MATHAÏOS 4 - KA BAIBL

Ka jingpynshoi ïa U Jisu

¹ Ynda kumta, la ïalam noh ïa U Jisu da U Mynsiem sha ka ri khlaw, ba yn pynshoi ïa u da u Soitan.

² Ynda U la shah jingit sawphew sngi bad sawphew miet, hadien kata, U la thngan.

³ Te haba uta u nongpynshoi u la wan ha U, u la ong, “Lada me long U Khun U Blei, to hukum ïa kine ki maw ba kin long ki kpu.”

⁴ Hynrei, U la ïathuh bad U la ong, “La thoh: “ ‘Bym tang da u kpu hi ba un im u briew, hynrei, da ki ktien baroh ba mih noh na ka shyntur U Blei.’ ”

⁵ Ynda kumta, u Soitan u la ïalam ïa U sha ka nongbah ka bakhuid; bad u la buh ïa U halor jrong ka dong ka templ,

⁶ bad u la ong ha U, “Lada me long U Khun U Blei, to pynnoh ïa lade; naba la thoh: “ ‘Un ai hukum ïa ki angel jong u shaphang jong me’: “bad “ ‘kin rah ïa me ha ki kti jong ki, ba ïoh kumno kumno me jynthut ïa la ka kjat ha u maw.’ ”

⁷ U Jisu u la ong ha u, “La thoh pat: ‘Men ym tynjuh ïa U Trai uba U Blei jong me.’ ”

⁸ U Soitan u la ïalam pat ïa U sha u lum bajrong eh, bad u la pyni ha U ïa ki hima ka pyrthei baroh, bad ïa ka burom jong ki ruh;

⁹ bad u la ong ha U, “Kita kiei kiei baroh ngan sa ai ha me, lada men dem ban mane ïa nga.”

¹⁰ Ynda kumta, U Jisu u la ong ha u, “Khie leit noh, me u Soitan: naba la thoh: “ ‘Men mane ïa U Trai uba U Blei jong me, tang ïa u hi ruh men shakri.’ ”

¹¹ Haba kumta, u Soitan u la iehnoh ïa U; ha khmih ruh, ki angel ki la ïawan bad ki la shakri ïa U.

U Jisu u sdang ïa ka jingïalap ha Galilaïa

¹² Haba U Jisu u la ïohsngew ba la set byndi ïa u Ïoannis, u la leit noh sha Galilaïa.

¹³ Te haba u la iehnoh ïa ka Nasaret, u la wan shong sah ha Kapernam, kaba harud ka duriaw, ha ki phang ka Sabulon bad ka Naphtali:

¹⁴ ba yn pyndep ïa kata ba la ong da u Isaïah u nongïathuhlypa, u da ong,

¹⁵ “Ka ri Sabulon, bad ka ri Naphtali, shaphang ka duriaw, ha shiliang ka Jordan, ka Galilaïa ki Jentil,

¹⁶ ki briew kiba shong ha kaba dum ki la ïohi ïa ka jingshai bakhraw, bad ha kita kiba shong ha ka ri bad ha ka syrngiew ka jingïap, la mih ka jingshai.”

¹⁷ Naduh kata, U Jisu u la sdang ban ïalap, bad ban ong, “To kylla-ka-bamut; naba ka hima ki bneng ka la jan.”

U Jisu u khot ïa ki saw ngut ki nongtong dohkha

¹⁸ Haba U Jisu u ïaid harud ka duriaw Galilaïa, u la ïohi ar ngut shipara, u Simon ïa uba khot “u Petros”, bad u Andriw u para jong u, ba ki dang ïabred ïa ka jar ha kata ka duriaw; naba ki ju long ki nongtong dohkha.

¹⁹ U la ong te ha ki, “To ale nadien jong nga, te ngan pynlong ïa phi ki nongtong briew.”

²⁰ Kumta, haba ki la iehnoh dak ïa ki jar, ki la ïabud ïa u.

²¹ Te haba u la leit noh nangta, u la ïohi ar ngut kiwei pat kiba shipara, u Jakob u khun u Sebedi, bad u Ïoannis u para jong u, ha ka lieng bad u Sebedi u kpa jong ki, ba ki dang ïashna ïa ki jar jong ki, bad u la khot ïa ki.

²² Ki ruh de, haba ki la iehnoh dak ïa ka lieng bad ïa u kpa jong ki, ki la ïabud ïa u.

U Jisu u hikai, u ïalap bad u pynkhiah

²³ Bad U Jisu u la leit kylleng ka Galilaïa baroh, u da hikai ha ki synagog jong ki, bad u da ïalap ïa ka gospel ka hima, u da pynkhiah de ïa ki jingpang baroh bad ïa ki jingkhrew baroh ruh ha ki briew.

²⁴ Te ka nam jong u ka la phriang ïa ka Syria baroh: bad ki la ïawallam ha u baroh kiba la pang, ïa kiba la ngat da ki bun jait ki jingpang bad ki jingkordit, bad ïa kiba shong ksuid, bad ïa ki bapang bhur, bad ïa ki bapang ïapshiliang de: te u la pynkhiah ïa ki.

²⁵ Ki la ïabud ruh ïa u ki paidbah byllien kiba na Galilaïa bad na Dekapolis bad na Jerusalem bad na Judia bad na sha shiliang ka Jordan ruh de.