MATHAÏOS 28 - KA BAIBL

Ka jingmihpat U Jisu

¹ Hadien ka Sabbaton te, haba ka sa shai ka sngi nyngkong jong ka taïew, ka Mari ka nong Magdala ka la wan bad kata kawei ka Mari ban jngoh ïa ka jingtep.

² Ha khmih ruh, la khih jumai bakhraw; naba u angel U Trai u la lah hiar na bneng, bad haba u la wan u la pyntyllun noh ïa uta u mawkhang, bad u la shong halor jong u.

³ Ka khmat jong u te ka la long kum ka leilieh, bad ka jaiñ jong u ka la lieh kat ka ïor.

⁴ Na kaba sheptieng te ïa u, kita ki nongap ki la kyiuh, bad ki la long kum ki baïap.

⁵ Hynrei, uta u angel u da ïathuh u la ong ha kita ki kynthei, “To wat sheptieng phi; naba nga tip ba phi ïawad ïa U Jisu ïa uba la sahnarphna:

⁶ um don hangne, naba u la mih noh, kumba u la ong. Ale, to khmih ïa ka jaka ha kaba u la thiah U Trai.

⁷ To khie noh kloi kloi ruh, to ïathuh ruh ha ki synran jong u, ba u la mih noh na ki baïap; ha khmih ruh, u leit sha shuwa jong phi sha Galilaïa; hangta phin ïohi ïa u: ha khmih, nga la ïathuh ha phi.”

⁸ Kumta, haba ki la leit noh kloi na kata ka jingtep, da kaba sheptieng bad da ka jingkmen bakhraw, ki la ïaphet noh ban ïathuh ha ki synran jong u.

⁹ Te haba ki dang ïaleit ban ïathuh ha ki synran jong u, ha khmih ruh, U Jisu u la wan tan ïa ki, u la ong, “Khublei.” Haba ki la wan hajan te, ki la ïabat ïa ki kjat jong u, bad ki la ïamane dem ïa u.

¹⁰ Ynda kumta, U Jisu u la ong ha ki, “To wat sheptieng! to khie leit noh, to ïathuh ha ki para jong nga, ba kin leit sha Galilaïa, hangta ruh kin ïohi ïa nga.”

Ki nongap ki ïathuh kaei ba la jia

¹¹ Haba ki la dang leit ruh, ha khmih, kiba na kiba ap ki la wan sha shnong, bad ki la ïathuh ha ki rangbah lyngdoh ïa kiei kiei baroh kiba la long.

¹² Te haba ki la ïalum bad ki tymmen basan, bad ba ki la ïasylla, ki la ai sbai shibun ha kita ki shipai,

¹³ ki da ong, “To ïathuh, ba ki synran jong u ki la wan tuh ïa u mynmiet haba ngi dang ïohthiah.

¹⁴ Te lada u lyngskor un ïohsngew ïa kane, ngin khroh ïa u, bad ngin da ïa phi.”

¹⁵ Kumta, haba ki la shim ïa u sbai, ki la leh kumba la hikai ïa ki; te ïa kane ka ktien la pynbna hapdeng ki Jiw haduh mynta.

U Jisu u mihpaw ha ki synran jong u

¹⁶ Ki khatwei ngut ki synran te ki la leit noh sha Galilaïa, sha u lum sha kaba U Jisu u la ïabuh bad ki.

¹⁷ Haba ki la ïohi te ïa u, ki la ïamane dem ïa u, hynrei, don kiba la sngew-artatien.

¹⁸ U Jisu te u da wan u la kren ha ki, u da ong, “La ai ha nga ka bor baroh ha bneng bad ha ka khyndew:

¹⁹ namar kata keiñ, to khie da leit noh ma phi, to pynlong synran ïa ki bynriew baroh, da pynbaptis ïa ki ha ka kyrteng ka jong U Kpa, bad ka jong U Khun, bad ka jong U Mynsiem Bakhuid,

²⁰ da hikai ïa ki ban sumar ïa kiei kiei baroh kat kiba nga la hukum ïa phi. Ha khmih ruh, nga, nga long ryngkat bad phi ha la ka sngi, haduh kaba wai noh ka pyrthei.”