MATHAÏOS 3 - KA BAIBL

Ka jingïalap u Ïoannis Nongpynbaptis

¹ Ha kita ki sngi, u la wan u Ïoannis u Nongpynbaptis, u da ïalap ha ka ri khlaw Judia,

² u da ong, “To kylla-ka-bamut; naba ka hima ki bneng ka la jan.”

³ Naba une u long uta, ba la ong shaphang jong u da u Isaïah u nongïathuhlypa, u da ong, “Ka ktien uba pyrta ha ka ri khlaw, ‘Phin pynkhreh ïa ka lynti bah U Trai, phin pynbeit ïa ki lynti jong u.’ ”

⁴ Te uta u Ïoannis u la don ka jaiñkup jong u na u shñiuh ut, bad ka panpoh snieh ha ka syngkai jong u; ka jingbam jong u ruh ka la long da ki puit bad ka ngap khlaw.

⁵ Ynda kumta, ki la leit noh ha u ka Jerusalem, bad ka Judia baroh, bad baroh ka ri kylleng ka Jordan;

⁶ bad la pynbaptis ïa ki da u ha wah Jordan; ki da ïaphla noh ïa ki pop jong ki.

⁷ Hynrei, haba u la ïohi ba bun na ki Pharisi bad ki Saddusi ki ïawan sha ka jingbaptis jong u, u la ong ha ki, “A phi ki khun ki ksiew ki bseiñ, uei ba la maham ïa phi ban phet ïap noh na kata ka jingbitar ka ban sa lap?

⁸ Naba kumta to sei ïa u soh uba dei biang ïa ka jingkylla-ka-bamut:

⁹ Bad wat mut ban ong ha lade, ‘Ngi don u Abraham uba long u kpa jong ngi’: naba nga ong ha phi, ba U Blei u lah na kine ki maw ban pynmih khun ïa u Abraham.

¹⁰ Hynrei, mynta ruh la thew ïa ka wait ha u thied ki dieng; namar kata, ïa u dieng baroh u bymsei soh babha yn khet noh, bad yn bred sha ka ding.

¹¹ “Nga shisha nga pynbaptis ïa phi da ka um ïa ka ban kylla-ka-bamut: hynrei, uta uba wan nadien jong nga u long uba kham khraw bor ïa nga, uba kam dei ïa nga ban rah wat tang ïa ki juti jong u: uta keiñ, un pynbaptis ïa phi da U Mynsiem Bakhuid bad da ka ding:

¹² uba ka jingpeh jong u ka ha ka kti jong u, un pynkhuid bha ruh ïa ka kyntem jong u; bad un lum ïa u Kew jong u ha la ka thiar; hynrei, un thang ïa u stait da ka ding bymjulip.”

Ka jingpynbaptis ïa U Jisu

¹³ Ynda kumta, U Jisu u la wan na Galilaïa sha wah Jordan ha u Ïoannis, ba yn ïoh pynbaptis da u.

¹⁴ Hynrei, u Ïoannis u la khang ïa U, u da ong, “Nga donkam ba yn pynbaptis ïa nga da me, te me wan pynban ha nga?”

¹⁵ U Jisu te u la ïathuh bad U la ong ha u, “To shah mynta: naba kumne keiñ ka long kaba dei ïa ngi ban pyndep ïa ka hok baroh.” Ynda kumta, u la shah ïa u.

¹⁶ U Jisu te, ynda la pynbaptis ïa u, u la kiew noh kumne kumne na ka um: ha khmih ruh, la plie ïa ki bneng ïa u, bad u la ïohi ïa U Mynsiem U Blei ba u da hiar kum ka paro, ba u da wan shong ruh ha u.

¹⁷ Ha khmih ruh ka ktien na ki bneng, ka da ong, “Une u long U Khun jong nga uba ieit, ha uba nga sngewbha eh.”