MATHAÏOS 26 - KA BAIBL

Ka jingïasylla pyrshah ïa U Jisu

¹ Ka la jia ruh, haba U Jisu u la lah wai noh ïa kita ki ktien baroh, u la ong ha ki synran jong u,

² “Phi tip ba ynda sa ar sngi kan long Ka Niam Ka Jinglait; ynda kumta, yn ai noh ïa U Khun u briew ïa ka ban sahnarphna ïa u.”

³ Ynda kumta, ki la ïalang ki rangbah lyngdoh bad ki nongthoh bad ki tymmen basan jong u paidlang ha ka ïingbah u rangbah lyngdoh, ïa uba ki khot “u Kaïaphas”;

⁴ te ki la ïasylla ba kin ïoh kem tuh ïa U Jisu, ba kin ïoh pynïap noh.

⁵ Hynrei, ki la ïa-ong, “Ym ha Ka Niam Ka Jinglait, ba ïoh ka jingkhihwin kan long hapdeng u paidbah.”

Kaba pynsleh ïa U Jisu ha Bethania

⁶ Haba U Jisu u dang don te ha Bethania, ha ïing uta u Simon u bapang 'ñiangthohlieh,

⁷ ka la wan ka kynthei ha U kaba don ka dabi alabaster ka jingsleh ka bakordor eh, bad ka la theh ha ka khlieh jong U haba U shong bam.

⁸ Haba ki synran jong u te ki la ïohi, ki la sngewbitar, ki da ong, “Ïa ka ban lei kane ka jinglehnohei?

⁹ Namar lah eh ban die bun sbai ïa kane ka jingsleh, bad ban ïoh ai ha ki baduk.”

¹⁰ Haba U Jisu u la tip te, u la ong ha ki, “Balei phi pynkhuslai ïa ka kynthei? namar ka la leh ïa ka jingleh babha ïa nga:

¹¹ naba phi ïoh ïa ki baduk lem bad phi ha la ka sngi, hynrei, ïa nga phim ïoh keiñ ha la ka sngi.

¹² Naba haba ka la theh ïa kane ka jingsleh ha ka met jong nga, ka la leh keiñ ïa ka ban kyllan musla ban tep ïa nga.

¹³ Shisha nga ong ha phi, shano shano ruh sha kaba yn ïalap ïa kane ka gospel ha ka pyrthei baroh, yn ïathuh ruh ïa kane kaba ka la leh, ïa ka ban kynmaw ïa ka.”

U Judas u wad dong ban die noh ïa U Jisu

¹⁴ Ynda kumta, uwei na ki khat-ar ngut, ïa uba ki khot “u Judas Iskariot”, u la leit ha kita ki rangbah lyngdoh,

¹⁵ u la ong, “Phin ai aïu ha nga, ba ngan die noh ïa U ha phi?” Ki la thew te ha u laiphew ki sbai rupa.

¹⁶ Naduh kata te u la wad dong kaba bit ba un ai noh ïa U.

U Jisu u bam ïa Ka Niam Ka Jinglait bad ki synran jong u

¹⁷ Te ha ka sngi ka banyngkong U Kpu Bakhlem Thiat, ki synran ki la wan ha U Jisu, ki da ong, “Me mon hangno ba ngin ïakhreh ïa me ban bam ïa Ka Niam Ka Jinglait?”

¹⁸ U la ïathuh te, “To khie leit shapoh kato ka nongbah sha uta u briew, bad ong ha u, ‘U Nonghikai u ong, “Ka por jong nga ka la jan; ngan rakhe ïa Ka Niam Ka Jinglait ha ïing jong me, lem bad ki synran jong nga.” ’ ”

¹⁹ Ki synran te ki la leh kumba U Jisu u la batai ïa ki; bad ki la ïakhreh ïa kata Ka Niam Ka Jinglait.

²⁰ Haba la janmiet te, u la ïashong bam bad kita ki khat-ar ngut.

²¹ Te haba ki dang ïabam, u la ong, “Shisha nga ong ha phi, ba uwei na phi un die noh ïa nga.”

²² Te ki la sngewsih eh, bad ki la sdang uwei pa uwei na ki ban ïa-ong ha u, “Ma nga, ko Trai?”

²³ U da ïathuh u la ong, “Uta uba pynngam ïa la ka kti ha ka pliang lem bad nga, uta keiñ u ban die noh ïa nga.

²⁴ U Khun u briew shisha un sa leit kumba la thoh shaphang jong u, hynrei, kordit ïa uta u briew da uba yn die noh ïa U Khun u briew! ka la bha ïa uta u briew lada ym shym la kha satia ïa u.”

²⁵ Ynda kumta, u Judas uba la die noh ïa U, u da ïathuh u la ong, “Dei ma nga, ko Kynrad?” U la ïathuh ha u, “Me la ong keiñ.”

Ka Jingkhawai U Trai

²⁶ Te haba ki dang ïabam, U Jisu u la shim ïa u kpu, bad ynda u la nguh, u la kdiah; bad u la ai ha ki synran, u la ong, “To shim, to bam, une u long ka met jong nga.”

²⁷ Ynda u la shim ïa ka khuri ruh, bad ba u la nguh, u la ai ha ki, u da ong, “To dih na kane phi baroh;

²⁸ naba kane ka long ka snam jong nga, kaba ka jong ka jutang bathymmai, ïa kaba yn sa pynmih noh na ka bynta kiba bun, ïa ka ban map ki pop.

²⁹ Nga ong ruh ha phi, ba ngan ym dih shuh naduh mynta na kane ka umsoh u dieng Waiñ, tad ynda kata ka sngi ba ngan dih thymmai ïa ka lem bad phi ha ka hima U Kpa jong nga.”

³⁰ Te haba ki la ïarwai salm, ki la leit noh sha u lum ki Olib.

U Jisu u ïathuhlypa ba u Petros un len noh ïa u

³¹ Mynkata U Jisu u la ong ha ki, “Phi baroh phin thut na nga ha kane ka miet, naba la thoh: ‘Ngan shoh ïa u nongsharai bad yn pynsaphred ïa ki langbrot jong ka kynhun.’

³² Hynrei, hadien ba nga la mihpat, ngan leit sha shuwa jong phi sha Galilaïa.”

³³ U Petros u da ïathuh te u la ong ha U, “Lada ki baroh kin thut na me, nga te ngan ym thut lano lano ruh.”

³⁴ U Jisu u la ong ha u, “Shisha nga ong ha me, ba ha kane ka miet, shuwa ba um pat riew u syiar, men len ïa nga lai sien.”

³⁵ U Petros u la ong ha U, “La ka dei ïa nga ban ïap noh lem bad me, ngan ym len satia ïa me.” Kumjuh ruh ki la ong ki synran baroh.

U Jisu u duwai ha ka kper Gethsemane

³⁶ Ynda kumta, U Jisu u la wan bad ki sha ka jaka ba ki khot “Gethsemane”, bad u ong ha ki synran, “To ïashong hangne, katba ngan da leit hangtai ban duwai.”

³⁷ Te haba u la shim lem bad u ïa u Petros bad ïa ki ar ngut ki khun u Sebedi, u la sdang ban sngewsih bad ban sngewkordit eh.

³⁸ Haba kumta u la ong ha ki, “Ka mynsiem jong nga ka sngewpisa eh, kat ban sa ïap; ïaishong hangne, to ïa-ap ruh lem bad nga.”

³⁹ Haba u la leit sha shuwa khyndiat, u la dem da pyllup bad u la duwai, u da ong, “Ko Kpa jong nga, lada don lad, to ai ba kane ka khuri kan ïohlait noh na nga. Pynban, ym kumba nga mon ma nga, hynrei, tang kumba me mon.”

⁴⁰ U wan te ha kita ki synran, bad u shem ba ki la ïohthiah, bad u la ong ha u Petros, “Wa! phim lah ban ïa-ap lem bad nga shi por?

⁴¹ To sharai, to duwai ruh, ba phin ym leit shapoh ka jingpynshoi. Ka mynsiem shisha ka smat, hynrei, ka doh ka tlot.”

⁴² Te ha ka ba-ar sien pat u la leit noh, bad u la duwai, u da ong, “Ko Kpa jong nga, lada ym don lad ïa kane ka khuri ban lait noh na nga lymda nga dih ïa ka, to long ka mon jong me.”

⁴³ Haba u la wan te, u shem ba ki la ïohthiah pat, naba ki khmat jong ki, ki la khia.

⁴⁴ Te haba u la iehnoh ïa ki, u la leit noh pat, u la duwai ka balai sien, u da ong pat ïa kijuh ki ktien.

⁴⁵ Ynda kumta, u la wan ha ki synran, bad u la ong ha ki, “To nang thiah mynta, to jahthait ruh. Ha khmih ka por ka la jan, te yn die noh ïa U Khun u briew ha ki kti ki bapop.

⁴⁶ To ïeng, ngin ïaleit noh. Ha khmih, uba die noh ïa nga u la jan.”

Kaba kem ïa U Jisu

⁴⁷ Haba U dang kren ruh, ha khmih u Judas, uba uwei na ki khat-ar ngut, u la wan, bad u paidbah babun lem bad u bad ki waitlam bad ki diengduh ruh, na ki rangbah lyngdoh bad na ki tymmen basan jong u paidbah.

⁴⁸ Uta te uba la die noh ïa U, u la lah ai ka dak ha ki, u da ong, “Ïa uba ngan doh, uta long ma u, to phin kem ïa u.”

⁴⁹ Te kumne kumne ruh haba u la wan ha U Jisu, u la ong, “Khublei, ko Kynrad”, bad u la doh ïa U.

⁵⁰ U Jisu te u la ong ha u, “Ko lok, me wan ïa-ei?” Ha kata ki la wan, ki la buh ïa la ki kti ha U Jisu, bad ki la kem ïa u.

⁵¹ Ha khmih ruh, uwei na kita kiba bad U Jisu, haba u la kner ïa la ka kti, u la sei noh ïa ka waitlam jong u, bad u la pom ïa u shakri u rangbah lyngdoh, bad u la mait noh ïa ka shkor jong u.

⁵² Haba kumta U Jisu u la ong ha u, “To thep noh ïa ka waitlam jong me ha ka jaka jong ka; naba kita baroh kiba shim ïa ka waitlam kin ïap noh da ka waitlam.

⁵³ Me mut ba ngam lah mynta ban duwai ïa U Kpa jong nga, ba un phah ïarap ïa nga wat mynta da ki khat-ar paidbah tam ki angel?

⁵⁴ Lada kumta te, kumno ba yn pyndep ïa kita ki jingthoh, kiba ong ba ka dei ban long kumne?”

⁵⁵ Ha kata ka por, U Jisu u la ong ha kita ki paidbah, “Kumba ïa u nongtuh phi la mih bad ki waitlam bad ki diengduh ban kem ïa nga? Ha la ka sngi bad phi nga ju shong hikai ha ka templ, te phim shym la kem ïa nga.

⁵⁶ Hynrei, kane baroh te ka la long ba yn pyndep ïa ki jingthoh ki nongïathuhlypa.” Ynda kumta, ki synran baroh haba ki la iehnoh ïa u, ki la phet noh.

U Jisu ha khmat ka dorbar

⁵⁷ Kita te kiba la kem ïa U Jisu ki la ïalam noh ïa u sha ka ïing u Kaïaphas u rangbah lyngdoh, ha kaba ki la ïalang ki nongthoh bad ki tymmen basan.

⁵⁸ U Petros te u la bud ïa U na jngai haduh ka phyllaw u rangbah lyngdoh; te haba u la leit hapoh u la shong lem bad ki shakri ban ïohi ïa ka bakut.

⁵⁹ Ki rangbah lyngdoh te bad ki tymmen basan bad ka dorbar baroh ruh, ki la ïawad ïa ka sakhi lamler pyrshah ïa U Jisu, ba kin ïoh pynïap ïa U;

⁶⁰ hynrei, kim shem, la ki la wan ruh shibun ki nongsakhi lamler. Hynrei, hadien la wan ar ngut ki nongsakhi lamler,

⁶¹ ki la ong, “Une u briew u la ong, ‘Nga lah ban pynjot ïa ka templ, bad ban tei pat lai sngi ïa ka.’ ”

⁶² Uta u rangbah lyngdoh haba u la ïeng te, u la ong ha U, “Mem ïathuh ei ei ruh em? kine ki ïasakhi aïu pyrshah ïa me?”

⁶³ Hynrei, U Jisu u la shu sngap. Te u rangbah lyngdoh u da ïathuh u la ong ha U, “Nga pynsmai ïa me ha U Blei U Ba-im, ba men ïathuh ha ngi, la me long uba U Khrist, U Khun U Blei!”

⁶⁴ U Jisu u la ong ha u, “Me la ong. Hynrei, nga ong ruh ha phi, ba phin ïohi lawei ïa U Khun u briew haba u shong sha kamon ka Bor baroh, bad haba u wan ha ki lyoh ka bneng.”

⁶⁵ Mynkata u rangbah lyngdoh u la kad ïa la ki jaiñ, u da ong, “U la krenbeiñ blei! Ngi dang donkam aïu pat ïa ki sakhi? ha khmih, mynta phi la ïohsngew ïa ka jingkrenbeiñ blei jong U!

⁶⁶ Phi mut kumno?” Ki da ïathuh te ki la ong, “Ka dei ïa U ban ïap.”

⁶⁷ Haba kumta, ki la bynthiew ha ka khmat jong U, bad ki la shoh ïa U, bad kiwei ki la thab ïa U.

⁶⁸ Ki da ong, “To ïathuh antad ha ngi, ko Khrist, uei ba la shoh ïa me!”

U Petros u len noh ïa U Jisu

⁶⁹ U Petros te u shong shabar ha ka phyllaw. Te ka la wan ha u kawei ka shakri kaba ong, “Me ruh me la long lem bad U Jisu u nong Galilaïa.”

⁷⁰ U la len te ha khmat jong ki baroh, u da ong, “Ngam tip ïa kaei ba pha ong.”

⁷¹ Haba u la mih noh te sha ka baranda, kawei pat ka la ïohi ïa u, bad ka la ong ha kiba hangta, “Une u briew ruh u la long lem bad U Jisu u nong Nasaret.”

⁷² U la len pat ruh da kaba smai, “Ngam ithuh ïa uta u briew.”

⁷³ Sa shibit te kita kiba ïeng hajan haba ki la wan, ki la ong ha u Petros, “Shisha me ruh me la long uwei na ki, naba ka ktien jong me ka pynithuh ïa me.”

⁷⁴ Ynda kumta, u la sdang ban tim ban smai ruh, “Ngam ithuh ïa uta u briew.” Te kumne kumne ruh u la riew u syiar.

⁷⁵ U Petros te u la kynmaw ïa ka ktien U Jisu ba u la ong ha u, “Shuwa ba um pat riew u syiar, men len ïa nga lai sien.” Te haba u la mih noh shabar, u la lynñiar kthang eh.