MATHAÏOS 27 - KA BAIBL

U Jisu ha khmat u Pilat

¹ Haba ka la shai te, ki rangbah lyngdoh baroh bad ki tymmen basan jong u paidlang ki la ïasylla shaphang U Jisu, ïa ka ban pynïap ïa u.

² Te haba ki la khum ïa u, ki la ïalam noh, bad ki la ai noh ruh ïa u ha u Pontios Pilat uba u lyngskor.

Ka jingïap u Judas

³ Mynba kumta u Judas, uba la die noh ïa U, haba u la ïohi ba ki la pynrem ïa U, u la kylla-ka-bamut, bad u la wallam pat ïa kita ki laiphew ki sbai ha ki rangbah lyngdoh bad ha ki tymmen basan,

⁴ u da ong, “Nga la leh pop haba nga la die noh ïa ka snam balui lui.” Ki te ki la ong, “Kata ka dei aïu ïa ngi? khmih hi ma me keiñ.”

⁵ Haba u la bred noh te ïa kita ki sbai ha ka ïing U Blei, u la leit noh bad u la leit sdien ïa lade.

⁶ Haba kita ki rangbah lyngdoh te ki la shim ïa kita ki sbai, ki la ong, “Ym dei ban buh ïa ki ha ka jingkynshew bakyntang, naba ka long ka dor ka snam.”

⁷ Hynrei, haba ki la ïasylla, ki la thied da ki, ïa ka lyngkha u nongthaw khiew, ïa ka ban long ka jaka tep ïa ki nongwei.

⁸ Naba kumta la ju khot ïa kata ka lyngkha, “Ka lyngkha ka snam”, haduh kane ka sngi.

⁹ Mynkata la pyndep ïa kata ba la ong da u Jeremaïah u nongïathuhlypa, u da ong: “Ki la shim ruh ïa ki laiphew ki sbai, ka dor jong uta uba ki la kheiñ dor, ïa uba kiba na ki khun Israel ki la kheiñ dor;

¹⁰ bad ki la ai ïa ki na ka bynta ka lyngkha u nongthaw khiew, kumba U Trai u la buh ïa nga.”

U Pilat u tohkit ïa U Jisu

¹¹ U Jisu te u la ïeng ha khmat uta u lyngskor: bad u lyngskor u la kylli ïa U, u da ong, “Me long U Syiem ki Jiw?” Te U Jisu u la ïathuh ha u, “Me la ong.”

¹² Hynrei, ha kaba mudui ïa U da kita ki rangbah lyngdoh bad kita ki tymmen basan, um shym ïathuh ei ei ruh em.

¹³ Ynda kumta, u Pilat u la ong ha U, “Mem sngew ïa kaba katno kiei kiei ruh ba ki ïamudui ïa me?”

¹⁴ Um shym la ïathuh te ha u wat kawei ka ktien ruh, kat ban pynkyndit ïa uta u lyngskor shikatdei eh.

La aiti noh ïa U Jisu ban sahnarphna

¹⁵ Te ha kata Ka Jingkhawai Niam, u lyngskor u ju pyllait ha ki paidbah ïa uwei uba la set byndi kat uba ki ïamon.

¹⁶ Mynkata te ki la don uwei u koidi u basniew eh ka nam, ïa uba ki khot “u Barabbas”.

¹⁷ Namar kata, haba ki la ïalang, u Pilat u la ong ha ki, “Phi mon ba ngan pyllait ïano ha phi? ïa u Barabbas, ne ïa U Jisu ïa uba ki khot ‘U Khrist’?”

¹⁸ Naba u la tip ba na kaba shun ki la ai noh ïa u.

¹⁹ Haba u dang shong te ha ka jingshong bishar, ka tnga jong u ka la phah ha u, ka da ong, “Wat leh ei ei ruh em ïa uta u bahok, naba nga la shah shibun ha ka jingphohsniew mynta na ka bynta jong u.”

²⁰ Hynrei, kita ki rangbah lyngdoh bad kita ki tymmen basan ki la ïa-pynkohnguh ïa ki paidbah ba kin pan ïa u Barabbas, hynrei, ba kin pynïap ïa U Jisu.

²¹ Uta u lyngskor te u da ïathuh u la ong ha ki, “Phi mon ba ngan pyllait ha phi ïano na kine ar ngut?” Ki te ki la ong, “Ïa u Barabbas.”

²² U Pilat u la ong ha ki, “Haba kumta, ngan leh kumno ïa U Jisu, ïa uba ki khot ‘U Khrist’?” Ki ong baroh ha u, “To ai ba yn sahnarphna ïa U.”

²³ Uta u lyngskor u la ong te, “Namar ba u la leh ka bymman aïu?” Ki te ki la nang ïapyrta jam eh, ki ïa-ong, “To ai ba yn sahnarphna ïa U.”

²⁴ Haba u Pilat u ïohi te ba um lah ei ei ruh, hynrei, tang ba long ka jingkhihwin pynban, u la shim ka um, bad u la thet ïa la ki kti ha khmat uta u paidbah, u da ong, “Ngam don jingrem na ka snam une u bahok: phin khmih hi ma phi.”

²⁵ Ki briew baroh ki da ïathuh ki la ong ruh, “To ka snam jong U kan long halor jong ngi, bad halor ki khun jong ngi.”

²⁶ Ynda kumta, u la pyllait ïa u Barabbas ha ki; hynrei, ïa U Jisu u la sympat, bad u la aiti noh ïa U ba yn sahnarphna.

Ki shipai ki pyrthuhbeiñ ïa U Jisu

²⁷ Ynda kumta, ki shipai jong uta u lyngskor ki la ïalam noh ïa U Jisu ha ka ïingbah u lyngskor, bad ki la ïalum ha U baroh shi kynhun.

²⁸ Te haba ki la loit noh ïa ki jaiñ jong U, ki la pynkup ki jaiñ saw ha U.

²⁹ Bad haba ki la thain ïa ka pansngiat da ki shiah, ki la pynphong halor ka khlieh jong U, bad ki la buh u dieng ha ka kti kamon jong U, bad haba ki la dem khohsiew ha khmat jong U, ki la pyrthuhbeiñ ïa U, ki ïa-ong, “Khublei, U Syiem ki Jiw!”

³⁰ Bad haba ki la bynthiew ha U, ki la shim ïa uta u dieng bad ki la shoh ïa ka khlieh jong U.

³¹ Bad haba ki la lah pyrthuhbeiñ ïa U, ki la loit noh ïa kata ka jaiñkup na U, bad ki la pynkup pat ïa U da ki jaiñ jong U hi, bad ki la ïalam noh ïa U ïa ka ban sahnarphna.

Kaba sahnarphna ïa U Jisu

³² Haba ki dang ïamih noh te, ki la shem ïa u briew u nong Kyrini, uba kyrteng “u Simon”; ïa une ki la ïa-pynbor ba un leit bah ïa ka diengphna jong U.

³³ Haba ki la poi te ha ka jaka ba ki khot “Golgotha”, kaba haba la batai, “Ka jaka Maloi khlieh”,

³⁴ ki la ai ha U ïa ka sirka kaba la ïakhleh bad ka bakthang ban dih; te haba U la mad, um treh dih.

³⁵ Te haba ki la sahnarphna ïa U, ki la ïabynta ïa ki jaiñ jong U, ki da ïakhalai, ba yn pyndep ïa kata ba la ong da u nongïathuhlypa: “Ki la ïabynta ïa ki jaiñ jong nga hapdeng jong ki, bad ki la ïakhalai ïa ka jingphong jong nga.”

³⁶ Te haba ki da ïashong, ki la ïa-ap ïa U hangta.

³⁷ Bad ki la buh haneng ka khlieh jong U ïa ka daw ka jingmudui ïa U ba la thoh: “Une U Long U Jisu U Syiem Ki Jiw.”

³⁸ Ynda kumta, ki la ïasahnarphna ïa ki ar ngut ki dakaid lem bad U, uwei sha kamon, uwei ruh sha kadiang.

³⁹ Kita kiba ïaid shata te ki la krenbeiñ ïa U, ki da kyrngah ïa ki khlieh jong ki,

⁴⁰ bad ki ïa-ong, “Me uba pynduh ïa ka templ, bad uba tei lai sngi ïa ka, to pynim ïa lade! lada me long U Khun U Blei, to hiar noh na kato ka diengphna!”

⁴¹ Kumjuh ruh ki rangbah lyngdoh, haba ki ïapyrthuh beiñ lem bad ki nongthoh bad ki tymmen basan, ki la ïa-ong,

⁴² “U la pynim ïa kiwei, ïa lade pleng um lah ban pynim! lada u long U Syiem ki Israel, to un hiar mynta na kata ka diengphna, te ngin ngeit ha u!

⁴³ U la shaniah ha U Blei, to un pyllait ïa u mynta, lada u mon bha ïa u! naba u la ong, ‘Nga long U Khun U Blei.’ ”

⁴⁴ Ïa kajuh de kita ki dakaid ruh ïa kiba la sahnarphna lem bad u ki la ïakrenbeiñ ïa u.

Ka jingïap U Jisu

⁴⁵ Te ka jingdum ka la don ha ka khyndew baroh naduh kaba hynriew baje haduh kaba khyndai baje.

⁴⁶ Te hamar kaba khyndai baje, U Jisu u la pyrta da ka ktien kaba jam, u da ong, “Eli, Eli, lama sabakhthani” (kata kaba long, “U Blei jong nga, U Blei jong nga, balei ba me la iehnoh ïa nga?”)

⁴⁷ Te kiba na kita kiba ïaïeng hangta, haba ki la ïohsngew, ki la ong, “Une u khot ïa u Elias.”

⁴⁸ Te kumne kumne ruh haba la phet uwei na ki, bad haba u la shim ïa ka spanj, bad haba u la pyndap da ka bajew, bad ba u la spaiñ ha u dieng, u la pyndih ïa U.

⁴⁹ Kiwei te ki da ong, “To ieh, ba ngin ïohi lada u wan u Elias ban pynim ïa u.”

⁵⁰ U Jisu te haba u la pyrta pat da ka ktien bajam, u la ai noh ïa la ka mynsiem.

⁵¹ Ha khmih ruh, ka jingkah ha ka templ ka la kad ar bynta, naduh na jrong haduh ha tbian, bad ka khyndew ka la khynñiuh, bad ki mawsiang ki la pdang,

⁵² bad ki jingtep ki la ang, bad shibun ki met jong ki riewkhuid kiba la ïohthiah ki la mihpat,

⁵³ bad haba ki la mih noh te na kita ki jingtep hadien ka jingmihpat jong u, ki la leit shapoh kata ka nongbah ka bakhuid, bad ki la paw ha kiba bun.

⁵⁴ Te haba u rangbah shispah bad kita kiba bad u, kiba ïa-ap ïa U Jisu, ki la ïohi ïa ka jingkhynñiuh ka khyndew, bad ïa kiei kiei ruh kiba la long, ki la ïasheptieng shikatdei eh, ki ïa-ong, “Shisha une u la long U Khun U Blei.”

⁵⁵ Te la don hangto shibun ki kynthei kiba jngoh na jngai, kiba la wan bud ïa U Jisu na Galilaïa, ki da shakri ïa u:

⁵⁶ hapdeng jong ki la don ka Mari ka nong Magdala, bad ka Mari ka kmie u Jakob bad u Josis, bad ka kmie ki khun u Sebedi.

Kaba tep ïa U Jisu

⁵⁷ Bad haba la janmiet, la wan u briew u bariewspah uba na Arimathaïa, ïa uba ki khot “u Joseph”, uba la long hi ruh u synran jong U Jisu.

⁵⁸ Une, haba u la leit ha u Pilat, u la pan ïa ka met U Jisu. Ynda kumta, u Pilat u la hukum ban ai noh ïa ka met.

⁵⁹ Haba u Joseph u la shim te ïa ka met, u la sop spaiñ ïa ka da ka jaiñ linen bani ka bakhuid,

⁶⁰ bad u la buh ïa ka ha ka jingtep thymmai jong u, ïa kaba u la tih ha u mawsiang; bad haba u la pyntyllun ïa u maw bakhraw ha ka jingkhang ka jingtep, u la leit noh.

⁶¹ La don ruh hangta, ka Mari ka nong Magdala bad kata kawei pat ka Mari, ki ïashong ha marpyrshah kata ka jingtep.

Ki nongap ha ka jingtep

⁶² Te ha kaba lashai (kaba long ka sngi hadien ka Bapynkhreh), ki rangbah lyngdoh bad ki Pharisi ki la ïalum lang ha u Pilat,

⁶³ ki ïa-ong, “Ko kynrad, ngi kynmaw ba uta u bashukor u la ong mynba u dang im, ‘Ynda la lai sngi ngan mihpat.’

⁶⁴ Namar kata te, to hukum ban pynskhem ïa ka jingtep haduh lai sngi, ba ïoh ki synran jong u kin wan tuh noh ïa u mynmiet, bad ba kin ong te ha ki briew, ‘U la mih noh na ki baïap.’ Kumta, ka jingshukor ka bakhatduh kan long kham sniew ïa ka banyngkong.”

⁶⁵ Te u Pilat u la ong ha ki, “Phi don ki nongap, to khie leit pynskhem katba phi lah.”

⁶⁶ Ki la leit te, ki la pynskhem ïa ka jingtep, ki da shon shab ïa u maw, ki nongap ruh ki da don lem.