MATHAÏOS 7 - KA BAIBL

Kaba bishar ïa kiwei

¹ “Wat bishar, ba yn ym bishar ïa phi.

² Naba da ka jingbishar ba phi bishar, yn bishar ïa phi: bad da ka jingthew ba phi thew, yn thew pat ïa phi.

³ Balei ruh ba me khmih ïa u thngiat uba ha ka khmat u paralok jong me, hynrei, mem sngew ïa ka khung kaba ha ka khmat jong me hi?

⁴ Lane kumno ba me ong ha u paralok jong me, ‘To shah ba ngan khlaw noh ïa u thngiat na ka khmat jong me;’ ha khmih ruh, ka khung ka don ha ka khmat jong me hi?

⁵ Me uba arsap! khlaw noh shuwa ïa ka khung na ka khmat jong me hi; kumta te men ïohi bha ban khlaw noh ïa u thngiat na ka khmat u paralok jong me.

⁶ “Wat ai ïa ka bakhuid ha ki ksew, lymne wat bred ïa ki mawlynnai jong phi ha khmat ki sniang, ba ïoh kin ïuh ïa ki hapoh ki kjat jong ki, bad kin phai pat, kin tar ruh ïa phi.

Pan, wad bad tied

⁷ “To pan, te yn sa ai ha phi; to wad, te phin sa shem; to tied, te yn sa plie ïa phi.

⁸ Naba baroh uba pan, u pdiang; bad uba wad, u shem; bad ïa uba tied, yn plie.

⁹ Lane uei u briew uba na phi, lada u khun jong u un pan ïa u kpu, u ban ai da u maw ha u;

¹⁰ lane lada un pan ïa ka dohkha, un ai da u bseiñ ha u?

¹¹ Namar kata, lada phi, kiba long bymman, phi tip ïa ka ban ai ïa ki jingai babha ha ki khun jong phi, kaba katno tam ba U Kpa jong phi uba ha bneng un ai ïa kiei kiei ruh ki babha ha kita kiba pan na u?

¹² “Namar kata, ïa kiei kiei baroh kiba phi ïamon ba ki briew kin leh ha phi, kumta, to leh ma phi ruh ha ki: naba kane ka long Ka Hukum bad Ki Nongïathuhlypa.

Ka khyrdop kaba khim

¹³ “To bsut lyngba ïa ka khyrdop bakhim: naba ka kylluid ka khyrdop, kaba jlan ruh ka lynti, kaba lam sha ka ban jot; bun ruh kiba ïabsut na kata.

¹⁴ Hynrei, A kaba khim kata ka khyrdop; A kaba wit ruh kata ka lynti kaba lam sha ka ban im! A ki long khyndiat ruh kiba shem ïa kata!

U dieng bad ki soh jong u

¹⁵ “To sumar na ki nongïathuhlypa balamler, kiba ïawan ha phi ha ki jaiñkup snieh langbrot, hynrei, hapoh ki long ki suri bapynjot.

¹⁶ Na ki soh jong ki phin ithuh ïa ki. Ki briew ki ju kheit ïa ki soh Waiñ na ki dieng shiah, lane ïa ki soh Dumbur na ki ñiut shiah?

¹⁷ Kumta, u dieng babha baroh u sei ki soh babha; hynrei, u dieng bymman u sei ki soh bymman.

¹⁸ U dieng babha um lah ban sei ki soh bymman, lymne u dieng bymman um lah ban sei ki soh babha.

¹⁹ Ïa u dieng baroh u bymsei ki soh babha yn khet noh, yn bred ruh ïa u ha ka ding.

²⁰ Naba kumta, na ki soh jong ki phin ithuh ïa ki.

Ngam ju la ithuh ïa phi

²¹ “Ym u briew baroh uba ong ha nga, ‘A Trai, A Trai’, u ban ïoh leit hapoh ka hima ki bneng; hynrei, uta keiñ uba leh ïa ka mon U Kpa jong nga uba ha bneng.

²² Shibun kin ïa-ong ha nga ha kata ka sngi, ‘A Trai, A Trai, ngi ngim shym la ïalap ha ka kyrteng jong me? Ngi ngim shym la beh noh ïa ki ksuid ha ka kyrteng jong me? Ngi ngim shym la leh shibun ki kambah ruh ha ka kyrteng jong me?’

²³ Ynda kumta te, nga ruh ngan ong pyrshah ha ki: Ngam ju la ithuh ïa phi; khie leit noh na nga, phi kiba ju trei bymman.

Ar jait ki nongrim

²⁴ “Te mano mano baroh uba sngew ïa kine ki ktien jong nga, bad uba leh ïa ki, ngan tharai ïa u kum u briew u bastad, uba la tei ïa ka ïing jong u halor u mawsiang:

²⁵ te u slap u la hap, bad ki wah ki la ïashlei, bad ki lyer ki la ïabeh, bad ki la shoh ïa kata ka ïing; te kam shym la kyllon noh: naba la pynshong nongrim ïa ka halor u mawsiang.

²⁶ Hynrei, mano mano baroh uba sngew ïa kine ki ktien jong nga, bad u bymleh ïa ki, yn tharai ïa u kum u briew ba-bieit, uba la tei ïa ka ïing jong u halor u shyiap:

²⁷ u slap te u la hap, bad ki wah ki la ïashlei, bad ki lyer ki la ïabeh, bad ki la shoh ïa kata ka ïing; te ka la kyllon: bad ka jingkyllon jong ka, ka la long kaba khraw.”

Ka iktiar U Jisu

²⁸ Ka la jia ruh, haba U Jisu u la wai noh ïa kine ki ktien, ba kita ki paidbah ki la ïasngewkyndit thred na ka jinghikai jong u:

²⁹ naba u la hikai ïa ki kum uba don bor, bym kum ki nongthoh te.