MATHAÏOS 8 - KA BAIBL

U Jisu u pynkhuid ïa u bapang 'ñiangthohlieh

¹ Te haba U la wan hiar na u lum, ki paidbah babun ki la ïabud ïa U.

² Ha khmih ruh, u bapang 'ñiangthohlieh u la wan, bad u la mane dem ïa U, u da ong, “Ko Kynrad, lada me mon, me lah ban pynkhuid ïa nga.”

³ U Jisu te u la kner ïa la ka kti, bad U la ktah ïa u, U da ong, “Nga mon; to men long khuid.” Kumne kumne ruh la pynkhuid ïa u na kata ka pang 'ñiangthohlieh jong u.

⁴ U Jisu u la ong ruh ha u, “To sumar wat ïathuh hano hano ruh; hynrei, khie leit noh, to pyni ïa lade ha u lyngdoh, to ainguh ruh ïa ka jingai ïa kaba u Moses u la hukum, ïa ka ban long ka jingphla ïa ki.”

U Jisu u pynkhiah ïa u shakri u Rangbah Shispah

⁵ Haba U Jisu u la poi ha Kapernam, u rangbah shispah u la wan ha U, bad u la kyrpad ïa U,

⁶ u da ong, “Ko Kynrad, u shakri jong nga u thiah ha ïing ba u pang ïapshiliang, u da kordit eh.”

⁷ Te U Jisu u la ong ha u, “Ngan sa wan pynkhiah ïa u.”

⁸ Uta u rangbah shispah te u la ïathuh bad u la ong, “Ko Kynrad, ngam long uba dei ba men wan rung hapoh ka ïing jong nga: hynrei, shu ong tang da ka ktien, te yn sa pynkhiah ïa u shakri jong nga:

⁹ naba nga ruh nga long u briew hapoh ka hukum, uba don ki shipai hapoh jong nga; te nga ong ha une, ‘Khie leit’, te u leit; bad ha uwei pat, ‘Ale’, u ruh u wan; bad ha u shakri jong nga, ‘Leh ïa kane’, u ruh u leh.”

¹⁰ Te haba U Jisu u la ïohsngew, u la kyndit, bad u la ong ha kita kiba bud, “Shisha nga ong ha phi, wat ha Israel, ngam shym la shem kat kane ka jingngeit.

¹¹ Nga ong ruh ha phi, ba shibun kin ïawan na mihngi bad na sepngi, bad kin ïashong shaniah lem bad u Abraham, bad u Isaak, bad u Jakob ruh, ha ka hima ki bneng:

¹² hynrei, ïa ki khun ka hima yn shop noh sha ka ba-dum jngai bah: hangta yn long kaba lynñiar, bad kum dait bniat.”

¹³ Bad U Jisu u la ong ha uta u rangbah shispah, “To khie leit noh; kat kumba me la ngeit, kan long ruh ïa me.” Te ha kata hi ka por la pynkhiah ïa u shakri jong u.

U Jisu u pynkhiah shibun kiwei pat ki bapang

¹⁴ Haba U Jisu u la wan ha ka ïing u Petros, U la ïohi ïa ka syngken kurim jong u ba ka da thiah, bad ba ka da khieshoh.

¹⁵ Bad U la ktah ïa ka kti jong ka, te kata ka khieshoh ka la iehnoh ïa ka; te ka la ïeng, bad ka la shakri ïa U.

¹⁶ Ynda la janmiet ruh, ki la ïawallam ha U shibun kiba shong ksuid; te U la beh noh ïa ki mynsiem da ka ktien, bad U la pynkhiah ïa ki bapang baroh:

¹⁷ ba kumta yn pyndep ïa kata ba la ong da u Isaïah u nongïathuhlypa, u da ong, “U hi u la shimti ïa ki jingkhrew jong ngi, bad u la bah noh ïa ki jingpang jong ngi.”

Kiba kumno kiba bit ban long synran

¹⁸ Te haba U Jisu u la ïohi ïa ki paidbah babun sawdong jong u, u la hukum ban leit noh sha shiliang.

¹⁹ Te haba uwei u nongthoh u la wan, u la ong ha U, “Ko Nonghikai, ngan bud ïa me kat shaba me leit.”

²⁰ U Jisu te u la ong ha u, “Ki myrsiang ki don ki thliew, bad ki sim bneng ki jaka rieh: hynrei, U Khun u briew um don jaka ban buh ïa la ka khlieh.”

²¹ Uwei pat ruh na ki synran jong U, u la ong ha U, “Ko Trai, to shah ba ngan leit shuwa ban tep ïa la u kpa.”

²² Hynrei, U Jisu u la ong ha u, “Bud ïa nga; bad ieh ïa ki baïap ban tep ïa ki baïap jong ki.”

U Jisu u pynjai jai ïa ka 'erïong

²³ Te haba u la kiew ha ka lieng, ki synran jong u ki la ïabud ïa u.

²⁴ Ha khmih ruh, ka jingkhih phaloh kaba khraw ka la mih ha ka duriaw, kat ban tyllep ïa kata ka lieng da ki jingat phyllung; hynrei, u la ïohthiah.

²⁵ Te haba ki synran jong u ki la ïawan ha u, ki la kyrsiew ïa u, ki ïa-ong, “Ko Kynrad, to pynim ïa ngi; ngin sa ïap!”

²⁶ U te u la ong ha ki, “Balei ba phi long kiba sheptieng, A phi kiba rit jingngeit?” Ynda kumta, u la khie, u la sneng ïa ka lyer bad ïa ka duriaw ruh; te ka la long kaba jai jai eh.

²⁷ Kita ki briew te ki la kyndit, ki ïa-ong, “Uba kumno une, ba ki lyer ruh bad ka duriaw ki ïakohnguh ïa u!”

U Jisu u pynkhiah ar ngut kiba shong ksuid

²⁸ Te haba u la wan sha shiliang sha ka ri ki Gadara, la ïawan tan ïa u ar ngut kiba shong ksuid, kiba da mih noh na ki maw jingtep, kiba runar eh, katba ym don uba shlan ban leit na kata ka lynti.

²⁹ Ha khmih ruh, ki la ïapyrta noh, ki da ong, “Me donkam aïu bad ngi, ko Jisu, U Khun U Blei? me la wan shane mynshuwa ka aïom ban pynkordit ïa ngi?”

³⁰ Hynrei, la don kham jngai na ki, shi kynhun bah ki sniang, kiba ïabam phlang.

³¹ Kita ki ksuid te ki la ïakyrpad ïa u, ki da ong, “Lada me beh noh ïa ngi, to ai ïa ngi ban leit noh ha kato ka shi kynhun ki sniang.”

³² U la ong te ha ki, “To khie leit.” Te haba ki la ïamih noh, ki la ïaleit ha kata ka shi kynhun ki sniang; ha khmih ruh, kata ka shi kynhun ki sniang baroh ki la ïaphet ïap arsut ïa ka riat sha ka duriaw, bad ki la ïap noh ha ki um.

³³ Te kita kiba ïa-ap ïa ki, ki la ïaphet noh; bad haba ki la ïapoi ha kata ka shnong, ki la ïathuh ïa kiei kiei baroh, bad ïa kaba la jia ha kita kiba shong ksuid ruh.

³⁴ Ha khmih ruh, kata ka shnong baroh ka la mih ïa ka ban shem ïa U Jisu; te haba ki la ïohi ïa u, ki la ïaduwai ba un leit noh na ki phang jong ki.