MATHAÏOS 22 - KA BAIBL

Ka pharshi shaphang ka jingkhawai shongkurim

¹ U Jisu u la ïathuh bad u la ong pat ruh ha ki ha ki pharshi, u da ong,

² “Ka hima ki bneng ka long kum uwei u syiem, uba la thaw ka jingkhawai shongkurim ïa u khun jong u,

³ bad u la phah ïa la ki shakri ban khot ïa kita ïa kiba la ïawer sha kata ka jingkhawai shongkurim; ki te kim treh ban wan.

⁴ U la phah pat ïa kiwei ki shakri, u da ong, ‘Ïathuh ha kita ïa kiba la ïawer, “Ha khmih, nga la khreh ïa ka jingkhawai jong nga; la pynïap ïa ki masi dab bad ïa kiba sngaid jong nga, bad ïa kiei kiei baroh la khreh; to wan sha ka jingkhawai shongkurim.” ’

⁵ Hynrei, ki kim da suidñiew, ki shu ïaleit noh ruh, uwei sha la ka bri, uwei pat ruh sha la ka jingkhaïi.

⁶ Kiwei pat kiba sah te haba ki la kem ïa ki shakri jong u, ki la lehbeiñ bad ki la pynïap ïa ki.

⁷ Te haba uta u syiem u la ïohsngew, u la sngewbitar lep keiñ; te haba u la phah ïa ki nongïapom jong u, u la pynduh noh ïa kita ki nongpynïap, bad u la thang ïa ka shnong jong ki.

⁸ Ynda kumta, u la ong ha ki shakri jong u, ‘La khreh shisha ïa ka jingkhawai shongkurim, hynrei, kita ïa kiba la ïawer kim long kiba dei.

⁹ Namar kata, to khie leit sha kaba ki ïashem ki lad, bad ïa kat kiba phin shem, to khot sha kata ka jingkhawai shongkurim.’

¹⁰ Kumta, kita ki shakri haba ki la leit sha kita ki lynti, ki la ïalum ïa baroh kat kiba ki la shem, ïa ki bymman bad ïa ki babha ruh: te ki la pyndap ïa kata ka jingkhawai shongkurim da kiba ïashong bam.

¹¹ “Haba uta u syiem u la wan hapoh te ban jngoh ïa kiba ïashong bam, u la ïohi hangta ïa u briew u bym shym la kup ka jaiñ ka jingkhawai shongkurim:

¹² bad u la ong ha u, ‘Ko lok, kumno ba me la wan hapoh hangne khlem ka jaiñ ka jingkhawai shongkurim?’ U te um nang ong shikyntien ruh.

¹³ Ynda kumta, uta u syiem u la ong ha kita ki shakri, ‘To khum ïa u bad kti bad kjat, to rah noh, to bred ruh ïa u sha ka ba-dum kaba kham jngai; hangta yn long kaba lynñiar bad kum dait bniat.’

¹⁴ Naba bun ki long ba la khot, hynrei, khyndiat ba la jied.”

Shaphang kaba ai khajna

¹⁵ Ynda kumta, ki Pharisi ki la leit ban ïasylla kumno ba kin ïoh ïariam ïa u ha ka ktien.

¹⁶ Te kumta, ki la phah ha u ïa ki synran jong ki, lem bad ki nongbud u Herod, ki ïa-ong, “Ko Nonghikai, ngi tip ba me long uba shisha, bad ba me hikai ïa ka lynti U Blei ha kaba shisha, bad ba mem ñiew ïano ruh; naba mem khmih ïa ka khmat ki briew:

¹⁷ namar kata, to ong ha ngi, me mut kumno? Ka bit ne em ban ai khajna ha u Kaisar?”

¹⁸ U Jisu te ba u la tip ïa ka buit bymman jong ki, u la ong, “Balei phi pynshoi ïa nga, phi kiba arsap?

¹⁹ To pyni ïa u sbai khajna ha nga.” Ki la wallam te ha u shi suka.

²⁰ U ong ruh ha ki, “Kane ka dur bad ka jingthoh shalor, ki jongno?”

²¹ Ki ong ha u, “Ki jong u Kaisar.” Hangta u ong ha ki, “Naba kumta ai noh ha u Kaisar ïa ki jong u Kaisar, bad ha U Blei ïa ki jong U Blei.”

²² Te haba ki la ïohsngew ïa kata, ki la kyndit, bad haba ki la iehnoh ïa u, ki la leit noh.

Shaphang ka jingmihpat

²³ Ha kata ka sngi ki la wan ha u ki Saddusi, kiba ong ba ka jingmihpat kam long: te ki la kylli ïa u,

²⁴ ki da ong, “Ko Nonghikai, u Moses u la ong, ‘Lada uno uno ruh u ïap noh, u bymdon khun, ba u para jong u un shongkurim ïa ka tnga jong u, bad un pynmih symbai ïa la u hynmen.’

²⁵ La don te bad ngi ki hynñiew ngut shipara: te uba shuwa haba u la shongkurim, u la ïap noh, te naba um don khun, u la iehnoh ïa la ka tnga ha u para jong u.

²⁶ Kumjuh ruh uba shi sien bud, bad uba ar sien bud, ha ban da lut kita ki hynñiew ngut.

²⁷ Hadien kita baroh, te ka la ïap noh kata ka kynthei ruh.

²⁸ Namar kata, ha ka jingmihpat, kan long ka tnga jongno na kine ki hynñiew ngut? naba baroh ki la ïoh kurim ïa ka.”

²⁹ U Jisu u da ïathuh te u la ong ha ki, “Phi bakla, ba phim tip ïa ki jingthoh, lymne ïa ka bor U Blei.

³⁰ Naba ha kata ka jingmihpat kim ïashongkurim keiñ, lymne ïa-pynshongkurim, hynrei, ki long kum ki angel U Blei ha bneng.

³¹ Hynrei, shaphang kata ka jingmihpat ki nongïap, phim shym la pule ïa kata ba la ong U Blei ha phi, u da ong,

³² ‘Nga uba U Blei u Abraham, bad U Blei u Isaak, bad U Blei u Jakob ruh’? U Blei um long U Blei ki baïap, hynrei, jong ki ba-im.”

³³ Haba kita ki paidbah te ki la ïohsngew ïa kata, ki la sngewphylla na ka jinghikai jong u.

Ka hukum kaba kongsan tam

³⁴ Te haba ki Pharisi ki la ïohsngew ba u la pynduh nia ïa ki Saddusi, ki la ïalum lang.

³⁵ Uwei u riewsaid te uba na ki, khnang ban tynjuh ïa u, u la kylli,

³⁶ “Ko Nonghikai, kano ka hukum kaba khraw kaba ha Ka Hukum?”

³⁷ U Jisu te u la ïathuh ha u, “ ‘Men ieit ïa U Trai uba U Blei jong me da ka dohnud jong me baroh, bad da ka mynsiem jong me baroh, bad da ka jingmut jong me baroh.’

³⁸ Kane keiñ ka long ka hukum ka banyngkong bad kaba khraw.

³⁹ Ka ba-ar ruh ka long kum kata, ‘Men ieit ïa u paramarjan jong me kumba ïa lade.’

⁴⁰ Ha kita ki ar hukum la sdien ïa Ka Hukum baroh, bad ïa Ki Nongïathuhlypa.”

Ka jingkylli shaphang U Messiah

⁴¹ Haba ki dang sah lang ki Pharisi, U Jisu u la kylli ïa ki,

⁴² u da ong, “Phi mut kumno shaphang U Khrist? U long u khun jongno?” Ki la ïathuh ha u, “U jong u Dabid.”

⁴³ U ïathuh ha ki, “Haba kumta, kumno ba u Dabid da U Mynsiem u khot ‘U Trai’ ïa u, u da ong,

⁴⁴ “ ‘U Trai u la ong ha U Trai jong nga, “To shong sha kamon jong nga, tad ynda ngan pynlong ïa kiba shun ïa me ka jingïuh hapoh ki kjat jong me?” ’

⁴⁵ “Lada u Dabid te u khot ‘U Trai’ ïa u, kumno ba u long u khun jong u?”

⁴⁶ Ym don te uba lah ban ïathuh shikyntien ïa U, lymne ym don uba shlan kylli shuh ïa U naduh kata ka sngi.