MATHAÏOS 21 - KA BAIBL

U Jisu u leit rung shapoh Jerusalem kum U Syiem

¹ Te ynda ki la poi hajan Jerusalem, bad ki la wan ha Bethphage, ha u lum Olib, ynda kumta, U Jisu u la phah ar ngut ki synran,

² u da ong ha ki, “Khie leit sha katai ka shnong kaba ha marpyrshah jong phi, te kumne kumne ruh phin shem ïa ka kadda ba la teh lem bad u khun; to pyllait ïa ki, to wallam ruh sha nga.

³ Bad lada uno uno ruh un ong ei ei ha phi, phin ong, ‘U Trai u donkam ïa ki;’ te kumne kumne ruh un phah noh ïa ki.”

⁴ Kata baroh te ka la long, ba yn pyndep ïa kata ba la ong da u nongïathuhlypa, u da ong,

⁵ “Ïathuh ha ka khun ka Seïon, ‘Ha khmih, U Syiem jong pha u wan ha pha, uba jemnud bad uba shong halor ka kadda, halor u khun ka kadda kaba la ju mlien bad ka lyngkor ruh.’ ”

⁶ Ki synran te haba ki la leit, bad haba ki la leh kumba U Jisu u la hukum ïa ki,

⁷ ki la wallam ïa ka kadda bad ïa u khun, bad ki la siang ïa la ki jaiñ halor jong ki; bad ki la pynshong halor ïa u.

⁸ Te kiba kham bun na uta u paidbah ki la siang ïa la ki jaiñ ha ka lynti; kiwei te ki la khyllad ïa ki tnat na ki dieng, bad ki la siang ha ka lynti.

⁹ Kita ki paidbah de kiba ïaid sha shuwa, bad kita kiba bud nadien, ki la ïapyrta, ki da ong, “Hosanna ïa U Khun u Dabid! Long ba la kyrkhu ïa uta uba wan ha ka kyrteng U Trai! Hosanna ha kiba jrong tam eh!”

¹⁰ Te haba u la wan hapoh Jerusalem, la khihwin kata ka shnong baroh, ki ïa-ong, “Uei une?”

¹¹ Kita ki paidbah te ki la ong, “Une u long uta u nongïathuhlypa, U Jisu keiñ, uba na Nasaret ha Galilaïa.”

Ka jingpynkhuid ïa ka templ

¹² U Jisu te u la leit hapoh ka templ, bad u la beh noh baroh ïa kiba die bad ba thied ha ka templ, bad u la pynkyllon ïa ki miej jong ki nongïapeiñ sbai, bad ïa ki jingshong jong kita kiba die ïa ki paro;

¹³ bad u la ong ha ki, “La thoh: ‘Ïa ka ïing jong nga yn khot “ka ïing jingduwai,” ’ hynrei, phi, phi la pynlong ka krem nongtuh ïa ka.”

¹⁴ Ki bamatlah bad ki ba-dkoh ruh ki la wan ha u ha ka templ, bad u la pynkhiah ïa ki.

¹⁵ Haba ki rangbah lyngdoh bad ki nongthoh ki la ïohi ïa kita ki kam phylla kiba u la leh, bad ïa ki khynnah ba ki ïapyrta ha ka templ, bad ba ki ïa-ong ruh, “Hosanna ïa U khun u Dabid!” ki la sngewbitar eh,

¹⁶ bad ki la ong ha u, “Me ïohsngew aïu kine ki ïa-ong?” U Jisu te u la ong ha ki, “Ho-oid, phim pat ju pule, “ ‘Na ka shyntur ki khunlung bad kiba dang buiñ me la pynjanai ïa ka jingïaroh?’ ”

¹⁷ Haba u la iehnoh te ïa ki, u la leit noh na kata ka shnong sha Bethania, bad u la thiah miet hangta.

U Jisu u tim ïa u dieng dumbur

¹⁸ Te haba u wan pat sha shnong mynstep, u la sngewthngan.

¹⁹ Haba u la ïohi te ïa uwei u dieng Dumbur harud lynti, u la leit ha u, te um shym la shem ei ei ruh em ha u, hynrei, tang ki sla hi; u la ong te ïa u, “U soh un ym long shuh ha me lano lano ruh.” Te kumne kumne ruh u la ïap tyrkhong noh uta u dieng Dumbur.

²⁰ Te haba ki synran ki la ïohi, ki la kyndit, ki da ong, “Kumno ba une u dieng Dumbur u la ïap tyrkhong noh kumne kumne ruh?”

²¹ U Jisu te u la ïathuh u la ong ha ki, “Shisha nga ong ha phi, lada phi don ka jingngeit, bad phim sngew-artatien, phin ym leh tang kata ïa kaba la leh ïa uta u dieng Dumbur, hynrei, lada phin ong ha une u lum ruh, ‘Long ba la rat noh, bad ba la noh ruh sha ka duriaw’, yn sa leh kumta.

²² Bad ïa kiei kiei baroh kat kiba phin pan ha ka jingduwai da kaba ngeit, phin pdiang.”

Kaba kem ktien shaphang ka iktiar U Jisu

²³ Haba u la wan te ha ka templ, ki rangbah lyngdoh bad ki tymmen basan jong u paidbah ki la wan ha u haba u dang hikai, ki da ong, “Da ka bor aïu ba me leh ïa kine kiei kiei ruh? Bad uei ba la ai ïa kane ka bor ha me?”

²⁴ Bad U Jisu u da ïathuh u la ong ha ki, “Nga ruh ngan kylli ïa phi kawei ka ktien, lada phin ïathuh ïa kata ha nga, nga ruh ngan ïathuh ha phi da ka bor aïu ba nga leh ïa kine kiei kiei ruh:

²⁵ Kata ka jingbaptis u Ïoannis ka long na-ei? na bneng, ne na ki briew?” Ki te ki ïasaid hi paralok, ki ïa-ong, “Lada ngin ong, ‘Na bneng’, un ong ha ngi, ‘Haba kumta balei ba phim shym la ngeit ha u?’

²⁶ Hynrei, lada ngin ong, ‘Na ki briew’, ngi sheptieng ïa u paidbah; naba baroh ki ïañiew ïa u Ïoannis kum u nongïathuhlypa.”

²⁷ Ki da ïathuh te ki la ong ha U Jisu, “Ngim tip.” U te u la ïathuh ha ki, “Nga ruh ngam ong ha phi da ka bor aïu ba nga leh ïa kine kiei kiei ruh.”

Ka pharshi shaphang ar ngut ki khun

²⁸ “Hynrei, phi mut kumno? U briew uba la don ar ngut ki khun; te u la wan ha uba nyngkong, bad u la ong, ‘Ko khun, khie leit ban trei mynta ha ka brisoh jong nga.’

²⁹ Uta, u da ïathuh te u la ong, ‘Ngam treh’, hynrei, hadien u da kylla-ka-bamut, bad u la leit.

³⁰ U la wan ruh ha uba hadien, bad u la ong kumjuh. Uta te u da ïathuh u la ong, ‘Ngan sa leit, ko kynrad’, hynrei, um leit.

³¹ Uno na kine ar ngut uba la leh ïa ka mon u kpa?” Ki ong ha u, “Uba nyngkong.” U Jisu u ong ha ki, “Shisha nga ong ha phi, ba ki nongkhrong bad ki nuti ki leit ha shuwa jong phi sha ka hima U Blei.

³² Naba u Ïoannis u la wan ha phi ha ka lynti ka hok, te phim shym la ngeit ha u; hynrei, ki nongkhrong bad ki nuti ki la ngeit ha u, hynrei phi, haba phi la ïohi, phim shym la kylla hadien, ïa ka ban ngeit ha u.

Ka pharshi shaphang ka brisoh

³³ “Ha sngew ïa kawei pat ka pharshi: La don u briew uba u trai ïing, uba la thung ka brisoh, bad u la ker ïa ka baroh sawdong, bad u la tih ïa ka jaka tylliat Waiñ ha ka, bad u la tei ka ïing phira, bad u la ai wai ïa ka ha ki nongsumar bri, bad u la leit noh sha kawei pat ka ri.

³⁴ Ynda ka aïom kheit soh ka la jan, u la phah ïa ki shakri jong u ha kita ki nongsumar bri, ban shim ïa ki soh jong ka.

³⁵ Kita ki nongsumar bri te haba ki la ïakem ïa ki shakri jong u, ïa uwei ki la sympat, ïa uwei pat ruh ki la pynïap, ïa uwei pat de ki la lynthem da ki maw.

³⁶ U la phah pat ïa kiwei kiwei ki shakri kiba kham kor ïa kiba mynnyngkong, te ki la leh kumjuh ïa kita ruh.

³⁷ Hynrei, ha ka bakhatduh eh u la phah ïa la u khun ha ki, u da ong, ‘Kin ïaburom ïa u khun jong nga.’

³⁸ Hynrei, haba kita ki nongsumar bri ki la ïohi ïa uta u khun, ki la ïa-ong paralok hi, ‘Une u ban sa long u trai ka brisoh; ïa ngin ïa-pynïap noh ïa u, ngin ïashim ruh ïa ka bynta jong u.’

³⁹ Te haba ki la kem ïa u, ki la ïashop noh shabar jong kata ka brisoh, bad ki la ïa-pynïap noh.

⁴⁰ Namar kata, ynda uta u trai kata ka brisoh un wan, un sa leh aïu ïa kita ki nongsumar bri?”

⁴¹ Ki ong ha u, “Un pynïap sniew khoit keiñ ïa kita ki bymman, bad un sa ai wai ïa ka brisoh ha kiwei pat ki nongsumar, ki ban ai ïa ki soh ha u ha ki aïom jong ki.”

⁴² U Jisu u ong ha ki, “Phim ju la pule ha ki jingthoh: “ ‘Ïa u maw ïa uba ki nongtei ki la bred, ïa une la pynlong ha khlieh ka dong: kane ka long na U Trai, bad ka long iphylla ha ki khmat jong ngi?’

⁴³ “Namar kata, nga ong ha phi, ba yn shim noh ïa ka hima U Blei na phi, bad yn ai ïa ka ha kynja ki briew ki ban pynmih ïa ki soh jong ka.

⁴⁴ Jar uba hap te halor une u maw, yn pynmong ïa u: hynrei, jar ha uba un hap, un pynlwet jin ïa u.”

⁴⁵ Te haba kita ki rangbah lyngdoh bad ki Pharisi ki la ïohsngew ïa ki pharshi jong u, ki la tip ba u la kren shaphang jong ki.

⁴⁶ Haba ki ïawad dong te ban kem ïa u, ki la sheptieng ïa ki paidbah, naba ki la ñiew ïa u kum u nongïathuhlypa.