MATHAÏOS 25 - KA BAIBL

Ka pharshi ki shiphew ngut ki theisotti

¹ “Ynda kumta, ka hima ki bneng kan long kum ki shiphew ngut ki theisotti, kiba haba ki la shim ïa ki sharak jong ki, ki la mih noh ïa ka ban leit tan ïa u nongleit-kurim.

² San ngut te na ki, ki la long ki bastad bad san ngut ki babieit.

³ Kita ki babieit, haba ki la shim ïa ki sharak jong ki, kim shym la shim ruh ïa ka umphniang lem bad ki.

⁴ Hynrei, kita ki bastad ki la shim ïa ka umphniang ha ki khulpi jong ki lem bad ki sharak jong ki.

⁵ Haba uta u nongleit-kurim u pyntud, ki la samthiah baroh, bad ki la ïohthiah.

⁶ Hynrei, mynshiteng synñia la long ka jingpyrta, ‘Ha khmih, u wan u nongleit-kurim! to mih ban leit tan ïa u.’

⁷ Ynda kumta, kita ki theisotti baroh ki la ïaïeng, bad ki la shna ïa ki sharak jong ki.

⁸ Kita ki babieit te ki la ong ha kita ki bastad, ‘To ai ha ngi na ka umphniang jong phi, naba ki sharak jong ngi kin sa lip.’

⁹ Hynrei, kita ki bastad ki la ïathuh, ki ïa-ong, ‘Ba ïoh kan ym dap ïa ngi bad ïa phi ruh, to khie leit keiñ sha kita kiba die, bad da thied ïa lade.’

¹⁰ Haba ki dang ïaleit ban thied te, u la wan uta u nongleit-kurim; te kita kiba la kloi ki la leit hapoh lem bad u sha ka jingkhawai shongkurim; te la khang ïa ka jingkhang.

¹¹ Hadien kata te, ki la wan ruh kita kiwei ki theisotti, ki da ong, ‘Ko kynrad, kynrad, to plie ïa ngi!’

¹² U la ïathuh te u la ong, ‘Shisha nga ong ha phi, ngam ithuh ïa phi.’

¹³ Namar kata, to sharai, naba phim tip lymne ïa ka sngi lymne ïa ka por ha kaba u wan U Khun u briew.

Ka pharshi ki talent

¹⁴ “Naba kumta ka long kumba u briew u ban sa leit jingleit sha kawei ka ri, uba la khot ïa ki shakri jong u bad u la ai ha ki, ïa ki spah jong u.

¹⁵ Te ha uwei u la ai san talent, ha uwei pat ruh ar, ha uwei pat ruh kawei; ha uwei pa uwei katba kum ka buit jong u hi: te kumne kumne ruh u la leit sha la ka jingleit.

¹⁶ Ynda kumta, uta uba la ïoh diang ïa ki san talent, u la leit khaïi bad ki, bad u la pynman ïa kiwei ki san talent.

¹⁷ Kumjuh ruh uta u ba-ar, uta ruh u la ïohnong kiwei pat ar.

¹⁸ Uta te uba la ïoh diang ïa kawei, u la leit tih thliew ha ka khyndew, bad u la buhrieh noh ïa u sbai u kynrad jong u.

¹⁹ Te ynda la kham slem, u kynrad jong kita ki shakri u wan, u ïakheiñ bad ki.

²⁰ Ynda kumta, uta uba la ïoh diang ïa ki san talent u la wan, bad u la wallam ïa ki san tylli kiwei ki talent, u da ong, ‘Ko kynrad, me la ai ha nga san talent; ha khmih nga la ïohnong san tylli kiwei ki talent.’

²¹ Te u kynrad jong u, u la ong ha u, ‘Bha, me u shakri babha bad bangeit: me la minot ha kiba khyndiat, ngan buh ïa me halor kiba bun: to khie leit shapoh ka jingkmen u kynrad jong me.’

²² Uta uba la ïoh diang ïa ki ar talent ruh u la wan, u la ong, ‘Ko kynrad, me la ai ha nga ar talent: ha khmih nga la ïohnong ar tylli kiwei ki talent.’

²³ U kynrad jong u, u la ong ha u, ‘Bha me u shakri babha bad bangeit; me la minot ha kiba khyndiat, ngan buh ïa me halor kiba bun: to khie leit shapoh ka jingkmen u kynrad jong me.’

²⁴ U la wan ruh de uta uba la ïoh diang ïa kawei ka talent, u la ong, ‘Ko kynrad, nga la tip ba me long u briew uba eh, uba ot na kaba mem shym la bet, bad uba lum na kaba mem shym la pynsaphred:

²⁵ kumta, ba nga la sheptieng, nga la leit buhrieh ïa ka talent jong me ha ka khyndew; ha khmih, me la ïoh la ka jong.’

²⁶ U kynrad jong u te u da ïathuh u la ong ha u, ‘Me u shakri bymman bad ba alhia, me la tip ba nga ot na kaba ngam shym la bet, bad ba nga lum na kaba ngam shym la pynsaphred;

²⁷ ka la dei ïa me namar kata ban ai ïa u sbai jong nga ha ki ba ai sut, ba haba nga wan te ngan da ïoh shim ïa la ka jong bad ïa ka sut.

²⁸ Namar kata, to shim noh na u ïa kata ka talent, to ai ruh ha uta uba don ki shiphew talent.

²⁹ Naba ha uwei pa uwei uba don, yn ai, un ïoh kaba dap tam ruh; hynrei, na uta u bymdon, wat ïa kata kaba u don yn shim noh na u.

³⁰ To bred noh te ïa uta u shakri bymmyntoi sha ka ba-dum kaba kham jngai; hangta yn long kaba lynñiar bad kum dait bniat.’

Ka jingbishar ïa ki jaid bynriew

³¹ “Ynda U Khun u briew un wan te ha ka burom jong u, bad ki angel bakhuid baroh lem bad u, ynda kumta, un shong halor ka khet ka burom jong u,

³² bad yn ïalum lang ïa ki bynriew baroh ha khmat jong u; bad un pynïakhlad ïa ki uwei na uwei pat, kumba u nongaplangbrot u pynïakhlad ïa ki langbrot na ki blang;

³³ te un buh ïa ki langbrot sha kamon jong u, hynrei, ïa ki blang sha kadiang.

³⁴ Ynda kumta, U Syiem un ong ha kita sha kamon jong u, ‘To wan phi ïa kiba la kyrkhu jong U Kpa jong nga, to ïoh ïa ka hima ïa kaba la pynkhreh keiñ ïa phi na myndanglong ka pyrthei.

³⁵ Namar nga la thngan, te phi la ai ha nga ban bam; nga la sliang, te phi la ai dih ïa nga; nga la long nongwei, te phi la khot lem ïa nga;

³⁶ ba lyngkhuit, te phi la pynkup jaiñ ïa nga; nga la pang, te phi la wan sumar ïa nga; nga la long ha ka byndi, te phi la wan ha nga.’

³⁷ Ynda kumta, kita ki bahok kin ïathuh ha u, kin ong, ‘Ko Trai, mynno ba ngi la ïohi ba me la thngan, bad ngi la ai bam? lane ba me la sliang, bad ngi la ai dih?

³⁸ mynno ruh ba ngi la ïohi ba me long nongwei, bad ngi la khot lem ïa me? lane ba lyngkhuit, bad ngi la pynkup jaiñ?

³⁹ mynno te ba ngi la ïohi ba me pang, lane ha ka byndi, bad ngi la wan ha me?’

⁴⁰ Uta U Syiem te un ïathuh bad un ong ha ki, ‘Shisha nga ong ha phi, ha kaba phi la leh ïa ka ha uwei u barit tam na kine ki para jong nga, phi la leh keiñ ha nga.’

⁴¹ Ynda kumta, un ong ha kita ruh sha kadiang, ‘To khie leit noh na nga, phi ïa kiba la tim, sha ka ding ka bymjukut, ïa kaba la buh lypa ïa u Soitan bad ïa ki angel jong u!

⁴² Namar nga la thngan, te phim shym la ai ha nga ban bam; nga la sliang, te phim shym la ai dih ïa nga;

⁴³ nga la long nongwei, te phim shym la khot lem ïa nga; ba lyngkhuit, te phim shym la pynkup jaiñ ïa nga; bapang, bad ha ka byndi ruh, te phim shym la wan sumar ïa nga.’

⁴⁴ Ynda kumta, ki ruh kin ïathuh ha u, kin ong, ‘Ko Trai, mynno ba ngi la ïohi ba me la thngan, lane ba me la sliang, lane nongwei, lane ba lyngkhuit, lane bapang, lane ha ka byndi, bad ngim shym la shakri ïa me?’

⁴⁵ Ynda kumta, un ïathuh ha ki, un ong, ‘Shisha nga ong ha phi, ha kaba phim shym la leh ïa ka ha uwei na kine ki barit tam, phim shym la leh keiñ ha nga.’

⁴⁶ Kine kin leit noh te sha ka shitom bymjukut, hynrei, ki bahok sha ka jingim bymjukut.”