Seïon yn lur kum ka lyngkha namar jong phi, bad ka Jerusalem kan long ki lymbher, bad u lum jong ka ïing kum ki jaka bajrong jong ka khlaw.”