MATHAÏOS 2 - KA BAIBL

Ki riewstad na ka Ri Mihngi

¹ Haba la kha ïa U Jisu ha Bethlehem Judia, mynba u Herod u long syiem, ha khmih, la wan ki riewstad na mihngi sha Jerusalem,

² ki da ong, “Hangno uba la dang kha shen U Syiem ki Jiw? naba ngi la ïohi ïa u khlur jong u ha ka ri mihngi, bad ngi la ïawan ban mane ïa u.”

³ Hynrei, haba u Herod syiem u la ïohsngew ïa kata, u la khihwin, bad ka Jerusalem baroh lem bad u.

⁴ Te haba u la ïalum lang ïa ki rangbah lyngdoh baroh bad ïa ki nongthoh u paidbah, u la kylli ïa ki, “Hangno ba yn kha ïa U Khrist?”

⁵ Te ki la ïathuh ha u, “Ha Bethlehem Judia: naba kumne la thoh da u nongïathuhlypa,

⁶ “ ‘Pha ruh ka Bethlehem, ka ri Judia, pham long i barit tam hapdeng ki syiem Judia: naba na pha un mih U Nongsynshar, u ban sharai ïa ki briew jong nga ki Israel.’ ”

⁷ Ynda kumta, u Herod haba u la khot jar jar ïa kita ki riewstad, u la kylli biang biang ruh na ki, ïa ka aïom ba u la mihpaw uta u khlur.

⁸ Bad haba u la phah noh ïa ki sha Bethlehem, u la ong, “To khie leit noh ïawad biang biang ruh ïa uta u khunlung; bad ynda phi la shem, wan ïathuh pat ha nga, ba nga ruh ngan ïoh wan mane ïa u.”

⁹ Te haba ki la ïohsngew ïa u syiem, ki la leit noh: ha khmih ruh, uta u khlur, ïa uba ki la ïohi ha mihngi, u la leit sha shuwa jong ki, tad ynda u la poi bad u la neh haneng ka jaka ha kaba u don uta u khunlung.

¹⁰ Te haba ki la ïohi ïa uta u khlur, ki la ïakmen da ka jingkmen bakhraw eh.

¹¹ Haba ki la ïawan ruh ha ka ïing, ki la ïohi ïa uta u khunlung lem bad ka Mari ka kmie jong u; haba ki la ïadem ki la ïamane ruh ïa u; bad haba ki la ïalaw ïa ki jingsong jong ki, ki la ïatyrwa ai ki jingai ha u, ïa ka ksiar, bad ïa ka jingiwbih, bad ïa ka mirr de.

¹² Te haba la maham lypa ïa ki na U Blei ha ka jingphohsniew ba kin ym leit phai pat sha u Herod, ki la ïaleit noh sha la ka ri na kawei pat ka lynti.

Ka jingkynriah noh sha ka Ri Ijipt

¹³ Haba ki la ïaleit noh, ha khmih, u angel U Trai u la paw ha u Joseph ha ka jingphohsniew, u da ong, “To ïeng to shim noh ruh ïa u khunlung bad ïa ka kmie jong u, to phet noh sha ri Ijipt, bad men shong hangta tad ynda ngan ong ha me: naba u Herod un sa wad ïa uta u khunlung ïa ka ban pynïap noh ïa u.”

¹⁴ Te haba u la ïeng, u la shim noh ïa uta u khunlung bad ïa ka kmie jong u mynmiet, bad u la leit noh sha Ijipt:

¹⁵ bad u la shong hangta haduh ka jingïap u Herod: ba kumta yn pyndep ïa kata ba la ong U Trai da u nongïathuhlypa, u da ong, “Na Ijipt nga la khot ïa u khun jong nga.”

Ka jingpynïap ïa ki khunlung

¹⁶ Ynda kumta, u Herod, haba u la ïohi ba la shukor ïa u da kita ki riewstad, u la bitar eh lep, bad u la phah pynïap noh ïa ki khun shynrang baroh kiba ha Bethlehem, bad ha ki phang jong ka baroh, naduh kiba ar snem bad kiba kham poh, kumba dei kata ka aïom ïa kaba u la kylli biang biang ruh na kita ki riewstad.

¹⁷ Te kumta, la pyndep ïa kata ba la ong da u Jeremaïah u nongïathuhlypa, u da ong,

¹⁸ “Ha Rama la ïohsngew ka jingsawa, ka jingïam bad ka jingïambriew kaba khraw, ka Rakhel ka da ïam namar la ki khun: kam mon ruh ba yn pyntngen ïa ka, naba kim don shuh.”

Ka jingwan phai na Ijipt

¹⁹ Hynrei, haba la ïap u Herod, ha khmih, u angel U Trai u la paw ha u Joseph ha ka jingphohsniew ha Ijipt,

²⁰ u da ong, “To ïeng, to shim noh ïa uta u khunlung bad ïa ka kmie jong u, to khie leit ruh sha ka ri Israel: namar ki la ïap kita kiba la ïawad ïa ka mynsiem uta u khunlung.”

²¹ Kumta, haba u la ïeng, u la shim ïa uta u khunlung bad ïa ka kmie jong u, bad u la wan noh sha ka ri Israel.

²² Hynrei, haba u la ïohsngew ba u Arkhelos u synshar ha Judia ha ka jaka u Herod u kpa jong u, u la sngewsheptieng ban leit shata: te haba la maham lypa ïa u na U Blei ha ka jingphohsniew, u la kynriah noh sha ki phang ka Galilaïa.

²³ Haba u la poi ruh, u la shong duh ha ka shnong ba la khot “ka Nasaret”: ba kumta yn pyndep ïa kata ba la ong da ki nongïathuhlypa, “Ba yn khot ‘u nong Nasaret’ ïa u.”