MATHAÏOS 9 - KA BAIBL

U Jisu u pynkhiah ïa u bapang ïapshiliang

¹ Te haba u la kiew ha ka lieng, u la leit sha shiliang, bad u la poi ha la ka shnong.

² Ha khmih ruh, ki la ïawallam ha u ïa u bapang ïapshiliang, uba thiah ha ka jingthiah: te haba U Jisu u la ïohi ïa ka jingngeit jong ki, u la ong ha uta u bapang ïapshiliang, “To kyrmen, ko khun; la map noh ïa me ïa ki pop jong me.”

³ Ha khmih ruh, kiba na ki nongthoh ki la ïa-ong ha lade, “Une u krenbeiñ Blei.”

⁴ Te U Jisu ba u da tip ïa ki jingmut jong ki, u la ong, “Na ka balei ba phi ïamut bymman ha ki dohnud jong phi?

⁵ naba kano kaba kham jem, ban ong, ‘La map ïa ki pop jong me;’ lane ban ong, ‘To ïeng, to ïaid ruh?’

⁶ Hynrei, ba phin ïoh tip ba U Khun u briew u don bor ha ka khyndew ban map ïa ki pop,” (hangta u la ong ha uta u bapang ïapshiliang), “To ïeng, to rah noh ïa la ka jingthiah, to khie leit ruh sha la ïing.”

⁷ Te haba u la ïeng, u la leit sha la ïing.

⁸ Ki paidbah te haba ki la ïohi ïa kata, ki la ïakyndit, bad ki la ïaroh ïa U Blei, uba la ai bor kum kata ha ki briew.

Ka jingkhot ïa u Mathaïos

⁹ Haba U Jisu te u la ïaid noh nangta, u la ïohi ïa u briew, ïa uba la khot “Mathaïos”, uba shong ha ka ïing khrong; U ong te ha u, “To bud ïa nga.” Te haba u la ïeng, u la bud ïa U.

¹⁰ Ka la jia ruh, haba U la shong bam ha ka ïing uta, ha khmih te, bun ki nongkhrong bad ki bapop ki la ïawan shong shaniah lem bad U Jisu bad ki synran jong U.

¹¹ Haba ki Pharisi te ki la ïohi, ki la ïa-ong ha ki synran jong U, “Balei ba U Nonghikai jong phi u ïabam lem bad ki nongkhrong bad ki bapop ruh?”

¹² Te haba U Jisu u la ïohsngew, u la ong ha ki, “Ki bakhiah kim donkam ïa u nongpynkhiah, hynrei, ki bapang keiñ;

¹³ hynrei, khie leit ma phi to hikai kaei kane, ‘Ïa ka jingisynei nga mon, te ym ïa ka jingkñia:’ naba ngam shym la wan ban khot ïa ki bahok, hynrei, ïa ki bapop ïa ka ban kylla-ka-bamut.”

Shaphang kaba shah jingit

¹⁴ Ynda kumta, ki la ïawan ha u ki synran u Ïoannis, ki da ong, “Balei ba ngi bad ki Pharisi ngi ïashah jingit bunsien, ki synran jong me te kim ïashah jingit?”

¹⁵ U Jisu te u la ïathuh ha ki, “Ki nong-on kurim ki lah ban sngewsih, haba u dang sah bad ki u nongleit-kurim? Hynrei, kin poi ki sngi, ynda yn shim noh na ki, ïa u nongleit-kurim, hangta te kin sa ïashah jingit.

¹⁶ Ym don ruh uba suh syrdep ïa ka jaiñkup barim da ka jaiñ thymmai; naba kata ka jaiñsyrdep hi ka pynkad na ka jong kata ka jaiñkup, ka pynlong ruh ïa ka jingkad kaba kham khraw:

¹⁷ lymne kim ju ïabuh ïa ka Waiñ thymmai ha ki lywa snieh barim; lymda kumta, kita ki lywa snieh ki pdang, te ka jaw noh kata ka Waiñ, bad kita ki lywa snieh ki jot noh: hynrei, ki ïabuh ïa ka Waiñ thymmai ha ki lywa snieh thymmai, ba kin ïabha baroh ar.”

Ka khun kynthei u Jairos bad ka kynthei ka bapang mihsnam

¹⁸ Haba u dang ong ïa kine kiei kiei ruh ha ki, ha khmih, la wan uwei u rangbah, bad u la mane dem ïa U, u da ong, “Ka khun jong nga katta ka la ïap; hynrei to da wan buh ïa ka kti jong me ha ka, te kan sa im.”

¹⁹ U Jisu te haba u la ïeng, U la bud ïa u, lem bad ki synran jong U de.

²⁰ Ha khmih ruh, ka briew kaba la pang mihsnam khat-ar snem, ka la wan hajan na shadien, bad ka la ktah ïa ka rmiang ka jaiñkup jong U;

²¹ naba ka la ong ha lade, “Lada ngan shu ïoh ktah tang ïa ka jaiñkup jong U, ngan sa khiah.”

²² U Jisu te haba u la phai, bad u la ïohi ïa ka, u la ong, “To kyrmen, ko ka khun; ka jingngeit jong pha ka la pynkhiah ïa pha.” Kata ka kynthei te ka la khiah naduh kata ka por.

²³ Te haba U Jisu u la poi ha ïing uta u rangbah, bad ba U la ïohi ïa ki duhalia, bad ïa ki paidbah ba ïambriew,

²⁴ u la ong ha ki, “To kynriah noh; naba ka khynnah kam shym la ïap, hynrei, ka ïohthiah.” Ki te, ki la rkhiebeiñ ïa u.

²⁵ Hynrei, haba la pynmih noh ïa u paidbah, U la leit hapoh, bad U la bat ïa ka na ka kti; te kata ka khynnah ka la ïeng.

²⁶ Ka jingbna ïa kata te ka la leit kylleng ha kata ka ri baroh.

U Jisu u pynpeit ïa ki khmat ar ngut ki bamatlah

²⁷ Te haba U Jisu u la leit noh nangta, ki la ïabud ïa u ar ngut ki bamatlah, ki da kyrpad, ki da ong ruh, “To isynei ïa ngi, ko Khun u Dabid.”

²⁸ Haba u la wan hapoh ïing te, kita ki bamatlah ki la ïawan ha u; te U Jisu u la ong ha ki, “Phi ngeit ba nga lah ban leh ïa kane?” Ki la ong ha u, “Ho-oid, ko Trai.”

²⁹ Ynda kumta, u la ktah ïa ki khmat jong ki, u da ong, “Katba kum ka jingngeit jong phi kan long ha phi.”

³⁰ Ïa ki khmat jong ki te la pynpeit. U Jisu te u la maham ïa ki, u da ong, “To sumar ban ym tip mano mano ruh.”

³¹ Hynrei, haba ki la ïaleit noh, ki la ïa-pynbna ïa u ha kata ka ri baroh.

U Jisu u pynkhiah ïa u bymnangkren

³² Haba ki dang ïamih noh ruh nangta, ha khmih, ki la ïawallam ha u ïa u briew u bymnangkren uba shong ksuid.

³³ Te haba U la beh noh ïa uta u ksuid, uta u bymnangkren u la kren; ki paidbah te ki la ïakyndit, ki da ong, “Mynno mynno ruh ym ju paw kumne ha Israel!”

³⁴ Hynrei, ki Pharisi ki la ïa-ong, “U beh noh ïa ki ksuid da u rangbah ki ksuid.”

U Jisu u sngewlem ïa u paidbah

³⁵ U Jisu u la ïaid ruh kylleng sha ki nongbah bad ki nongrit baroh, u da hikai ha ki synagog jong ki, bad u da ïalap ïa ka gospel ka jong ka hima, bad u da pynkhiah ïa ka jingpang baroh bad ïa ka jingkhrew baroh de.

³⁶ Bad haba u la ïohi ïa ki paidbah, u la sngewsynei namar jong ki, naba ki long kiba la sakma bad kiba la saphred ruh, kum ki langbrot ki bymdon u nongsharai.

³⁷ Ynda kumta, u la ong ha ki synran jong u, “Ka jingot kaba bun shisha, hynrei, ki nongtrei ki khyndiat;

³⁸ namar kata, to kyrpad ïa U Trai ka jingot, ba un phah noh ïa ki nongtrei sha ka jingot jong u.”