MATHAÏOS 23 - KA BAIBL

U Jisu u pynrem ïa ki Nongthoh bad ki Pharisi

¹ Ynda kumta, U Jisu u la ïalap ha ki paidbah, bad ha ki synran jong u,

² u da ong, “Ki nongthoh bad ki Pharisi ki shong ha ka jingshong u Moses:

³ namar kata, ïa kiei kiei baroh katba kin ong ha phi ban sumar, to phin sumar, bad leh ruh; hynrei, katba kum ki jingleh jong ki, phi wat leh; naba ki ong, te kim leh hi.

⁴ Naba ki teh ki jingbah ki bakhia bad kiba eh ban bah, bad ki buh ha ki tyrpeng ki briew; hynrei, ki kim mon ban pynkhih ïa ki da ka shynriah'ti jong ki.

⁵ Hynrei, ïa ki jingleh jong ki baroh, ki leh khnang ïa ka ban ïohi da ki briew: namar ki pynpyiar ïa la ki philakteri, bad ki pynkhraw ïa ki rmiang ki jaiñ jong ki,

⁶ ki ieit ruh ïa ki jaka ba-donnam tam ha ki jingkhawai, bad ïa ki jingshong bakor tam ha ki synagog,

⁷ bad ïa ki jingnguh de ha ki ïew, bad ba yn khot ruh ïa ki da ki briew, ‘Ko Rabbi.’

⁸ Hynrei, ïa phi wat shah ban khot ‘Rabbi’: naba uwei u long U Nonghikai jong phi uba U Khrist; phi te phi long shipara baroh.

⁹ Wat khot ruh ‘u kpa jong phi’ ïano ïano ruh uba ha ka khyndew: naba uwei u long U Kpa jong phi, uba ha bneng.

¹⁰ Lymne wat ai ba yn khot ïa phi ‘ki nongïalam’: naba uwei u long U Nongïalam jong phi, uba U Khrist.

¹¹ Hynrei, uta uba long kham khraw na phi, un long keiñ u shakri jong phi.

¹² Uno uno ruh de u ban pynkhraw ïa lade, yn pynpoh; uno uno ruh u ban pynpoh te ïa lade, yn pynkhraw.

¹³ “Hynrei, kordit ïa phi, ki nongthoh bad ki Pharisi, kiba arsap! naba phi bam duh ïa ki ïing ki riewkynthei, te phi duwai jlan khnang ban tyllep: namar kata, phin ïoh diang ka jingshitom kaba kham khraw.

¹⁴ Kordit ïa phi, ki nongthoh bad ki Pharisi kiba arsap! naba phi khang ïa ka hima ki bneng ha khmat ki briew: naba phi phim leit hapoh, lymne phim shah ïa kita kiba leit, ban leit hapoh.

¹⁵ Kordit ïa phi, ki nongthoh bad ki Pharisi kiba arsap! naba phi ïaid sawdong ïa ka duriaw bad ka ryngkew ban pynkylla niam ïa uwei; te haba u la kylla, phi pynlong ïa u, u khun dujok uba ar shah ïa phi hi.

¹⁶ “Kordit ïa phi, ki nongïalam bamatlah! kiba ong ba uno uno ruh u ban smai ha ka templ, kam long ei ei ruh em; hynrei, uno uno ruh u ban smai ha ka ksiar ka templ, u la teh ïa lade.

¹⁷ Phi kiba bieit bad bamatlah! naba kano ka long kaba kham khraw, kata ka ksiar, lane kata ka templ kaba pynkyntang ïa kata ka ksiar?

¹⁸ Ruh, ba uno uno ruh u ban smai ha ka duwan, kam long ei ei ruh em: hynrei, uno uno ruh u ban smai ha kata ka jingainguh kaba halor jong ka, u teh ïa lade.

¹⁹ Phi kiba bieit bad bamatlah! Naba kano kaba kham khraw, kata ka jingainguh, lane kata ka duwan kaba pynkyntang ïa ka jingainguh?

²⁰ Namar kata keiñ, jar uba smai ha kata ka duwan, u smai ha ka, bad ha kiei kiei baroh kiba halor jong ka.

²¹ Jar uba smai ruh ha ka templ, u smai ha ka, bad ha uta uba shong sah ha ka.

²² Jar uba smai ruh ha ka bneng, u smai ha ka khet U Blei, bad ha uta uba shong halor jong ka.

²³ “Kordit ïa phi, ki nongthoh bad ki Pharisi kiba arsap! naba phi ai ïa kaba shiphew na ka pudina, bad na ka dill, bad na ka kummin, bad phi iehnoh te ïa kita kiei kiei kiba kham khia ki jong ka hukum, ïa ka hok, bad ïa ka jingisynei, bad ïa ka jingngeit; ka la dei keiñ ïa phi ban leh ïa kine, bad ban ym iehnoh ïa kita kiwei.

²⁴ Phi ki nongïalam bamatlah, kiba jiar noh ïa u 'kain rit, bad kiba nguid pynban ïa ka ut!

²⁵ “Kordit ïa phi, ki nongthoh bad ki Pharisi kiba arsap! naba phi pynkhuid ïa kaba shabar ïa ka khuri bad ïa ka pliang, hynrei, shapoh ki dap da ka jinglute bad ka jinglalot.

²⁶ Me u Pharisi bamatlah! to pynkhuid shuwa ïa kaba shapoh ka khuri bad ka pliang, ba kaba shabar jong ki kan ïoh long khuid ruh.

²⁷ “Kordit ïa phi, ki nongthoh bad ki Pharisi kiba arsap! naba phi long kum ki jingtep ba la pynlieh, kiba imat ibha shisha na shabar, hynrei, shapoh kiba dap da ki shyieng jong ki baïap, bad da ka jakhlia baroh.

²⁸ Kumta phi ruh, na shabar phi pynpaw kum ki bahok ha ki briew, hynrei, shapoh phi la dap da kaba arsap bad da ka basniew.

²⁹ “Kordit ïa phi, ki nongthoh bad ki Pharisi kiba arsap! naba phi tei ïa ki jingtep ki nongïathuhlypa, bad phi pynibha ïa ki maw jingtep ki bahok,

³⁰ bad phi ong, ‘Lada ngi la long ha ki sngi ka rta ki kpa jong ngi, ngin ym da la long kiba ïasylla lem bad ki ha ka jingpynïap ïa kita ki nongïathuhlypa.’

³¹ Kumta phi ïaphla ïa lade, ba phi long ki khun jong kita kiba la pynïap ïa ki nongïathuhlypa.

³² Te to pyndap noh phi ïa kata ka jingthew ki kpa jong phi.

³³ A ki bseiñ! Ki khun ki ksiew ki 'seiñpuh! kumno phin ïohlait na ka jingshitom ka dujok?

³⁴ Naba kumta, ha khmih, nga phah ha phi ïa ki nongïathuhlypa, bad ïa ki riewstad, bad ïa ki nongthoh ruh; te ïa kiba na ki phin pynïap noh, bad phin sahnarphna; bad ïa kiwei na ki phin sympat ha ki synagog jong phi, bad phin behbeiñ ruh na ka shnong sha ka shnong:

³⁵ kumta, kan wanhap ha phi keiñ ïa ka snam bahok baroh ïa kaba la pynmih noh ha ka khyndew, naduh ka snam u Abel u bahok haduh ka snam u Sakharaïah u khun u Barakhaïah, ïa uba phi la pynïap marpdeng ka jaka kyntang bad ka duwan.

³⁶ Shisha nga ong ha phi, ba kine kiei kiei baroh kin wanhap ha kane ka pateng bynriew.

U Jisu u ïam na ka bynta ka Jerusalem

³⁷ “A! Jerusalem, Jerusalem! pha kaba pynïap noh ïa ki nongïathuhlypa, bad kaba lynthem maw ïa kita ïa kiba la phah ha pha! katno sien ba nga la kwah ban kdup ïa ki khun jong pha, kumba ka syiar ka kdup ïa ki khun jong ka hapoh ki thapniang jong ka, phi te phim mon.

³⁸ Ha khmih, ïa ka ïing jong phi la iehnoh ha phi ka ïingjah.

³⁹ Naba nga ong ha phi, phin ym ïohi shuh ïa nga naduh mynta, tad ynda phin ong, ‘Long ba la kyrkhu ïa uta uba wan ha ka kyrteng U Trai.’ ”