MIKAH 2 - KA BAIBL

Ka jingkordit ïa kiba leh jubor ïa u baduk

¹ Kordit ïa kita kiba shet ïa ka jingsniew bad bathaw ïa ka jingbymman halor la ki jingthiah! haba ka la shai mynstep, ki pyndep ïa kata, namar ba ka shong ha ka bor jong ki.

² Ki khwan ïa ki lyngkha, bad ki knieh ïa ki; bad ïa ki ïing, bad ki shim noh ïa ki: bad ki leh jubor ïa u briew bad la ka ïing, u briew bad la ka jingïoh kynti.

³ Namar kata, U Trai u ong kumne: “Ha khmih, nga thaw ïa ka jingsniew pyrshah ïa kane ka ïing, na kaba phin ym ïoh pynkynriah ïa la ki ryndang, lymne phin ym ïaid sarong; naba ka long ka por ka basniew.

⁴ Ha kata ka sngi, kin ïathaw ka pharshi pyrshah ïa phi, bad kin ïambriew da ka jingïambriew ba sngewsynei, kin ong, ‘La pynjot noh khoit ïa ngi: u pynkylla ïa ka bynta u paidlang jong nga: kumno keiñ u shim noh ïa ka na nga! ha ki nongïaleh pyrshah u ïasam ïa ki lyngkha jong ngi.’

⁵ Namar kata, men ym don u ban ring ksai da ka jingkhalai ha ka jingïaseng ka jong U Trai.

⁶ “Wat ïathuhlypa phi,” kumta, ki ïathuhlypa. “Kin ym ïathuhlypa ha kine: ki jingkrenbeiñ kin ym duh noh.

⁷ Hato yn ong, ‘A ka ïing u Jakob, La pynkhim ïa U Mynsiem U Trai? kine ki long ki jingleh jong u? Hato ki ktien jong nga kim leh bha ïa uta uba ïaid hok?’

⁸ Hynrei, mynhynnin u paidbah jong nga u la ïeng kum u nongshun: phi law noh ïa ka barandi na ka jingkup na kita kiba ïaid lait ha kaba suk kum ki bym kwah ïa ka thma.

⁹ Ïa ki kynthei jong u paidbah jong nga phi beh noh na ki ïing basngewbha jong ki; na ki khun rit jong ki phi shim duh ïa ka burom jong nga.

¹⁰ To ïeng, bad khie leit noh; naba kane, kam long ka jingjahthait jong phi: namar ka jingbymkhuid kaba pynjot, da ka jingpynjot sat keiñ.

¹¹ Lada u briew uba ïaid ha ka mynsiem ka jingshukor u lamler, u da ong, ‘Ngan ïathuhlypa ha me ïa ka Waiñ bad ka 'iad eh;’ uta keiñ, un wan long u nongïathuhlypa ïa une u paidbah.

¹² Da shisha ngan lum lang ïa me baroh, ko Jakob; da shisha ngan lum lang ïa kiba dang sah jong ki Israel; ngan buh lang ïa ki kum ki langbrot Bosrah: kum ka kynhun ha la ka jaka bam phlang, kin pynlong ka jingsawa bakhraw namar ba bun eh ki briew.”

¹³ U nongpynpait u la leit kiew ha shuwa jong ki: la thom lyngba bad ki la ïaid sha ka khyrdop, bad ki la leit noh na ka: te u syiem jong ki u la nang ïaid sha shuwa jong ki, bad U Trai u ha khlieh jong ki.