MIKAH 1 - KA BAIBL

Ka jingïambriew na ka bynta ka Samaria bad ka Jerusalem

¹ Ka ktien U Trai kaba la wan ha u Mikah u nong Morasht ha ki sngi u Jotham, u Ahas, bad u Hesekaïah, ki syiem ka Judah, kaba u la ïohi shaphang ka Samaria bad ka Jerusalem.

² To sngew, phi ki bynriew, phi baroh keiñ; to shahshkor, ko ka khyndew, bad baroh katba don ha ka: bad to U Trai U Blei un long sakhi pyrshah ïa phi, U Trai na la ka templ ka bakhuid keiñ.

³ Naba, ha khmih, U Trai u wan mih noh na la ka jaka, bad un wan hiar, bad un ïuh halor ki jaka jrong jong ka khyndew.

⁴ Te ki lum kin um noh hapoh jong u, bad ki them kin pdang, kum ka bthing ha khmat ka ding, kum ki um ba la theh halor ka riat.

⁵ Kane baroh, ka long namar ka jingpalat u Jakob, bad namar ki pop ka ïing Israel. Kaei ka jingpalat u Jakob? kam long ka Samaria? bad kiei ki jaka jrong ka Judah? kim long ka Jerusalem?

⁶ “Namar kata, ngan pynlong ïa ka Samaria kum ka kynton ha lyngkha, kum ka khyndew ba la sboh ïa ka brisoh Waiñ: bad ngan theh noh arsut ïa ki maw jong ka sha ka them, bad ngan pynpaw ïa ki nongrim jong ka.

⁷ Bad ïa ki durblei jong ka baroh yn lympat lyngkhot lyngkhai, bad ïa ki nong jong ka baroh yn thang ha ding, bad ïa ki bleithaw jong ka baroh ngan ai ban pynjot noh: naba ka la lum ïa ki, na ka nong jong ka nuti, bad sha ka nong jong ka nuti kin phai pat.”

⁸ Namar kane, ngan ïam bad ngan lynñiar, ngan leit lymboit bad lyngkhuit: ngan pynlong ka jinglynñiar kum ki Ksar, bad ka jingïam sngewsih kum ki Ostrits.

⁹ Naba ïa ki jingmong jong ka ym lah pynkhiah shuh: naba ka la wan jin haduh Judah; ka kot haduh ka khyrdop ki briew jong nga, haduh Jerusalem keiñ.

¹⁰ Wat ïathuh ïa kane ha Gath, wat ïam satia: ha Beth-le-Aphrah nga la ksaid ïa lade ha ka 'dewmet.

¹¹ To nang ïaid noh, ko nong Shaphir, ha ka jinglyngkhuit bad ka jinglehrain: ka nong Saanan kam shym mih noh: ka jinglynñiar ka Beth-esel kan pynduh noh na phi ïa ka jingïarap jong ka.

¹² Naba ka nong Maroth ka ap khmih da kaba khuslai ïa ka jingbha: namar ka jingsniew ka la hiar na U Trai haduh ka khyrdop ka Jerusalem.

¹³ To teh ïa ka kali ïapom ha u kulai bastet, ko nong Lakhish: ka la long ka jingsdang ka pop ïa ka khun ka Seïon; naba la shem ïa ki jingpalat ki Israel ha pha.

¹⁴ Namar kata, men ai ka bai pyllait noh ha Moresheth-gath: ki ïing ka Akhsib kin long ka jingshukor ïa ki syiem ki Israel.

¹⁵ Pynban, ngan wallam ha pha, ko nong Mareshah, ïa uta u ban ïoh kynti ïa pha: ka burom Israel kan wan jin haduh Adullam.

¹⁶ To pynlyndum ïa lade, to khi ïa lade namar ki khun ka jingieit jong me: pynheh ïa la kaba lyndum kum ka pukni; naba ki la leit long mraw na me.