MATHAÏOS 20 - KA BAIBL

Ki nongtrei ha ka brisoh

¹ “Naba ka hima ki bneng ka long kum u briew uba u trai ïing, uba la leit la dang step ban wer ki nongtrei sha ka brisoh jong u.

² Haba u la ïakut te bad kita ki nongtrei, shi suka shi sngi, u la phah noh ïa ki sha ka brisoh jong u.

³ Haba u la leit ruh hamar kaba lai baje, u la ïohi ïa kiwei kiba ïeng kai ha ka jaka ïew;

⁴ u la ong te ha ki, ‘To khie leit ma phi ruh sha kata ka brisoh, kat kaba biang ruh ngan ai ha phi.’ Ki ruh ki la leit.

⁵ Haba u la leit pat hamar kaba hynriew baje bad kaba khyndai baje, u la leh kumjuh.

⁶ Haba u la leit ruh hamar kaba khatwei baje, u la shem ïa kiwei pat kiba ïeng kai; te u la ong ha ki, ‘Balei phi ïaïeng kai hangne baroh shi sngi?’

⁷ Ki la ong ha u, ‘Naba ym don ba la wan wer ïa ngi.’ U la ong te ha ki, ‘To khie leit ma phi ruh sha kata ka brisoh, kat kaba biang ruh phin ïoh.’

⁸ Ynda la janmiet te, uta u trai brisoh u la ong ha u rangbah jong u, ‘Khot ïa kita ki nongtrei bad to ai ha ki, ïa ka bainong jong ki, da sdang naduh ki bakhatduh haduh ki bashuwa.’

⁹ Te haba ki la wan kita kiba hamar kaba khatwei baje, ki la ïoh uwei uwei mar shi suka.

¹⁰ Hynrei, haba ki la wan kita ki bamynshuwa, ki la ïamut ba kin ïoh tam; hynrei, ki ruh ki la ïoh uwei uwei mar shi suka.

¹¹ Haba ki la pdiang te, ki la ïakren khñium ïa uta u trai ïing,

¹² ki ong, ‘Kine ki bakhatduh ki la trei tang shi kynta, pynban me la pynïaryngkat ïa ki bad ngi, kiba la shah ïa kaba eh bad ïa kaba shit ka sngi.’

¹³ U te u la ïathuh bad u la ong ha uwei na ki, ‘Ko lok, ngam shym leh ka bymhok ïa me; mem shym la ïakut shi suka bad nga?

¹⁴ To shim ïa la ka jong to khie leit noh ruh; nga mon ban ai ha une ruh u bakhatduh kumba ha me keiñ.

¹⁵ Kam bit ïa nga ban leh ïa kaba nga mon da la ki jong? Ne ka khmat jong me ka long ka basniew naba nga long u babha?’

¹⁶ Kumta, ki bakhatduh kin long shuwa, bad ki bashuwa kin long khatduh keiñ. Naba ki long shibun ïa kiba la khot, hynrei, khyndiat ba la jied.”

U Jisu u kren kaba lai sien shaphang la ka jingïap bad ka jingmihpat

¹⁷ Te katba U Jisu u dang leit kiew sha Jerusalem, u la shim kyrpang ïa ki khat-ar ngut ki synran, bad ha kata ka lynti u la ong ha ki,

¹⁸ “Ha khmih, ngi ïakiew sha Jerusalem, bad yn die noh ïa U Khun u briew ha ki rangbah lyngdoh bad ki nongthoh; bad kin ïa-pynrem ïa u ïa ka ban ïap,

¹⁹ bad kin ai noh ïa u ha ki Jentil ïa ka ban lehbeiñ bad ban sympat, bad ban sahnarphna ruh; hynrei, ha ka balai ka sngi un mihpat.”

Ka jingkyrpad ka kmie u Jakob bad u Ïoannis

²⁰ Ynda kumta, ka kmie ki khun u Sebedi ka la wan ha u bad ki khun jong ka, ka da mane dem ïa u, bad ka da pan kaei kaei na u.

²¹ U la ong te ha ka, “Pha kwah aïu?” Ka ong ha u, “To hukum ba kine ar ngut ki khun jong nga kin ïoh shong uwei sha kamon jong me, bad uwei sha kadiang jong me, ha ka hima jong me.”

²² U Jisu te u da ïathuh u la ong, “Phim tip ïa kaei ba phi pan. Phi lah ban dih na ka khuri na kaba nga ngan sa dih? bad ban pynbaptis ïa phi da kata ka jingbaptis da kaba la pynbaptis ïa nga?” Ki la ong ha u, “Ngi lah.”

²³ U ïathuh te ha ki, “Phin ïoh dih shisha na ka khuri jong nga, bad da kata ka jingbaptis da kaba la pynbaptis ïa nga, yn pynbaptis ïa phi keiñ, hynrei, ïa ka ban shong sha kamon jong nga bad sha kadiang jong nga, kam long ka jong nga ban ai, hynrei, tang ha kita ïa kiba U Kpa jong nga u la pynkhreh ïa ka.”

²⁴ Haba kita ki shiphew ngut ki la ïohsngew ïa kata, ki la ïabitar ïa kita ki ar ngut shipara.

²⁵ U Jisu te u la khot ïa ki ha u, bad u la ong, “Phi tip ba ki syiem ki Jentil ki leh trai khlieh ïa ki, bad kita ki bakhraw ki leh don bor halor jong ki:

²⁶ kan ym long kumta hapdeng jong phi: hynrei, lada uno uno ruh u mon ban long bakhraw hapdeng jong phi, to ai ba un long u shakri jong phi;

²⁷ bad lada uno uno ruh u mon ban long rangbah hapdeng jong phi, to ai ba un long u mraw jong phi:

²⁸ kumba U Khun u briew um shym la wan ba yn shakri ïa u, hynrei, ba u un shakri, bad ba un ai ïa la ka jingim ban long ka jingsiewspah ïa kiba bun.”

U Jisu u pynpeit ruh ïa ki khmat ar ngut ki bamatlah

²⁹ Te haba ki leit noh na Jerikho, u paidbah babun u la bud ïa u.

³⁰ Ha khmih ruh, haba ar ngut ki bamatlah kiba shong harud lynti ki la ïohsngew ba U Jisu u ïaid lait, ki la ïakyrpad jam, ki da ong, “Ko Trai, U Khun u Dabid, to isynei ïa ngi.”

³¹ Uta u paidbah te u la sneng ïa ki, ba kin sngap jar, hynrei, ki la ïakyrpad kham tam, ki da ong, “Ko Trai, U Khun u Dabid, to isynei ïa ngi.”

³² Te U Jisu haba u la ïeng, u la khot ïa ki, bad u la ong, “Phi mon ba ngan leh aïu ïa phi?”

³³ Ki la ïa-ong ha u, “Ko Trai, ban pynpeit ïa ki khmat jong ngi.”

³⁴ U Jisu te ba u la sngewsynei, u la ktah ïa ki khmat jong ki: te kumne kumne ruh ki khmat jong ki, ki la peit, bad ki la ïabud ïa u.