MATHAÏOS 19 - KA BAIBL

Ka jinghikai shaphang kaba iehnoh tnga

¹ Ka la jia ruh haba U Jisu u la lah wai noh ïa kita ki jingong, ba u la leit noh na Galilaïa, bad u la wan ha ki phang ka Judia sha shiliang ka Jordan;

² te ki paidbah babun ki la ïabud ïa u, bad u la pynkhiah ïa ki hangta.

³ Te ki Pharisi ki la ïawan ha u, ba ki da ïatynjuh ïa u, bad ki la kylli ïa u, “Ka bit ne em ïa u briew ban pyllait noh ïa ka tnga jong u na ka bynta kano kano ka daw baroh?”

⁴ U te u la ïathuh bad u la ong, “Phim shym la pule, ba uta uba la thaw ïa ki naduh kaba mynnyngkong u la thaw shynrang bad kynthei ïa ki,

⁵ bad ba u la ong, ‘Na ka bynta kata, u briew un iehnoh ïa la u kpa bad ïa la ka kmie, bad un ïaineh bad ka tnga jong u; te ki baroh ar ngut kin ïalong kawei ka doh?’

⁶ Kumta, kim long ar ngut shuh, hynrei, kawei ka doh. Namar kata, ïa kaba U Blei u la pynïasoh lem, to u briew wat pynïakhlad.”

⁷ Ki ong ha u, “Te balei ba u Moses u la hukum ban ai ïa ka kot iehnoh, bad ban pyllait noh ïa ka?”

⁸ U ïathuh ha ki, “U Moses, namar ka dohnud runar jong phi, u la shah ïa phi ban pyllait noh ïa ki tnga jong phi, hynrei, naduh kaba mynnyngkong kam shym la long kumta.

⁹ Nga ong ruh ha phi, ba uno uno ruh u ban pyllait noh ïa ka tnga jong u, lymda tang na ka bynta kaba klim, bad un shongkurim ïa kawei pat, u klim keiñ; bad jar uba shongkurim bad kata ïa kaba la pyllait noh, u klim keiñ.”

¹⁰ Ki synran jong u ki la ong ha u, “Lada ka jinglong u briew bad la ka tnga ka long kumta, kam myntoi keiñ ban shongkurim.”

¹¹ U te u la ong ha ki: “Ki briew baroh kim lah pdiang ïa kata ka ktien, hynrei, tang kita ha kiba la ai bor.

¹² Naba don ki ïunukh ïa kiba la kha kumta na ka kpoh ka kmie, don ki ïunukh ruh ïa kiba la pynlong ïunukh da ki briew, don ki ïunukh ruh kiba la pynlong ïunukh ïa lade na ka bynta ka hima ki bneng. Uta uba lah ban pdiang, to un pdiang.”

U Jisu u kyrkhu ïa ki khynnah

¹³ Ynda kumta, ki la wallam ïa ki khunlung ha u, ba un buh ïa la ki kti ha ki, bad ba un duwai, hynrei, ki synran ki la sneng ïa ki.

¹⁴ U Jisu te u la ong, “Shah ïa ki khunlung ban wan ha nga, bad wat khang ïa ki, naba ïa kiba kum kita, long ka hima ki bneng.”

¹⁵ Haba u la buh te ïa la ki kti ha ki, u la leit noh nangta.

U samla u bariewspah

¹⁶ Ha khmih ruh, uwei u la wan bad u la ong ha U, “Ko Nonghikai babha, ngan leh ïa ka babha aïu, ba ngan ïoh ïa ka jingim bymjukut?”

¹⁷ U la ong te ha u, “Balei ba me khot babha ïa nga? Ym don u babha, hynrei, tang uwei, uba U Blei. Hynrei, lada me mon ban leit bsut sha kata ka jingim, to sumar ïa ki hukum.”

¹⁸ U la ong ha U, “Ïa kino?” U Jisu te u la ong: “Men ym pynïap, Men ym klim, Men ym tuh, Men ym sakhi lamler,

¹⁹ Burom ïa la u kpa bad ïa la ka kmie, bad men ieit ïa u paramarjan jong me kumba ïa lade.”

²⁰ Uta u samla u la ong ha U, “Ïa kita baroh nga la sumar na myndang khynnah: don aïu pat ba nga dang duna?”

²¹ U Jisu u la ong ha u, “Lada me mon ban long janai, to khie leit noh, die noh ïa kiei kiei ruh kat kiba me don, to ai ruh ha ki baduk, men ïoh ka jingkynshew te ha bneng; to wan bud ruh ïa nga.”

²² Hynrei, haba uta u samla u la ïohsngew ïa kata ka ktien, u la leit noh sngewsih, naba u don shibun ki spah.

²³ U Jisu te u la ong ha ki synran jong u: “Shisha nga ong ha phi, ba ka da eh noh ïa u riewspah ban leit bsut hapoh ka hima ki bneng.

²⁴ Pat ruh nga ong ha phi, ba ka kham jem ïa ka ut ban bsut lyngba ïa ka thliew thyrnia, ban ïa u riewspah ban bsut hapoh ka hima U Blei.”

²⁵ Hynrei, haba ki synran jong u ki la ïohsngew ïa kata, ki la kyndit eh thred, ki da ong, “Haba kumta, uei ba lah ban lait im?”

²⁶ U Jisu te haba u la khmih ïa ki u la ong ha ki, “Da ki briew kata ka bym lah, hynrei, da U Blei kiei kiei baroh ki long kiba lah.”

²⁷ Ynda kumta, u Petros u la ïathuh bad u la ong ha U, “Ha khmih, ngi la iehnoh ïa kiei kiei baroh, bad ngi la ïabud ïa me; haba kumta ngin ïoh aïu?”

²⁸ U Jisu te u la ong ha ki: “Shisha nga ong ha phi, ba phi kiba la ïabud ïa nga, ha ka jingpynthymmai ynda U Khun u briew un shong ha ka khet ka burom jong u, phi ruh phin shong ha ki khat-ar ki khet, ban bishar ïa ki khat-ar ki jaid Israel.

²⁹ Uno uno baroh ruh uba la iehnoh ïa ki ïing, lane ïa ki hynmen hynbew shynrang ne kynthei, lane ïa u kpa lane ïa ka kmie, lane ïa ka tnga lane ïa ki khun, lane ïa ki bri, na ka bynta ka kyrteng jong nga, un ïoh shispah shah ïa kata, bad un ïoh ka jingim bymjukut ruh.

³⁰ Hynrei, shibun na kiba long shuwa kin long khatduh; bad ki bakhatduh kin long shuwa.