MATHAÏOS 6 - KA BAIBL

Ka jinghikai shaphang ka jingai isynei

¹ “To sumar ban ym leh ïa ka babha jong phi ha khmat ki briew, khnang ba kin khmih ïa phi: lymda kumta, phim don nong ha U Kpa jong phi uba ha bneng.

² “Namar kata, haba me leh ka jingai isynei, wat put ka ronsing ha shuwa jong me, kumba leh ki nongarsap ha ki synagog bad ha ki lynti shnong, ba kin ïoh burom na ki briew. Shisha nga ong ha phi, ki la ïoh ïa la ka nong.

³ Hynrei, me, haba me da leh ka jingai isynei, wat ai ba ka kti kadiang jong me kan tip aïu ba ka leh ka kti kamon jong me;

⁴ ba kata ka jingai isynei jong me kan ïoh long ha kaba rieh: bad U Kpa jong me uba ïohi ha kaba rieh un ai nong ha me ha kaba paw.”

Ka jinghikai shaphang ka jingduwai

⁵ “Haba me duwai ruh, wat long kum ki nongarsap: naba ki ieit ban ïeng kyrpad ha ki synagog bad ha ki dong ki lad, ba kin ïoh pynpaw ha ki briew. Shisha nga ong ha phi, ki la ïoh ïa la ka nong.

⁶ Hynrei, me, haba me duwai, to leit rung sha la ka pulit, bad haba me la khang ïa la ka jingkhang, to kyrpad ïa U Kpa jong me uba ha kaba rieh; te U Kpa jong me uba ïohi ha kaba rieh un ai nong ha me ha kaba paw.

⁷ “Bad haba phi duwai, wat bun ktien bieit kum ki Jentil: naba ki ïamut ba yn sngew ïa ki namar kaba bun ktien jong ki.

⁸ Namar kata, wat long kum kita: naba U Kpa jong phi u tip ïa kaei ruh ba phi donkam, mynshuwa ba phin pan na u.

⁹ Namar kata, phin duwai kumne: “Ko Kpa jong ngi uba ha bneng, long bakhuid ka kyrteng jong me.

¹⁰ Wan ka hima jong me. Long ka mon jong me ha ka khyndew, kumba ha bneng.

¹¹ To ai ha ngi mynta ka jingbam jong ngi kaba ha la ka sngi ka sngi.

¹² To map ruh ïa ngi ïa ki ryngkang jong ngi, kumba ngi ruh ngi map ïa kiba leh sniew ïa ngi.

¹³ To wat ïalam ïa ngi sha ka jingpynshoi ruh, hynrei, sumar ïa ngi na ka basniew. Naba ka jong me long ka hima, bad ka bor, bad ka burom ruh, ha la ka rta: Amen.

¹⁴ “Naba lada phi map ïa ki briew ïa ki ryngkang jong ki, U Kpa jong phi uba ha bneng un map ruh ïa phi:

¹⁵ hynrei, lada phim map ïa ki briew ïa ki ryngkang jong ki, U Kpa jong phi ruh un ym map ïa ki ryngkang jong phi.”

Ka jinghikai shaphang kaba shah jingit

¹⁶ “Haba phi shah jingit ruh, wat long kiba 'matsngewsih kum ki nongarsap; naba ki pynkynriang ïa ki khmat jong ki, ba kin pynpaw ha ki briew ba ki shah jingit. Shisha nga ong ha phi, ki la ïoh ïa la ka nong.

¹⁷ Hynrei, me, haba me shah jingit, to sleh ïa la ka khlieh, bad bta ïa la ka khmat;

¹⁸ ba kumta men ym pynpaw ha ki briew ba me shah jingit, hynrei, ha U Kpa jong me uba ha kaba rieh; bad U Kpa jong me uba ïohi ha kaba rieh un ai nong ha me ha kaba paw.”

Ki spah ha bneng

¹⁹ “Wat kynshew ki spah ïa lade ha ka khyndew, ha kaba bam ka khñiang bad ka sarang, bad sha kaba ki nongtuh ki pynpei, ki tuh ruh:

²⁰ hynrei, phin kynshew ki spah ïa lade ha bneng, ha kaba kam bam lymne ka khñiang lymne ka sarang, bad sha kaba ki nongtuh kim pynpei lymne kim tuh:

²¹ naba ha kaba long ka spah jong phi, hangta ruh kan long ka dohnud jong phi.”

Ka jingshai jong ka met

²² “Ka khmat ka long ka sharak ka met: namar kata, lada ka khmat jong me ka long sngur, ka met jong me baroh kan shai bha.

²³ Hynrei, lada ka khmat jong me ka long jngut, ka met jong me baroh kan long dum. Namar kata, lada ka jingshai kaba ha me ka long dum, kata kaba dum kaba katno!”

U Blei bad ka spah

²⁴ “Ym don uba lah ban shakri ar ngut ki kynrad; naba un isih ïa uwei, bad un ieit ïa uwei; lane un bat ïa uwei, bad un lyndet ïa uwei. Phim lah ban shakri ïa U Blei bad ïa ka spah.”

Ka jingkhuslai ïa ka jingim bad ka jingsumar U Blei

²⁵ “Namar kata, nga ong ha phi, wat khuslai ïa la ka jingim, kaei ba phin bam, lane kaei ba phin dih; lymne ïa ka met jong phi, kaei ba phin kup. Ka jingim kam long kaba kham kor ïa ka jingbam, ka met ruh ïa ka jaiñkup?

²⁶ To khmih thuh ïa ki sim bneng, ba kim ïabet, lymne kim ïa-ot, lymne kim ïalum ha ki thiar; hynrei, pynban, U Kpa jong phi uba ha bneng u bsa ïa ki. Phi te phim long kiba kham kor shibun ïa ki?

²⁷ Uno te na phi, haba u da khuslai ruh, uba lah ban pyntam shi pruh ïa la ka rynïeng?

²⁸ Balei ba phi khuslai shaphang kaba kup ruh? To pyrkhat ïa ki 'tiew Lili ka ryngkew, katno ki man bha; kim trei, lymne kim thir;

²⁹ hynrei, nga ong ha phi, ba wat u Solomon ha ka burom jong u baroh um shym la kup kum uwei na kine.

³⁰ Lada U Blei te u pynkup kumta ïa u 'hur ryngkew, uba mynta u long, lashai te la bred ha ka lawar ding, kaba katno tam ïa phi, A phi kiba rit ka jingngeit!

³¹ Namar kata, wat khuslai, da kaba ong, ‘Kaei ba ngin bam?’ lane, ‘Kaei ba ngin dih?’ lane, ‘Kaei ba ngin kup?’

³² naba ïa kita kiei kiei baroh, ki Jentil ki ïawad; naba U Kpa jong phi uba ha bneng u tip ba phi donkam ïa kine kiei kiei baroh.

³³ Hynrei, phin ïawad shuwa ïa ka hima U Blei, bad ïa ka hok jong u: te ïa kine kiei kiei baroh, yn sa ai lang tam ha phi.

³⁴ “Namar kata, wat khuslai na ka bynta kaba lashai, naba kata kaba lashai kan khuslai na ka bynta la ka jong. Ïa ka sngi ka biang la ka jong ka basniew.”