MATHAÏOS 24 - KA BAIBL

U Jisu u ïathuhlypa ïa ka jingpynduh ïa ka templ

¹ Te U Jisu u la mih noh, bad u la leit noh na ka templ; te ki synran jong u ki la wan ïa ka ban pyni ha u ïa ki jingtei jong ka templ.

² U Jisu te u la ong ha ki, “Phim ïohi ïa kine kiei kiei baroh? Shisha nga ong ha phi, Yn ym iehnoh hangne u maw halor u maw, ïa u ban ym pynhap noh.”

Kaba sdang jong ki jingjynjar

³ Te haba u dang shong halor u lum ki Olib, ki synran ki la wan ha u jar jar, ki ïa-ong, “To ïathuh ha ngi, lano ba kine kiei kiei ruh kin long? bad kaba kumno ka dak ka jingwan jong me, bad kaba wai noh kane ka pyrthei?”

⁴ Te U Jisu u la ïathuh bad u la ong ha ki, “To sumar ba uno uno ruh un ym shukor ïa phi.

⁵ Naba bun kin ïawan ha ka kyrteng jong nga, ki da ong, ‘Ma nga uba U Khrist’, bad kin shukor ïa shibun.

⁶ Bad phin sa ïohsngew shaphang ki thma bad ki jingbna ïa ki thma: to sumar phi wat sngewkhuslai: naba ka dei ba kine kiei kiei baroh kin long: hynrei, ka bakut kam pat la jia.

⁷ Naba ka kynja bynriew kan ïeng ïaleh ïa ka kynja bynriew, bad ka hima ruh ïa ka hima; bad kin long ki 'nemsniew bad ki jingïapthem ruh, bad ki jingkhynñiuh jumai ha shibun ki jaka.

⁸ Hynrei, kine baroh ki long tang ki jingsdang ki jingjynjar.

⁹ “Ynda kumta, kin ai noh ïa phi ha ka shitom, bad kin ïa-pynïap noh ïa phi; bad phin long kiba la shun da ki kynja bynriew baroh na ka bynta ka kyrteng jong nga.

¹⁰ Ynda kumta te, shibun kin ïathut, bad kin ïadie paralok, bad kin ïashun paralok.

¹¹ Bun ki nongïathuhlypa lamler ruh kin mih, bad kin shukor ïa shibun.

¹² Te namar ba ka pop kan man bun, ka jingieit kiba bun kan man khriat.

¹³ Hynrei, jar uba da ïaineh haduh ka bakut, uta keiñ u ban ïohlait im.

¹⁴ Te ïa kane ka gospel jong ka hima yn ïalap ha ka pyrthei baroh, ïa ka ban long ka jingphla ha ki kynja bynriew baroh; ynda kumta keiñ, kan jia kata ka bakut.

Ka jingijli bapynduh

¹⁵ “Namar kata, ynda phin ïohi ïa kata ka jingijli bapynduh, ba la ong shaphang jong ka da u Daniel u nongïathuhlypa, ba ka da ïeng ha ka jaka bakhuid,” (Jar uba pule un da sngap),

¹⁶ “ynda kumta, kita kiba ha ka Judia to ai kin ïaphet ïap noh sha ki lum.

¹⁷ Jar uba halor ïing, wat ai un hiar ban shim ei ei ruh na ka ïing jong u.

¹⁸ Jar uba ha ka lyngkha ruh, wat ai un wan kylla dien pat ban shim ïa ki jaiñkup jong u.

¹⁹ Hynrei, kordit ïa kita kiba la punkhun bad ïa kiba ai buiñ ha kita ki sngi!

²⁰ Hynrei, phin duwai ba kata ka jingphet ïap noh jong phi kan ym long myntlang, lymne ha ka sngi Sabbaton.

²¹ Naba hangta, ka kordit bah kan long, kat kaba ym pat ju long naduh myndanglong ka pyrthei haduh mynta, em, lymne kan ym long shuh ruh.

²² Te lymda pyndkut noh ïa kita ki sngi, kan ym lait im kawei ka doh: hynrei, na ka bynta kiba la jied, yn pyndkut noh ïa kita ki sngi.

²³ Ynda kumta, lada uei uei ruh un ong ha phi, ‘Ha khmih, hangne uba U Khrist,’ lane ‘hangtai;’ phi wat ngeit.

²⁴ Naba ki khrist lamler, bad ki nongïathuhlypa lamler, kin mih, bad kin pyni ïa ki dak ki bakhraw bad ki jingphylla, kat ban shukor, lada lah, wat ïa kiba la jied.

²⁵ Ha khmih, nga la ïathuhlypa ha phi.

²⁶ Namar kata, lada kin ong ha phi, ‘Ha khmih, u don ha ri khlaw;’ phi wat mih noh: ‘Ha khmih, u don ha ki pulit ba jar jar:’ phi wat ngeit.

²⁷ Naba kumba ka mih noh ka leilieh na mihngi, bad ka shai haduh sepngi, kumta ruh kan long ha kata ka jingwan U Khun u briew.

²⁸ Naba ha-ei ha-ei ruh ha kaba don ka metïap, hangta keiñ kin ïalang ki pukni.

Ka jingwan U Khun u briew

²⁹ “Kumne kumne ruh, hadien ka jynjar kita ki sngi, ïa ka sngi yn pyndum, bad u bnai un ym ai la ka jingshai, bad ki khlur kin hap na bneng, bad yn pynkhynñiuh ïa ki bor ki bneng.

³⁰ Ynda kumta te, ka dak U Khun u briew kan paw ha bneng; te hangta ki jaid bynriew baroh ka pyrthei kin ïalynñiar lympat, haba kin ïohi ba u wan U Khun u briew ha ki lyoh bneng da ka bor bad ka burom bakhraw.

³¹ Un phah noh ruh ïa ki angel jong u da ka jingsawa bakhraw ka turoi, bad kin ïalum lang ïa kiba la jied jong u na ki saw lyer, naduh ki bakut ki bneng haduh ki bakut jong ki.

Ka jinghikai na u dieng Dumbur

³² “To nang te ïa ka pharshi na u dieng Dumbur: haba ka tnat jong u ka la khie lung, bad ka sei sla, phi tip ba ka lyiur ka la jan;

³³ kumjuh ma phi ruh, haba phin ïohi ïa kine kiei kiei baroh, to tip ba ka long hajan, ha ki jingkhang.

³⁴ Shisha nga ong ha phi, kane ka pateng bynriew kan ym leit noh, tad ynda la pyndep noh ïa kine kiei kiei baroh.

³⁵ Ka bneng bad ka khyndew kin leit noh, hynrei, ki ktien jong nga kin ym leit noh satia.

Ym don ba tip ïa ka sngi lane ïa ka por

³⁶ “Hynrei, shaphang kata ka sngi bad kata ka por ruh ym don ba tip, lymne ki angel ki bneng, hynrei, tang U Kpa jong nga hi.

³⁷ Te kumba la long ki sngi u Noah, kumta ruh kan long kata ka jingwan U Khun u briew.

³⁸ Naba kumba ka la long ha kita ki sngi kiba mynshuwa kata ka jingshlei ba ki ïabam ki ïadih, ba ki ïashongkurim ki ïa-pynshongkurim, tad ynda kata ka sngi ba u Noah u la leit hapoh kata ka ïinglieng;

³⁹ bad kim shym la suidñiew tad ynda ka la wan kata ka jingshlei, bad ka la rong noh ïa ki baroh; kumta ruh kan long kata ka jingwan U Khun u briew.

⁴⁰ Ynda kumta, ar ngut kin ïadon ha ka lyngkha; ïa uwei la shim noh, te ïa uwei pat la iehnoh.

⁴¹ Ar ngut kin ïashong tylliat ha ka ïing tylliat: ïa kawei la shim noh, te ïa kawei pat la iehnoh.

⁴² Namar kata, to sharai, naba phim tip ha kano ma ka sngi ba u wan U Trai jong phi.

⁴³ Ïa kane te phi tip, ba lada u trai ïing u la tip ha kano ka por ba un wan u nongtuh, un da la ap, bad un ym da shah ban prat ïa ka ïing jong u.

⁴⁴ Naba kumta, phi ruh to long kiba la kloi; naba ha ka por ba phim mut, u wan U Khun u briew.

Ki shakri babha bad babymman

⁴⁵ “Naba kumta, uno uba long u shakri bangeit bad bastad, ïa uba u kynrad jong u, u la buh halor ki ba-ha-ïing jong u ïa ka ban ai ha ki, ïa ka jingbam ha ka por kaba biang?

⁴⁶ Suk uta u shakri, ïa uba u kynrad jong u haba u wan un shem ba u leh kumta.

⁴⁷ Shisha nga ong ha phi, ba un buh ïa u halor kiei kiei baroh kiba u don.

⁴⁸ Hynrei, lada uta u shakri bymman te un ong ha la ka dohnud, ‘U kynrad jong nga u tud ban wan;’

⁴⁹ bad u sdang ban shoh ïa ki para shakri jong u, bad ban ïabam ïadih ruh lem bad ki babuaid;

⁵⁰ u kynrad uta u shakri un wan ha ka sngi ha kaba um mut, bad ha ka por ha kaba um tip;

⁵¹ te un shop noh da sympat ïa u, bad un buh ïa ka bynta jong u lem bad kiba arsap; hangta yn long kaba lynñiar bad kum dait bniat.